Նոր տեխնոլոգիաների ոլորտը ռազմավարական նշանակություն ունի Հայաստանի համար՝ Բիշքեկում անցկացվող Եվրասիական տնտեսական ֆորումի ժամանակ տեսակապով նշել է Հայաստանի վարչապետ Նիկոլ Փաշինյանը: Միջոցառմանը հեռավար մասնակցել են նաև Ռուսաստանի նախագահը, Բելառուսի վարչապետը, առկա ձևաչափով՝ Ղրղզստանի ու Ղազախստանի նախագահները, Եվրասիական տնտեսական հանձնաժողովի նախագահը: Վարչապետը հույս է հայտնել, որ միջոցառման հաջող անցկացումն ու դրա շրջանակում ձեռք բերվելիք պայմանավորվածությունները կնպաստեն եվրասիական ինտեգրացիայի հետագա առաջընթացին:
Նիկոլ Փաշինյան (ՀՀ վարչապետ) - Ինչ վերաբերում է ծառայությունների ոլորտին, ապա իսկապես ծառայություններն այսօր դառնում են մեր Միության երկրների տնտեսական համագործակցության զարգացման աճի նոր կետերի գեներատոր։ Այս ոլորտի դերը տնտեսության մեջ անընդհատ աճում է, և ծառայությունների առանձին տեսակներ, որպես արտադրության գործոններ, էական ազդեցություն ունեն ապրանքների, արդյունաբերության ճյուղերի և տնտեսությունների մրցունակության վրա։ Այս առումով` եվրասիական ինտեգրման ամենակարևոր խնդիրը ծառայությունների ազատ տեղաշարժի ապահովումն է։ Այս խնդիրը լուծվում է, այդ թվում՝ ոլորտի ազատականացման, ծառայությունների միասնական շուկայի ձևավորման և գործունեության միջոցով, որն իր հերթին ընդլայնում է բիզնեսի ակտիվացման հնարավորությունները։ Կարելի է ասել, որ ծառայությունների ազատ տեղաշարժի մակարդակն ինտեգրման յուրատեսակ ցուցիչ է։
Վարչապետի խոսքով՝ առանձնահատուկ ուշադրության է արժանի հեռահաղորդակցության և տեղեկատվական տեխնոլոգիաների զարգացումը՝ դրանց հավասար հասանելիության երաշխավորմամբ: Միության թվային օրակարգն ամբողջությամբ իրականացնելու համար կարևոր է անդամ պետությունների տեղեկատվական տեխնոլոգիական համայնքների ջանքերի համախմբումը՝ ընդգծել է Փաշինյանը:
Նիկոլ Փաշինյան - Տեղեկատվական և թվային տեխնոլոգիաների դարաշրջանը բարձրացնում է երկրների միջազգային մրցունակությունը։ Եվ դա վերաբերում է հատկապես Հայաստանի նման փոքր երկրներին, որոնք աշխարհագրական ու աշխարհաքաղաքական սահմանափակումների պատճառով սահմանափակ ազդեցություն ունեն համաշխարհային գործընթացների վրա։ Տեղեկատվական տեխնոլոգիաները հավասար պայմաններ են ապահովում բոլոր խաղացողների համար՝ անկախ նրանց դիրքից կամ հնարավորություններից: Այդ իսկ պատճառով ՀՀ կառավարությունը ՏՏ ոլորտը համարում է տնտեսական զարգացման հիմքերից մեկը։ Մենք նպատակադրված ենք ընդլայնելու մեր հնարավորությունները, որպեսզի դառնանք մի երկիր, որն արտադրում և մատուցում է բարձրորակ, բանականության վրա հիմնված ապրանքներ և ծառայություններ՝ իր հիմքում ունենալով ստեղծագործ մարդկային կապիտալը:
Ընդհանուր առմամբ, նոր տեխնոլոգիաները տնտեսության մեջ բեկում մտցնելու հնարավորություն են, մարտահրավեր նրանց համար, ովքեր ցանկանում են հետ չմնալ մարդկության առաջընթացից՝ նշել է վարչապետը:
Ի պատասխան ֆորումը վարող Ալեքսանդր Շոխինի հարցի՝ վարչապետ Փաշինյանը նշել է, որ կառավարությունը փորձում է անել հնարավորը, որպեսզի Հայաստանը դարձնի գրավիչ՝ հատկապես տեղեկատվական տեխնոլոգիաների ոլորտի և ընդհանրապես` բոլոր բնագավառներում ներդրումների համար:
Նիկոլ Փաշինյան - Մենք այժմ նկատում ենք, որ առկա է դեպի Հայաստան ՏՏ մասնագետների որոշակի հոսք, մենք հասկանում ենք կոնտեքստը և փորձում ենք անել այնպես՝ ստեղծելու պայմաններ, որպեսզի ԵԱՏՄ-ի շրջանակում այդ շարժերը ծառայեն հենց միության ինտեգրացիոն գործընթացների հետագա զարգացմանը, քանի որ այն ընդհանուր շուկա է, ընդհանուր տարածք: Ընդհանուր առմամբ, կարելի ասել՝ այդպիսով ցույց ենք տալիս, որ ԵԱՏՄ-ի հիմնական նպատակներից մեկին հասել ենք, որովհետև աշխատուժի, ապրանքների և ծառայությունների ազատ տեղաշարժն այժմ գործնականում կյանքի ենք կոչում:
Ֆորումին տեսաուղերձով հանդես է եկել նաև փոխվարչապետ Մհեր Գրիգորյանը, անդրադարձել թվային փոխակերպման խնդիրներին և ներկայացրել Հայաստանի ռազմավարական մոտեցումներն այդ ուղղությամբ: Մհեր Գրիգորյանն ընդգծել է թվայնացման կարևորությունը պետական կառավարման բարեփոխումների շրջանակներում և վերահաստատել, որ Հայաստանը պատրաստ է և բաց` մասնակցելու համատեղ թվային նախագծերին` ինչպես ԵԱՏՄ անդամ երկրների, այնպես էլ Եվրասիական տնտեսական հանձնաժողովի հետ:
Հեղինակ` Տաթև Խաչատրյան
