Ազգային ժողովի հերթական նիստին, տևական դադարից հետո, մասնակցում էին նաև ընդդիմադիր խմբակցությունները: Մինչև օրակարգի հաստատումը «Հայաստան» խմբակցությունից Աղվան Վարդանյանը հայտարարությամբ հանդես եկավ, նշեց՝ երկար ժամանակ է` բոյկոտել էին նիստերը, որովհետև փողոցում էին պայքարում: Վարդանյանի խոսքով` հիմա փողոցում դադար է, իսկ ԱԺ են եկել Հայաստանին ու Արցախին վերաբերող սեփական օրակարգով:
Այսօր նաև երեք նոր պատգամավոր երդվեց. Արթուր Վանեցյանի՝ մանդատը վայր դնելուց հետո «Պատիվ ունեմ» խմբակցությունը համալրեց Մարտուն Գրիգորյանը, Մխիթար Զաքարյանի և Արթուր Ղազինյանի հեռանալուց հետո «Հայաստան» խմբակցություն են եկել Արգիշտի Գևորգյանն ու Գառնիկ Դանիելյանը:
Հերթական նիստի օրակարգին ընդդիմությունը դեմ քվեարկեց ու լքեց դահլիճը: Կառավարող ուժի ձայներով, սակայն, օրակարգը հաստատվեց:
ԶԻՆԾԱՌԱՅՈՂՆԵՐԻ ԱՏԵՍՏԱՎՈՐՄԱՆ ԿԱՐԳԻ ՆԱԽԱԳԻԾԸ
Օրենսդրական փոփոխությունների երկու խոշոր փաթեթով էր խորհրդարան եկել պաշտպանական գերատեսչությունը: Նախարար Սուրեն Պապիկյանը ատեստավորումը բանակում տեղայնացնելու նախագծից սկսեց: Առաջարկում են շարքային, ենթասպայական ու սպայական և բարձրագույն կազմի զինծառայողների համար հավելավճար սահմանել և դա կատարել ատեստավորում անցնելու միջոցով:
Սուրեն Պապիկյան (ՀՀ պաշտպանության նախարար) - Նախագծերի համաձայն` հավելավճար հաշվարկելու նպատակով անցկացվող ատեստավորմանը մարտական խնդիրների իրականացման, պլանավորման կամ վերահսկման գործառույթներ ունեցող պաշտոններ ներկայում զբաղեցնող զինծառայողները մասնակցելու են կամավոր, իսկ զինվորական պաշտոնների յուրաքանչյուր խմբում նախատեսված և համապատասխան գործառույթներ ունեցող պաշտոն առաջին անգամ զբաղեցնող կամ պահեստազորից կրկին պայմանագրային զինծառայության ընդունվող զինծառայողները ենթակա են լինելու ատեստավորման պաշտոնը զբաղեցնելու օրվանից ոչ շուտ, քան 3 ամիս հետո, և ոչ ուշ, քան 4-րդ ամիսը լրանալու օրը:
Եթե ոմանց չի հաջողվում անցնել ատեստավորումը, կարող են տարվա ընթացքում ևս 2 անգամ փորձել: Զինծառայողների մի մասը՝ պարտադիր, մի մասը՝ կամավոր ատեստավորում պետք է անցնեն 3 տարին մեկ, մանրամասնեց նախարար Պապիկյանը:
Սուրեն Պապիկյան - Խոսքը վերաբերելու է մարտական ծառայության շարքային պայմանագրայինի համար 316 հազար մաքուր աշխատավարձին՝ բոլոր հարկերը հանած, միջինը կարող է տատանվել մինչև 325, իջնել 310 հազար դրամ` կապված պաշտոնի և ստաժի հետ: Եթե մարտական հերթապահություն է անցնում դրան զուգահեռ, ավելանում է ևս 80 հազար դրամ:
ՄԵԿՆԱՐԿՈՒՄ Է «ՊԱՇՏՊԱՆ ՀԱՅՐԵՆՅԱՑ» ԾՐԱԳԻՐԸ
ՊՆ-ի բերած մյուս նախագիծը. մեկնարկում է «Պաշտպան հայրենյաց» ծրագիրը: Ժամկետային զինծառայողը կկարողանա ուսումնական զորամասում 6 ամիս ծառայելուց հետո 5 տարով պայմանագիր կնքել, ատեստավորում անցնել և որպես պայմանագրային ստանալ բարձր աշխատավարձ: Երբ պայմանագիրը լրանա, կամ զինծառայողը, առողջական վիճակից ելնելով, ժամանակից շուտ ծառայությունը դադարեցնի, միանվագ 5 մլն դրամ պատվովճար կստանա:
Սուրեն Պապիկյան - Միաժամանակ, պայմանագրի գործողության ընթացքում պայմանագրային զինվորական ծառայությունից հրաժարվելու դեպքում պայմանագրային զինծառայության ժամկետը չի հաշվարկվելու պարտադիր զինվորական ծառայության ժամկետում, և զինծառայողն ուղարկվելու է շարունակելու պարտադիր զինվորական ծառայության չծառայած մասը:
Այս ծրագրի գործարկումից հետո կդադարեցվի «Ես եմ» ծրագիրը, որի շահառուները հիմա ընդամենը 2-ն են: Ծրագրով նախատեսված 5 մլն դրամ պատվովճարը կստանան նաև «Ես եմ» ծրագրի մասնակիցները, այդ թվում` 2020 թվականի պատերազմի ընթացքում զոհված 45 զինծառայողների ընտանիքները:
Արմեն Խաչատրյան (ՀՀ ԱԺ պաշտպանության և անվտանգության հարցերի մշտական հանձնաժողովի նախագահի տեղակալ) - Սրանով մենք, փատորեն, հիմնաքարն ենք դնում պրոֆեսիոնալ բանակի ստեղծման:
Սուրեն Պապիկյան - Շատ կարևոր է, որ մենք սրան նայենք որպես ՀՀ շուրջ խաղաղությունը ամրապնդելու կարևոր գործիք: ՀՀ-ն որևէ երկրի հետ պատերազմելու ցանկություն չունի, որևէ ագրեսիվ նկրտում չունի: ՀՀ քաղաքացին իր երկրի սահմանները պաշտպանելու նպատակով զինվորագրվում է, և մեր բանակը դառնում է պրոֆեսիոնալ բանակ:
ՍՈՑԻԱԼԱԿԱՆ ՆՊԱՍՏՆԵՐԻ` ԱՆԿԱՆԽԻԿ ԵՂԱՆԱԿՈՎ ՏՐԱՄԱԴՐՄԱՆ ՀԱՐՑԸ
ԱԺ-ում քննարկվեց 2023 թվականի հունվարի 1-ից քաղաքներում և 1000-ից ավելի բնակչություն ունեցող գյուղական բնակավայրերում, իսկ 2024 թվականից՝ մինչև 1000 բնակիչ ունեցող գյուղերում անկանխիկ եղանակով ընտանեկան, սոցիալական նպաստների ու հրատապ օգնության գումարի տրամադրման հարցը:
Դավիթ Խաչատրյան (աշխատանքի և սոցիալական հարցերի նախարարի տեղակալ) - Այսպիսով, ազգային օպերատորը անկանխիկ եղանակով կենսաթոշակ, նպաստ կարող է վճարել մինչև 2023 թվականի փետրվարի 1-ը: Անհրաժեշտություն է առաջացել կատարել համապատասխան փոփոխություններ նշված օրենքներով, որոնց ընդունման դեպքում կենսաթոշակը, նպաստը անկանխիկ եղանակով 2023 թվականի փետրվարի 1-ից վճարվելու են միայն բանկերի միջոցով:
Փոխնախարարը կենսաթոշակների և նպաստների անկանխիկ գործառնությունների վերջին տվյալները ներկայացրեց: Հոկտեմբերին ծավալը 1.8 մլրդ դրամի է հասել, այսինքն, ըստ գործող կարգի, թոշակառուները անկանխիկ շրջանառության 10 տոկոսը՝ 180 մլն դրամ, հետ կստանան:
ԱՌԱՋԱՐԿՎՈՒՄ Է ՆՎԱԶԱԳՈՒՅՆ ԱՇԽԱՏԱՎԱՐՁԸ ԴԱՐՁՆԵԼ 75000 ԴՐԱՄ
Քննարկված հաջորդ նախագիծն առաջարկում է 2023-ի հունվարի 1-ից նվազագույն աշխատավարձը 68 հազարից դարձնել 75 հազար դրամ:
Խորհրդարանի քննարկմանը ներկայացվեց նաև կրթության մինչև 2030 թ. զարգացման պետական ծրագիրը հաստատելու նախագիծը՝ երկրորդ ընթերցման համար: Գլխադասային հանձնաժողովի նախագահը հիշեցրեց՝ հաջորդ տարվա ԿԳՄՍՆ ոլորտին հատկացվող բյուջեն 15 տոկոսով ավելացել, հասել է 250 մլրդ դրամի: Մեկ այլ նախագծով էլ առաջարկվում է ատեստավորում սահմանել նաև նախնական ու միջին մասնագիտական ուսումնական հաստատություններում, քանի որ այդ դասախոսական խմբի աշխատավարձը հանրակրթականի համեմատ ցածր է: Խորհրդարանը օրակարգային մյուս հարցերը, այդ թվում` 2023-ի բյուջեի նախագիծը, կքննարկի նիստի առաջիկա օրերին:
