ՀԱՅ ԳԵՐԻՆԵՐԻ ՄԱՀԱՊԱՏԻԺԸ՝ ՊԱՏԵՐԱԶՄԱԿԱՆ ՀԱՆՑԱԳՈՐԾՈՒԹՅՈՒՆ. HRW
Հայ գերիների մահապատիժն ադրբեջանական ուժերի կողմից պատերազմական հանցագործություն է, որի համար մեղավորները պետք է պատասխանատվության ենթարկվեն, հայտարարել է Human Rights Watch իրավապաշտպան կազմակերպությունը։ Human Rights Watch-ի մասնագետները վերլուծել են հոկտեմբերի սկզբին սոցցանցերում հրապարակված տեսանյութը, որտեղ երևում է առնվազն յոթ հայ ռազմագերու արտադատական մահապատիժը ադրբեջանական ուժերի կողմից: Հոդվածում նշվում է, որ Ադրբեջանի իշխանությունները պարտավոր են ապահովել, որ հետաքննությունն արդյունավետ անցնի և հանցագործության հեղինակ զինվորականները պատասխանատվության ենթարկվեն: Human Rights Watch-ի Եվրոպայի և Կենտրոնական Ասիայի տնօրեն Հյու Ուիլյամսոնը հայտարարել է, որ հայ զինվորների գերեվարողները պարտավոր էին նրանց հետ մարդասիրաբար վարվել։
ԵՄ-Ն ԱԴՐԲԵՋԱՆԱԿԱՆ ՈՒԺԵՐԻՆ ԿՈՉ Է ԱՐԵԼ ՎԵՐԱԴԱՌՆԱԼ ԻՐԵՆՑ ԴԻՐՔԵՐ
Եվրոպական միությունը ամենաբարձր մակարդակներում կշարունակի իր ներգրավվածությունը Հայաստանի և Ադրբեջանի միջև հակամարտության համապարփակ կարգավորման հասնելու համար, վստահեցրել է ԵՄ արտաքին հարաբերությունների գծով բարձր հանձնակատար Ժոզեպ Բորելը՝ պատասխանելով ԵԽ պատգամավորների նամակին: Նա ընդգծել է, որ Եվրոպական խորհրդի նախագահը շարունակում է սերտ կապի մեջ լինել Հայաստանի և Ադրբեջանի ղեկավարների հետ, և ինքն էլ կապ է հաստատել երկու երկրի արտգործնախարարների հետ, հանձնարարել է Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցչին անհապաղ խորհրդակցություններ անցկացնել Երևանում և Բաքվում:
«ԵՄ-ն երկու կողմերին հորդորել է խստորեն պահպանել հրադադարը և ադրբեջանական ուժերին կոչ է արել անհապաղ վերադառնալ իրենց դիրքերը՝ Հայաստանի և Ադրբեջանի նախկին Խորհրդային Սոցիալիստական Հանրապետությունների վերջին վարչական սահմաններին համապատասխան: ԵՄ-ն կողմերին խրախուսում է առաջընթաց գրանցել սահմանազատման և սահմանագծման հարցում, որը կարևոր է հետագա բախումների ռիսկը նվազեցնելու առումով»,- նշել է ԵՄ արտաքին հարաբերությունների գծով բարձր հանձնակատարը:
Նա նաև նշել է, որ այս տարի ավելի վաղ կայացած նախնական հանդիպումներից հետո սահմանային հարցերով հանձնաժողովների հաջորդ նիստը պետք է տեղի ունենա Բրյուսելում նոյեմբերին։
ԱԼԻԵՎԸ ԿԵՂԾ ՈՒ ՍԱԴՐԻՉ Է ՈՐԱԿԵԼ ՄԱԿՐՈՆԻ ՀԱՅՏԱՐԱՐՈՒԹՅՈՒՆՆԵՐԸ
Թեև ԵԱՀԿ Մինսկի խումբը կորցրել է միջնորդի իր դերը, Ադրբեջանը համաձայնել է Պրահայում քառակողմ հանդիպման՝ Ֆրանսիայի նախագահ Մակրոնի մասնակցությամբ, հայտարարել է Ադրբեջանի նախագահ Իլհամ Ալիևն Անկախ Պետությունների Համագործակցության պետությունների ղեկավարների խորհրդի նիստում: Իր ելույթում նա ընդգծել է, որ Ֆրանսիայի նախագահը վիրավորական, անընդունելի, կեղծ ու սադրիչ հայտարարություններ է արել Ադրբեջանի հասցեին։
Ավելի վաղ Էմանուել Մակրոնը France 2-ին տված հարցազրույցում անդրադարձել էր 44-օրյա պատերազմին՝ շեշտելով, որ Ադրբեջանը սարսափելի պատերազմ է սանձազերծել՝ բազմաթիվ զոհերով, սարսափելի տեսարաններով:
Ալիևը պնդել է, թե Մակրոնը մոլորության մեջ է գցել ֆրանսիական և համաշխարհային հանրությանը, քանի որ Ադրբեջանը, Ալիևի խոսքով, պատերազմ է մղել իր միջազգայնորեն ճանաչված տարածքում։ Ադրբեջանի նախագահը մեղադրել է նաև Ֆրանսիայի արտգործնախարարությանը. Ֆրանսիայի Սենատին հակաադրբեջանական իբր թե կեղծ հայտարարություններ տարածելու համար:
ԱԳՆ ԽՈՍՆԱԿՆ ԱՆԴՐԱԴԱՐՁԵԼ Է ՉԱՎՈՒՇՕՂԼՈՒԻ ՀԱՅՏԱՐԱՐՈՒԹՅԱՆԸ
Պրահայում տեղի ունեցած հանդիպման ժամանակ Հայաստան-Թուրքիա հարաբերությունների կարգավորման հարցով հատուկ ներկայացուցիչների՝ Թուրքիայում կամ Հայաստանում հանդիպելու վերաբերյալ որևէ պայմանավորվածություն ձեռք չի բերվել: «Արմենպրես»-ի հարցմանն ի պատասխան՝ այս մասին ասել է ՀՀ ԱԳՆ մամուլի խոսնակ Վահան Հունանյանը՝ անդրադառնալով Թուրքիայի արտաքին գործերի նախարար Մևլութ Չավուշօղլուի այն հայտարարությանը, թե հատուկ ներկայացուցիչների հանդիպումներն այսուհետ չեն անցկացվի երրորդ երկրներում:
Հունանյանը մանրամասնել է, որ հնչել են տարբեր առաջարկներ, այդ թվում` սահմանը դիվանագիտական անձնագիր կրող անձանց համար բացելու վերաբերյալ։ Պայմանավորվածություն է ձեռք բերվել աշխատանքային կարգով քննարկել այդ առաջարկները։
Ավելի վաղ` Թուրքիայի և Կատարի ԱԳ նախարարների հանդիպմանը հաջորդած համատեղ մամուլի ասուլիսի ժամանակ, Թուրքիայի արտգործնախարար Մևլութ Չավուշօղլուն անդրադարձել է նաև Հայաստանի հետ հարաբերությունների կարգավորման գործընթացին: Լրագրողի հարցին՝ «ապագայում կարո՞ղ ենք սպասել պայմանագրի», Թուրքիայի արտգործնախարարը պատասխանել է, որ այս պահին չկա պայմանագրի նախագիծ, որը պետք է ստորագրվի Հայաստանի հետ:
«Չենք բանակցում որևէ պայմանագրի շուրջ»,- շեշտել է Չավուշօղլուն` մանրամասնելով, որ այժմ քննարկվում են հարաբերությունները կարգավորմանը և փոխվստահության ձևավորմանն ուղղված քայլեր:
Անդրադառնալով Հայաստանի և Ադրբեջանի հարաբերություններին՝ Չավուշօղլուն շեշել է, որ Հարավային Կովկասում կայունության և երկարաժամկետ խաղաղության հիմնական խնդիրը Հայաստանի ու Ադրբեջանի միջև համապարփակ խաղաղության պայմանագրի բացակայությունն է:
«Այդ ուղղությամբ էլ բանակցությունները շարունակվում են»,- նշել է արտգործնախարարն ու եզրափակել, որ Հայաստանի վարչապետի և Թուրքիայի նախագահի հանդիպումը բավական արդյունավետ է եղել:
ՌԴ-ՈՒՄ ՄԱՍՆԱԿԻ ՄՈԲԻԼԻԶԱՑԻԱՆ ԿԱՎԱՐՏՎԻ ԵՐԿՈՒ ՇԱԲԱԹԻՑ. ՊՈՒՏԻՆ
ՆԱՏՕ-ի զորքերի և ռուսական բանակի միջև հնարավոր ուղիղ բախումը շատ վտանգավոր է, այն կհանգեցնի համաշխարհային աղետի, հայտարարել է ՌԴ նախագահը Ղազախստան կատարած այցի արդյունքներով մամուլի ասուլիսի ժամանակ: Վլադիմիր Պուտինը նաև նշել է, որ Ռուսաստանում հայտարարված մասնակի մոբիլիզացիան կավարտվի երկու շաբաթից. պաշտպանության նախարարությունից լրացուցիչ զորահավաքային միջոցառումների առաջարկ չի ստացել, ինչն էլ նշանակում է, որ այն կավարտվի, շեշտել է Կրեմլի առաջնորդը:
Խոսելով Ուկրաինայի հետ բանակցությունների մասին՝ Վլադիմիր Պուտինը նշել է, որ Ռուսաստանը միշտ բաց է Ուկրաինայի հարցով բանակցությունների համար, մինչդեռ Կիևը որոշում է կայացրել արգելել Ռուասատանի հետ բանակցությունները:
ԼՈՒԿԱՇԵՆԿՈՆ՝ ՈՒԿՐԱԻՆԱՅՈՒՄ ԻՐԱՎԻՃԱԿԻ ԽԱՂԱՂ ԿԱՐԳԱՎՈՐՄԱՆ ՄԱՍԻՆ
Բելառուսի նախագահ Ալեքսանդր Լուկաշենկոն NBC-ին տրված հարցազրույցում անդրադարձել է Ուկրաինայում տիրող իրավիճակից կարգավորման խաղաղ ուղիներ փնտրելու կարևորությանը՝ նշելով, որ դա ձեռնտու է բոլոր կողմերին, այդ թվում՝ Միացյալ Նահանգներին: Լուկաշենկոն նաև նշել է, որ Պուտինն, ի տարբերություն արևմուտքի, առաջարկել է ուկրաինական կոնֆլիկտի լուծման ճանապարհներ, բայց նրան դեռ չեն ցանկանում լսել:
Բելառուսի նախագահը կոչ է արել Ռուսաստանին «անկյուն չգցել» և զգուշացրել է, որ այդ դեպքում Մոսկվան «կարող է կիրառել սպառազինության մեջ առկա բոլոր միջոցներն իր տարածքը պաշտպանելու համար»:
