Հանցագործության, իրավախախտումների դեմ պայքարը չունի քաղաքական պատասխանատու: Մենք առողջապահության բնագավառում ունենք քաղաքական պատասխանատու՝ ի դեմս առողջապահության նախարարի, տնտեսության բնագավառում ունենք, ՊՆ բնագավառում ունեք, իսկ հանցավորության դեմ պայքարը, երկրի ներքին անվտանգությունը չունի քաղաքական պատասխանատու: Մենք չպետք է ակնկալեինք, որ այս ոլորտը պիտի նորմալ զարգացում ապրեր այս իրավիճակում: Մեզ անհրաժեշտ է նախարարություն ստեղծելն ու նախարար ունենալը՝ «Ներքին գործերի նախարարության ստեղծման գործընթացի վերաբերյալ» թեմայով խորհրդարանական լսումների ժամանակ իր ելույթում ասել է Պաշտպանության և անվտանգության հարցերի հանձնաժողովի փոխնախագահ Արմեն Խաչատրյանը:
Նա ընդգծել է, որ կարևոր է՝ ոստիկանությունը ունենա քննչական մարմին, որ Քննչական կոմիտեն լրացուցիչ չծանրաբեռնվի:
Ելույթ ունեցողները դրական են գնահատել Ներքին գործերի նախարարություն ստեղծելու նախաձեռնությունը, ներկայացրել առաջարկներ և դիտողություններ:
ԵԱՀԿ փորձագետ Լաուրի Թաբուրը, իր ելույթում ներկայացնելով Էստոնիայի փորձը, անդրադարձել է իրավապահ մարմինների քաղաքացիական վերահսկողության և, ընդհանուր առմամբ, հանրային անվտանգության հարցերին: Կարևորելով ոստիկանության համակարգում իրականացվող բարեփոխումները՝ Լաուրի Թաբուրը գնահատանքով է խոսել ոստիկանական ծառայության աշխատանքի մասին: Նա շեշտել է համակարգում թվայնացման և համապատասխան կադրերով ապահովելու հարցերը:
Ամփոփիչ ելույթում ՀՀ արդարադատության նախարարի տեղակալ Արփինե Սարգսյանը արդյունավետ և կառուցողական է գնահատել խորհրդարանական լսումներում կայացած քննարկումները:
Նրա խոսքով՝ քննարկումները դեռևս շարունակվում են, 10-օրյա ժամկետում կլրամշակվի փաթեթը: Ընդգծելով, որ ՆԳՆ-ի ձևավորման շրջանակում կատարվել է ծավալուն աշխատանք, Արփինե Սարգսյանը նշել է, որ դեռևս շատ աշխատանքներ պետք է իրականացվեն գործընթացը տրամաբանական ավարտին հասցնելու համար:
Ներքին գործերի նախարարություն ստեղծելու վերաբերյալ Կառավարության օրենսդրական նախաձեռնությունը խորհրդարանի քննարկմանը կներկայացվի սեպտեմբերին:
