ՀՀ վարչապետ Նիկոլ Փաշինյանի Բրյուսել այցից առաջ ընդդիմության գնահատմամբ «կարևոր» հանրահավաքը եղանակային վատ պայմանների պատճառով երեկ չեղարկվել էր ու տեղափոխվել այսօր: Օրվա ընթացքում «Դիմադրություն» շարժումը ակցիաներ չիրականացրեց:
Շարժման ղեկավարներից ՀՀ ԱԺ փոխխոսնակ Իշխան Սաղաթելյանը այսօրվա ելույթում ներկայացրել է խաղաղության հասնելու՝ 4 կետից բաղկացած իրենց պատկերացումներն, ըստ որոնց` պետք է զերծ մնալ շտապողական, վտանգավոր և ճակատագրական կտրուկ քայլերից` մինչև աշխարհաքաղաքական տագնապալի իրավիճակի հարաբերական կայունացումը:
Ըստ Սաղաթելյանի` պետք է ձևավորել անվտանգային մթնոլորտ, որը կանխատեսելի ու ընկալելի կլինի ռազմավարական դաշնակցի և տարածաշրջանային ու միջազգային այլ կարևոր գործընկերների համար, ռազմական, ռազմարդյունաբերական, տեխնոլոգիական, տնտեսական ուղղություններով անհապաղ մշակել և կյանքի կոչել հեռանկարային հայեցակարգ, Սփյուռքին դարձնել մասնակից և պատասխանատու՝ համահայկական օրակարգերի, խնդիրների լուծմանը:
Ցուցարարներն այնուհետև գնացել են կառավարական առանձնատուն, Իշխան Սաղաթելյանը ուղերձ է ընթերցել` հայտարարելով, որ Նիկոլ Փաշինյանը կապ չունի Հայաստանի հետ: Իսկ Ֆրանսիայի հրապարակի ելույթում անդրադարձ է եղել նաև վարչապետի` Բրյուսել կատարելիք այցին:
Իշխան Սաղաթելյան (ՀՀ ԱԺ փոխնախագահ) - Վաղը վարչապետի աթոռը զբաղեցնող անձը մեկնում է Բրյուսել` Հայաստանի անունից բանակցություններ վարելու: Այսօր դուք մեկ անգամ ևս ձեր այս տասնյակ հազարներով ներկայությամբ ապացուցեցիք, որ վարչապետի աթոռը զբաղեցնող անձը չունի որևէ մանդատ` Հայաստանի ու հայ ժողովրդի անունից բանակցություններ վարելու: Մեկ անգամ ևս հայտարարում ենք ի լուր ամբողջ աշխարհի` Նիկոլը մանդատ չունի Հայաստանի անունից բանակցություն վարելու և իր հետ ցանկացած բանակցություն առ ոչինչ է:
Հեղինակ` Իրինա Մկրտչյան
