Այն ապրանքատեսակները, որոնք մինչև այժմ ԵԱՏՄ տեխնիկական կանոնակարգման ենթակա օբյեկտ չեն հանդիսացել և չեն վերահսկվել, այսուհետև կկանոնակարգվեն ԵԱՏՄ համապատասխան համաձայնագրով:
Ժաննա Զաքարյան (ՀՀ ԷՆ որակի ենթակառուցվածքների զարգացման վարչության պետ) - Շուկայի 85 տոկոսը կարգավորվում է, սակայն 15 տոկոսը՝ լուցկի, թղթե արտադրատեսակներ, միջադիրներ, տակդիրներ, լվացող, մաքրող միջոցներ, խեցեգործական իրեր և այլն, վերահսկողությունից դուրս են:
Որքանով է արտադրանքը համապատասխանում ԵԱՏՄ տեխնիկական կանոնակարգով սահմանված պահանջներին, անվտանգ է, թե ոչ: Ժաննա Զաքարյանի խոսքով՝ այսօր շուկայում, թեև ոչ մեծ քանակությամբ, բայց առկա են չվերահսկվող ապրանքներ: Դրանք սպառողների շահերի տեսանկյունից խնդիրներ են առաջացնում, ուստի փորձել են կարգավորել:
Համաձայնագրով չի կարգավորվում պաշտպանության և անվտանգության շահերի ապահովման համար կիրառվող և օգտագործված արտադրանքի, դեղերի, բժշկական արտադրատեսակների շրջանառությունը: Որևէ ռիսկային ապրանքախմբի հայտնվելու դեպքում կարգավորվելու է նաև հետկանչի մեխանիզմը:
Ժաննա Զաքարյան - Եթե վերահսկողության տիրույթում կա որևէ ռիսկային արտադրանք, որը սպառողների շահերի առումով ռիսկ է պարունակում, ապրանքի մասին իրազեկվելու են ԵԱՏՄ անդամ բոլոր պետությունները, և հետկանչի մեխանիզմը աշխատելու է:
Միասնական ցանկում ընդգրկված է 67 ապրանքախումբ: Համաձայնագիրն ուժի մեջ կմտնի Ազգային ժողովի հավանությանն արժանանալուց հետո միայն:
Հեղինակ՝ Վրույր Մկրտչյան
