«Դաշնակցության» երկու ներկայացուցչի վերաբերյալ գործն ուղարկվել է դատարան: Փոքր Վեդի համայնքի նախկին ղեկավար Գառնիկ Մանուկյանը և Արտաշատի ավագանու դաշնակցության ղեկավար Արտավազդ Մարգարյանը մեղադրվում են 2022-ի հունիսին անցկացված հավաքներին մի շարք անձանց մասնակից դարձնելուն նյութապես շահագրգռելու համար:
Գեղամ Մկրտչյան (Արարատի մարզային քննչական վարչության ՀԿԳ ավագ քննիչ) - Կազմել են ցուցակներ, հաշվառել են անձանց տվյալները, որոշակի գրառումներ են կատարել գումարներ վերցնել- չվերցնելու վերաբերյալ:
Ցուցակները հայտնաբերվել և առգրավվել են մեղադրյալների բնակարաններում կատարված խուզարկությամբ:
Գեղամ Մկրտչյան - Սրանք խուզարկությամբ հայտնաբերված փաստաթղթերից 3 թերթի պատճեններն են, որտեղ, օրինակ, կա գրառում որոշակի անձանց դիմաց՝ գումար չեն վերցնում:
Քրեական վարույթ նախաձեռնելու հիմքը լրատվամիջոցներից մեկի հրապարակած՝ «ՀՅԴ-ականները շարունակում են փողով մարդ բերել» վերնագրով ձայնագրությունն է։ Այն այժմ համացանցում հասանելի չէ.
Գեղամ Մկրտչյան - Ասում են` «առանց գումար տալու ոչ մեկը չի գնալու, մեր դաշնակներինը արդեն տվել ենք», խոսում են նաև, որ պետք է գնան, Սիմոնից գումար վերցնեն: Օպերատիվ-հետախուզական միջոցառումներով պարզվել է, որ ոմն Սիմոնը հանդիսանում է Հայ Հեղափոխական Դաշնակցության գերագույն խորհրդի նախագահ Սիմոն Սիմոնյանը:
Սիմոնյանը եւս այս վարույթով հարցաքննվել է:
Արսեն Բաբայան (մեղադրյալ Արտավազդ Մարգարյանի պաշտպան) - Առաջին րոպեից մինչև վերջին րոպեն Արտավազդ Մարգարյանը հայտարարել է, որ որևէ հանցավոր արարք չի կատարել:
2 դաշնակցականներն էլ մեղադրանքը չեն ընդունում: Բաբայանը վիճելի է համարում ապացույց համարվող ձայնագրությունը:
Արսեն Բաբայան - Կարո՞ղ է դա ընդհանրապես որևէ առիթ լինել քրեական վարույթ նախաձեռնելու, կարո՞ղ է դա որպես ապացույց դիտարկվել, առավել եւս` այն հանգամանքներում, երբ հիմա չկա այդ ապացույցը այն կայքում, որում դա հրապարակվել էր, ավելին` նախաքննության մարմինը չի կարողացել ի վերջո հասնել նրան, որ պարզեր, թե այդ ձայնագրությունը որտեղից էր հայտնվել լրատվամիջոցի ձեռքում:
Ըստ պաշտպանի՝ որևէ մեկին չեն հարցաքննել և փորձաքննություն չեն նշանակել` հասկանալու` դա գաղտնալսում էր կամ մոնտաժված էր, թե ոչ:
Գառնիկ Մանուկյանի պաշտպան Վահե Զոհրաբյանը եւս պնդում է՝ ձայնագրությունը ձեռք է բերվել ապօրինի եղանակով:
Վահե Զոհրաբյան (մեղադրյալ Գառնիկ Մանուկյանի պաշտպան) - Առաջադրված մեղադրանքում Գառնիկ Մանուկյանը իրեն մեղավոր չի համարում քանի որ մեղադրանքը ամբողջությամբ հիմնված է ենթադրությունների վրա, բուն մեղադրանքի մեջ նշված չէ, թե ենթադրաբար, ըստ դատախազության, Գառնիկ Մանուկյանը ում է նյութապես շահագրգռելու եղանակով տարել հավաքների:
Քննիչ Մարգարյանը, մինչդեռ, հակադարձում է՝ ձայնագրությունը մոնտաժելու վերաբերյալ տվյալներ ձեռք չեն բերվել, հավելում՝ այն թույլատրելի ապացույց է: Նշում է՝ «ԶԼՄ մասին» օրենքի համաձայն՝ լրատվամիջոցները պարտավոր չեն և կարող են չբացահայտել ձայնագրության ձեռք բերման աղբյուրը, եթե այն չի վերաբերում ծանր հանցագործության:
Գեղամ Մկրտչյան - Քրեական վարույթը նախաձեռնված է «Քրեական օրենսգրքի» 236 հոդվածի 2-րդ մասի հատկանիշներով, նաև մեղադրվում են տվյալ անձինք նույն հոդվածով, որը համարվում է միջին ծանրության հանցագործություն, ըստ էության` ստացվում է, որ վարույթն իրականացնող մարմինը զրկված է դրա ձեռքբերման աղբյուրը բացահայտելու հնարավորությունից, այսինքն` չի կարող պարտադրել ԶԼՄ-ին բացահայտել դրա աղբյուրը:
Նա հավելեց՝ այնուամենայնիվ, դրա բացահայտման ուղղությամբ միջոցառումներ ձեռնարկվել են, մասնավորապես` լրատվական կայքին գրություն է հասցեագրվել, կայքը, սակայն, հրաժարվել է բացահայտել աղբյուրը:
Գեղամ Մկրտչյան - Այդ իրավակարգավորումների համատեքստում այն համարվում է իրավաչափ, իսկ ձայնագրությունը` թույլատրելի ապացույց:
2 մեղադրյալի նկատմամբ որպես խափանման միջոց է ընտրվել բացակայելու արգելքը:
Քննիչը հավելում է՝ խուզարկությամբ առգրավվել են «Հայաստան դաշինք» գրառմամբ ցուցակներ, որով առանձին քրեական վարույթ է նախաձեռնվել ընտրակաշառքի վերաբերյալ, ուղարկվել Հակակոռուպցիոն կոմիտե:
Հեղինակ` Տաթև Խաչատրյան
