Նախկին գլխավոր դատախազ, Քննչական կոմիտեի նախկին նախագահ Աղվան Հովսեփյանն արդեն մի քանի շաբաթ է՝ «Միքայելյան» վիրաբուժական ինստիտուտում է՝ հետվիրահատական փուլում: Նրա պաշտպանները Երևանի ընդհանուր իրավասության դատարան հրատապ միջնորդություն ներկայացրին Հովսեփյանի առողջական վիճակով պայմանավորված խափանման միջոցը փոխելու վերաբերյալ:
Էրիկ Ալեքսանյան (Աղվան Հովսեփյանի պաշտպան) - Դատավարության ներկա փուլում առկա են բոլոր նախադրյալները Աղվան հովսեփյանի նկատմամբ ընտրված խափանման միջոց կալանավորումը գրավով փոխարինելու համար:
Էրիկ Ալեքսանյանը հրապարակեց Աղվան Հովսեփյանի առողջական վիճակին վերաբերող բժշկական փաստաթղթեր, նշեց՝ Հովսեփյանի մոտ ախտորոշվել է շաքարային դիաբետի 2-րդ տիպ, ինչն ըստ պաշտպանական կողմի՝ անհամատեղելի է դարձնում Աղվան Հովսեփյանի կալանքի տակ գտնվելը։ Հավելեց՝ կալանավայրում գտնվելու ընթացքում իր պաշտպանյալի առողջական վիճակը վատթարացել է:
Էրիկ Ալեքսանյան - Աղվան Հովսեփյանի նկատմամբ պատշաճ և արդյունավետ բժշկական օգնություն և սպասարկում իրականացնելը կալանավորման պայմաններում հնարավոր չէ:
Մյուս նոր հանգամանքն ըստ պաշտպանի այն է, որ գործը գտնվում է դատաքննության փուլում, հետևաբար դատարանը չունի կաշկանդվածություն՝ գործի քննությանը խոչընդոտելու ռիսկի տեսանկյունից: Ըստ նրա՝ առկա հիվանդությունների պայմաններում ազատ չարձակելը կդիտվի խոշտանգում։ Եզրափակելով՝ Ալեքսանյանը միջնորդեց Աղվան Հովսեփյանի նկատմամբ կիրառել գրավ՝ գրավի չափը թողնելով դատարանի հայեցողությանը, միևնույն ժամանակ արձանագրելով, որ պատրաստ են որպես գրավ վճարել 80 մլն դրամից սկսած։ Մեղադրող կողմը, սակայն, առարկեց միջնորդության դեմ՝ նշելով, որ առկա չէ բժշկական հանձնաժողովի եզրակացություն, որը կարող էր ընտրված կալանավորումը վերացնելու կամ փոխելու հիմք հանդիսանալ:
Գուրգեն Սաֆարյան (մեղադրող դատախազ) - Առկա չէ նաև կալանքի տակ գտնվելու պայմաններում Աղվան Հովսեփյանի ֆիզիկական առողջությունը պատշաճ պահպանելու խոչընդոտների առկայության, ինչպես նաև պատշաճ բժշկական օգտնություն և սպասարկում չտրամադրելու վերաբերյալ որևէ փաստական տվյալ:
Ավելին՝ առկա են հակառակի մասին վկայող փաստական տվյալներ, մասնավորապես այն, որ Հովսեփյանին անհրաժեշտ բժշկական օգնություն տրամադրվել և տրամադրվում է՝ նշեց դատախազը՝ հավելելով՝ միջնորդության լուծումը պետք է հետաձգել մինչև համապատասխան փորձաքննության եզրակացությունը։ Դատարանը խորհրդակցական սենյակից վերադառնալով որոշեց մերժել պաշտպանական կողմի միջնորդությունը՝ անհիմն լինելու պատճառաբանությամբ:
Հովսեփյանը, հիշեցնեմ, մեղադրվում է 190 մլն դրամ կաշառք ստանալու, խարդախության եղանակով 800 մլն դրամ գույքի հափշտակություն կատարելուն դրդելու, ինչպես նաև մոտ 1 միլիարդ դրամի գույքի փողերի լվացման համար:
Հեղինակ՝ Տաթև Խաչատրյան