ՀՀ քննչական կոմիտեի նախագահ Արգիշտի Քյարամյանն այսօր խորհրդարանում 2022 թվականի բյուջեի կատարողականի հաշվետվության ժամանակ անդրադարձավ ՆԳՆ ոստիկանության Տավուշի մարզային վարչության Դիլիջանի բաժնի քրեական հետախուզության բաժանմունքի պետի կողմից ծեծի ենթարկված 16-ամյա անչափահասի դեպքին՝ տեղեկացնելով, որ գործուն զղջալու հիմքով է քրեական պատասխանատվությունց ազատվել տեսանյութում երևացող անձը։
«Պետք է նշեմ, որ գործուն զղջալու հիմքով քրեական պատասխանատվությունից ազատելու իրավասությունը ՔԿ-ի լիազորությունների տիրույթից դուրս է, բայց, այնուամենայնիվ, որպեսզի պարզ լինի, կուզեմ ներկայացնել ՔԿ-ի ու անձամբ իմ մոտեցումը այդպիսի երևույթներին։ Մարզային քննիչն է միջնորդություն ներկայացրել, ու, ընդհանուր առմամբ, ՔԿ-ի մոտեցումներին հակասող մոտեցում է, դա մենք չենք ընդունում, ու ընդհանուր մեր տրամաբանությունից դուրս է այն գաղափարը, որ այդ խրախուսական նորմը կարող է կիրառվել անչափահասների նկատմամբ ոտնձգություն իրականացնող անձանց նկատմամբ»,- հայտարարեց Քյարամյանը։
Իրավական տեսանկյունից, սակայն, օրենքը տալիս է այդ հնարավորությունը, որ առաջին անգամ ոչ մեծ ու միջին ծանրության հանցանք կատարած անձը կարող է ազատվել գործուն զղջալու հիմքով քրեական պատասխանատվությունից։
«Ինչքան էլ այս հնարավորությունը կա, այնուամենայնիվ, դա հայեցողական է, ՔԿ-ի մոտեցումներին չի համապատասխանում կայացված որոշումը։ Ես գիտեմ, որ հանրության շրջանում բացասական արձագանք է գտել այդ երևույթը, ու այդ առումով պատրաստ եմ ներողություն խնդրել նրանցից, ովքեր այս դեպքով հիասթափվել են իրավապահ համակարգի աշխատանքից»,- ընդգծեց ՔԿ նախագահը։
Հիշեցնենք, որ 16-ամյա անչափահասին ծեծած Դիլիջանի քրեականի պետ Արսեն Ղայթմազյանի նկատմամբ քրեական հետապնդում չհարուցելու որոշումն այսօր վերացվել է: Դատախազի որոշմամբ՝ Ղայթմազյանի նկատմամբ հարուցվել է հանրային քրեական հետապնդում՝ անչափահասին ֆիզիկական ուժեղ ցավ կամ հոգեկան ուժեղ տառապանք պատճառելու համար: Վարույթն իրականացնող քննիչին տրվել են քրեական վարույթ նախաձեռնելու մասին արձանագրության մեջ փոփոխություն կատարելու, ազատության մեջ գտնվող մեղադրյալին ձերբակալելու և կալանավորումը որպես խափանման միջոց ընտրելու մասին դատարան միջնորդություն ներկայացնելու հանձնարարություններ: Դատախազությունը պահանջել է քննության առարկա դարձնել բոլոր հնարավոր վարկածները, պարզել տեղի ունեցածի իրական պատճառները: «Հաղարծին» ռեստորանային և հյուրանոցային համալիրում էլ սկսվել է ուսումնասիրություն՝ անչափահասներին աշխատանքի ընդունելու օրենքով սահմանված կարգի հնարավոր խախտումները վեր հանելու և իրավական գնահատականի արժանացնելու նպատակով:
Նաև նշենք, որ երեկ Քննչական կոմիտեն հայտնել էր, որ ապրիլի 10-ին տեղի ունեցած միջադեպի վերաբերյալ հաղորդումը ստացվել է մայիսի 10-ին: Արսեն Ղայթմազյանի գործուն զղջալու հիմքով քրեական հետապնդում չէր հարուցվել:
