ՌԴ նախագահ Վլադիմիր Պուտինը Հայաստանի վարչապետ Նիկոլ Փաշինյանին և Ադրբեջանի նախագահ Իլհամ Ալիևին հրավիրել է Ռուսաստան` եռակողմ հանդիպման մասնակցելու՝ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան: Նա տեղեկացրել է, որ գագաթնաժողովի ընթացքում նախատեսվում է քննարկել եռակողմ և երկկողմ հարցերի ողջ շրջանակը: ԱԳՆ ներկայացուցիչը նաև հայտնել է, որ Մոսկվային «անհանգստացնում են մտահոգիչ միտումները, որոնք թափ են առնում Հարավային Կովկասում, ուր Արևմուտքն ակնհայտորեն փորձում է տեղափոխել Ուկրաինայում մշակված առճակատման սխեմաները»: Զախարովան ընդգծել է, որ տեսնում են, թե ինչպիսի աննախադեպ արտաքին ճնշման է ենթարկվում եղբայրական Հայաստանը։ Նրա խոսքով՝ քայլեր են ձեռնարկվում երկու երկրների և ժողովուրդների միջև բազմադարյա կապերին վնաս հասցնելու և տարածաշրջանում Ռուսաստանի քաղաքականությունը վարկաբեկելու ուղղությամբ։
ՌԴ ԱԳՆ պաշտոնական ներկայացուցիչը վստահություն է հայտնել, թե արտաքին ուժերի կողմից Մոսկվային և Երևանին գժտեցնելու փորձերը հաջողություն չեն ունենա։ «Մենք վճռական ենք՝ ամրապնդելու Հայաստանի հետ ռազմավարական դաշինքը և բազմակողմ համագործակցությունը, ինչը թույլ կտա մեզ համատեղ հաղթահարել առկա մարտահրավերները»,- ընդգծել է Զախարովան: ՌԴ նախագահի խոսնակ Դմիտրի Պեսկովն էլ հայտնել է, որ ՌԴ-Հայաստան-Ադրբեջան գագաթնաժողով է նախապատրաստվում, և դրա անցկացման օրվա ու վայրի մասին Կրեմլը լրացուցիչ կտեղեկացնի:
ԱՄՆ-Ը ՇԱՀԱԳՐԳՌՎԱԾ Է ՀԱՐԱՎԱՅԻՆ ԿՈՎԿԱՍԻ ԿԱՅՈՒՆՈՒԹՅԱՄԲ. ՓՐԱՅՍ
Ամերիկայի Միացյալ Նահանգները շահագրգռված է Հարավային Կովկասի կայունությամբ՝ հայտարարել է ԱՄՆ պետական դեպարտամենտի մամուլի քարտուղար Նեդ Փրայսը: «Իհարկե, մենք հստակ ներկայացրել ենք մեր շահագրգռվածությունը և ցանկանում ենք տեսնել կայուն Հարավային Կովկաս, տարածաշրջան, որտեղ մենք կարող ենք աշխատել և՛ Հայաստանի, և՛ Ադրբեջանի հետ՝ այդ երկու երկրների միջև լարվածության, ինչպես նաև ցանկացած հնարավոր լայնամասշտաբ լարվածության ապաէսկալացիայի ուղղությամբ»,- ասել է Փրայսը: ԱՄՆ պետական դեպարտամենտի մամուլի քարտուղարը չի մեկնաբանել լրագրողի հարցը Ադրբեջանի հետ սահմանին Իրանի իսլամական հեղափոխության պահապանների կորպուսի անցկացրած զորավարժությունների վերաբերյալ:
ԶՈՒՐԱԲԻՇՎԻԼԻՆ ՏԵՂՅԱԿ ՉԻ ԵՂԵԼ ԱԼԻԵՎԻ՝ ՎՐԱՍՏԱՆ ԱՅՑԻ ՄԱՍԻՆ
Վրաստանի նախագահի աշխատակազմը հայտարարություն է տարածել Ադրբեջանի նախագահ Իլհամ Ալիևի՝ Վրաստան կատարած այցի վերաբերյալ և նշել, որ Սալոմե Զուրաբիշվիլին տեղեկացված չի եղել Իլհամ Ալիևի՝ Վրաստան կատարած աշխատանքային այցի մասին։ Վրաստանի նախագահը պատրաստակամություն ու ցանկություն է հայտնել պաշտոնական այցով հյուրընկալելու Ադրբեջանի նախագահին:
Ադրբեջանի նախագահը վերջին 7 տարվա մեջ առաջին անգամ աշխատանքային այցով երեկ մեկնել է Վրաստան, որտեղ հանդիպել է վարչապետ Իրակլի Ղարիբաշվիլիի հետ:
ՌԻՇԻ ՍՈՒՆԱԿԸ ԿՍՏԱՆՁՆԻ ՄԵԾ ԲՐԻՏԱՆԻԱՅԻ ՎԱՐՉԱՊԵՏԻ ՊԱՇՏՈՆԸ
Մեծ Բրիտանիայի իշխող՝ Պահպանողական կուսակցության նոր առաջնորդ Ռիշի Սունակը վարչապետի պաշտոնը կստանձնի այսօր՝ Չարլզ III թագավորի հետ հանդիպումից հետո։ Հեռացած վարչապետ Լիզ Թրասը կաբինետի անդամների հետ հանդիպումից հետո հանդես կգա հրաժեշտի ելույթով, որից հետո Չարլզ 3-ը կընդունի Թրասի հրաժարականը։ Լիզ Թրասի հետ հանդիպումից հետո Չարլզ 3-ը կընդունի Ռիշի Սունակին, և կառաջարկի նրան ձևավորել կառավարություն: Նախատեսվում է նաև, որ այսօր կառավարության նոր ղեկավարը ուղերձով կդիմի բրտանացիներին:
ԱՄՆ նախագահ Ջո Բայդենը Ռիշի Սունակի ընտրությունը որպես Մեծ Բրիտանիայի առաջին ոչ սպիտակամորթ վարչապետ անվանել է «բեկումնային», իսկ Սպիտակ տնից հայտարարել են, որ մոտ ապագայում Բայդենը կգնա շնորհավորելու նոր առաջնորդին: «Սա տպավորիչ, բեկումնային և կարևոր փուլ է»,- ասել է Բայդենը:
ԱԲԴՈԼԼԱՀԻԱՆԸ ՀԵՐՔԵԼ Է ՌԴ-ԻՆ ԱԹՍ-ՆԵՐ ՄԱՏԱԿԱՐԱՐԵԼՈՒ ԼՈՒՐԵՐԸ
Իրանի արտաքին գործերի նախարարը կրկին հերքել է Իրանի կողմից անօդաչու թռչող սարքերի մատակարարումը Ռուսաստանին Ուկրաինայի պատերազմում օգտագործելու համար՝ պնդելով, որ Թեհրանը պատրաստ է քննարկել այդ հարցը Ուկրաինայի հետ հանդիպման ժամանակ: «Մենք Ռուսաստանին չենք տվել և չենք էլ տա որևէ զենք կամ անօդաչու թռչող սարք՝ Ուկրաինայի դեմ օգտագործելու համար»,- ասել է Ամիր Աբդոլլահիանը՝ հավելելով, որ Ռուսաստանի հետ ծավալուն համագործակցություն ունեն, այդ թվում՝ պաշտպանության ոլորտում: Աբդոլլահիանը նշել է, որ ԵՄ արտաքին քաղաքականության պատասխանատու Ժոզեպ Բորելի հետ հեռախոսազրույցում հայտնել է Իրանի պատրաստակամությունը՝ ստեղծելու իրանցի և ուկրաինացի ռազմական փորձագետներից կազմված համատեղ հետազոտական խումբ՝ հետաքննելու ուկրաինական պատերազմում իրանական անօդաչու թռչող սարքերի օգտագործման պնդումը։
