Լեռնային Ղարաբաղի հիմնախնդրին վերաբերելի հարցերը ՀՀ օմբուդսմենի առաջնային ուշադրության կենտրոնում են: Այդ մասին ԱԺ մշտական հանձնաժողովների համատեղ նիստի ժամանակ հայտարարեց ՀՀ ՄԻՊ Անահիտ Մանասյանը:
«Ինչպես սահմանամերձ բնակավայրերում մարդու իրավունքների խախտումները, այնպես էլ ԼՂ հիմնախնդրին վերաբերելի համատեքստում մարդու իրավունքների խախտումները ես ամենօրյա ռեժիմով բարձրաձայնում եմ նաև միջազգային գործընկերների մոտ՝ ցույց տալով, որ սա ոչ թե պարզապես քաղաքական կամ տարածքային հարց է, այլ ցույց տալով, որ սա մարդկանց հիմնարար իրավունքներին վերաբերելի հարց է»,- ասաց Մանասյանը:
Լաչինի միջանցքի արգելափակման հետ կապված խնդիրը ևս, ըստ ՀՀ ՄԻՊ-ի, ամենօրյա ռեժիմով բարձրաձայնվում է: Այս առումով առաջիկայում զեկույց կպատրաստվի՝ միջազգային հանրության ուշադրությունը հրավիրելով խնդրի վրա:
«Այստեղ մի շատ կարևոր հանգամանք կա, որը մշտապես բոլորս պետք է նկատի ունենք, ոչ թե պարզապես ցույց տալով դրվագային խախտումները, այլ ցույց տալով այն ամբողջ հայատյաց քաղաքականությունը, որն Ադրբեջանը պետության կողմից օժանդակվող մակարդակով իրացնում է, իսկ դա շատ վտանգավոր է»,- ասաց նա:
Անահիտ Մանասյանը նաև տեղեկացրեց, որ այցելել է Գեղարքունիքի մարզի բոլոր սահմանամերձ բնակավայրեր և մարդկանց կյանքի, սեփականության, կրթության իրավունքների խախտումներ արձանագրել:
«Բոլոր սահմանամերձ բնակավայրերում դպրոցները գտնվում են թշնամու, ադրբեջանական զինծառայողների՝ այս պահին գտնվող դիրքերի ուղիղ նշանառության ներքո»,- ասաց ՀՀ ՄԻՊ-ը:
