ՍԻՐԻԱ
ՊԱԼՄԻՐԱՆ ՎԵՐԱԴԱՐՁԵԼ Է
Եթե կարոտել եք Պալմիրան, կարող եք այցելել Սիրիայի Ալ-Բաբ քաղաք, որտեղ բնակվող սիրիացին մոդելավորել է հնագույն քաղաքը: 58-ամյա Ալի Ալ-Թահան ստիպված էր լքել իր հայրենի Պալմիրա քաղաքը, երբ «Իսլամական պետության» ահաբեկիչների և Սիրիայի կառավարական ուժերի միջև մարտերի հետևանքով կորցրել էր իր 4 երեխաներին և ոտքի վնասվածք ստացել:
Տղամարդը հաստատվել է Հալեպի Ալ-Բաբ կոչվող հյուսիսային արվարձանում և իրեն նվիրել Պալմիրայի՝ 3 մետր լայնություն և 12 մետր երկարություն ունեցող մանրակերտը ստեղծելու գործին: Աշխատանքն ավարտին հասցնելու համար պահանջվել է տասն ամիս: Ինչպես հայտնի է, Պալմիրա պատմական քաղաքն ընդգրկված է ՅՈՒՆԵՍԿՕ-ի ցանկում, չնայած, որ «Իսլամական պետության» ահաբեկիչները դրա մեծ մասն ավերել են:
Քաղաքի մակետը պատրաստված է գիպսից, կարելի է հանդիպել Պալմիրայի առավել հայտնի հուշակոթողներին, օրինակ՝ Բելի տաճարին, Պալմիրայի կամարին և ամֆիթատրոնին: Քաղաքի մակետը տեղադրել են «Պալմիրայի ֆորում» կոչվող կենտրոնում: Թահան այն պատրաստել է, քանի որ մտավախություն է ունեցել, որ մարդիկ կարող են մոռանալ Պալմիրայի հետ կապված դետալները:
Լսողության և խոսքի խանգարումներ ունեցող Թահան իր կյանքը նվիրել է Պալմիրայի հնագիտական ու պատմական ուսումնասիրություններին: Նրա հայրն ու պապը եղել են հնագետ և աշխատել են Պալմիրայում: Թահան լիահույս է, որ օրերից մեկ օր կվերադառնա Պալմիրա և անձամբ կմասնակցի հայրենի քաղաքի վերականգնման աշխատանքներին:
ՊԵՐՈՒ
ԿԵՆԴԱՆԻՆԵՐԻ ՕՐՀՆՈՒԹՅԱՆ ԱՐԱՐՈՂՈՒԹՅՈՒՆ
Լիմայում ապրող կենդանասերներն իրենց չորքոտանի բարեկամների համար Սուրբ Ֆրանցիսկոսի տաճարում օրհնություն ստանալու հնարավորություն են ունեցել: Սա պատարագ է, որը հատուկ ընտանի կենդանիների համար է կազմակերպված:
Անցած տարի ամենամյա այս միջոցառումը չէր կայացել՝ կորոնավիրուսի համավարակի պատճառով: Սակայն այս տարի դիմակներ կրող տասնյակ մարդիկ են հավաքվել վանքի դիմաց՝ իրենց շների, կատուների և նույնիսկ նապաստակների հետ:
ՌԵՅՆԱԼԴՈ ԳԱՄԱՐԱ (ՔԱՀԱՆԱ) - Մենք որոշեցինք վերսկսել կենդանիների օրհնությունը: Քովիդ-19-ի համավարակի պատճառով բոլոր պատարագները, կրոնական ծեսերն ու օրհնության արարողությունները դադարեցվել էին: Ընտանի կենդանիներին օրհնելու միջոցառումը ավանդական էր մեզ մոտ, ցանկացանք անպայման վերականգնել այն:
Միջոցառումը հայտնի է «Կենդանիների օրհնության ամենամյա պատարագ» անվամբ: Այն մեծարում է կենդանիների սուրբ հովանավորին՝ Սուրբ Ֆրանցիսկոս Ասիզացուն: Չնայած ընտանի բոլոր կենդանիներն էլ կարող են մասնակցել այս արարողությանը, հիմնական հյուրերը շներն են:
ՄԱԳԱԼԻ ՌՈՋԱՍ (ՇԱՆ ՏԵՐ) - Ես շատ ոգևորված եմ, քանի որ նա իմ ընտանիքի անդամ է և օգնում է ինձ հաղթահարել համավարակը:
Սուրբ Ֆրանցիսկոսը ծնվել է Իտալիայում, 1182 թվականին և հայտնի է եղել բնության հանդեպ մեծ սիրով: Նա կարծում էր, որ տնային կենդանիները և անասունները նույնպես պետք է ստանան Աստծո օրհնությունը:
ՄԵԾ ԲՐԻՏԱՆԻԱ
ԼԵՆՈՆԻ ԲՐՈՆԶԱՁՈՒՅԼ ԱՐՁԱՆԸ
Լոնդոնի սրտում`Կառնաբի փողոցում, ցուցադրվել է աշխարհահռչակ երաժիշտ, լեգենդար «Բիթլս» խմբի անդամ Ջոն Լենոնի՝ իրական չափսերի բրոնզաձույլ արձանը: Այս տարի Լենոնը կդառնար 81 տարեկան, արձանը բացվել է երաժշտի ծննդյան տարեդարձի կապակցությամբ:
Քանդակում Լենոնը նստած է նստարանին, ձեռքերը մեկնած և գլուխը թեքված դեպի վեր: Այս արձանի անունը «Իմեջին» է, Լենոնի հայտնի ստեղծագործության համանմանությամբ:
Մարդիկ մեծ հաճույքով նստում են Լենոնի կողքին ու լուսանկարվում իրենց կուռքի հետ: Նրանց դուր է գալիս նաև պարզապես նստել նստարանին և իրենց սիրելի երաժշտի ընկերակցությամբ սուրճ վայելել: Մարդիկ վստահեցրել են, որ այս արձանից խաղաղություն է ճառագում:
Բրոնզե արձանի հեղինակը Լորենս Հոլոֆսեներն է: Նա այն քանդակել է 2009 թվականին:
ԱՄՆ
ԱՃՈՒՐԴԻ ԵՆ ՀԱՆՎԵԼ էՄԻ ՈՒԱՅՆՀԱՈՒՍԻ ԱՆՁՆԱԿԱՆ ԻՐԵՐԸ
Վաղամեռիկ երգչուհի Էմի Ուայնհաուսի ծնողներն իրենց սիրելի դստերը պատկանող ավելի քան 800 առարկա են տրամադրել աճուրդի համար: «Ջուլիենս» աճուրդի տան աշխատակից Մարտին Նոլանը պատմել է, որ ավելի քան 2 տարի աշխատել է ընտանիքի հետ՝ մեծ վաճառքը կազմակերպելու համար:
ՄԱՐՏԻՆ ՆՈԼԱՆ («ՋՈՒԼԻԵՆՍ» ԱՃՈՒՐԴԻ ՏԱՆ ԱՇԽԱՏԱԿԻՑ) - Ընտանիքը վերջապես համակերպվեց Էմիին բաց թողնելու մտքի հետ: Սա նրանց համար կատարսիսի պես մի բան էր: Սակայն սա շատ զգացմունքային պահ էր ծնողների համար. նրանք կարողացան հրաժարվել իրենց դստեր իրերից: Բայց գիտեն, որ այդ իրերը ձեռք են բերելու Էմի Ուայնհաուսի երկրպագուները, հավաքորդներն ու տարբեր թանգարաններ ամբողջ աշխարհում: Նրանք հասկանում են, որ իրենց դստեր իրերը երկրորդ կյանք են ստանալու, պահվելու, փայփայվելու և ցուցադրվելու են:
Էմի Ուայնհաուսը մահացել է 2011 թվականին՝ 27 տարեկան հասկանում, Քամդեն Թաունի իր տանը: Այն զգեստը, որ նա կրել է 2011 թվականին, Բելգրադում իր վերջին համերգի ժամանակ, գնահատված է 15-20 հազար դոլար: Մինչդեռ մյուս հագուստների մեկնարկային գինը 2-4 հազար դոլար է: Աճուրդից ստացված հասույթի մի մասը կուղղվի Էմի Ուայնհաուսի հիմնադրամին, որի նպատակն է «ոգեշնչել երեխաներին և երիտասարդներին բարձրացնել իրենց ինքնագնահատականը և կարողանալ ծաղկել»: Աճուրդը կտևի երկու օր, կանցկացվի Բևեռլի Հիլսում, առցանց և առկա տարբերակներով:
ԲՈՍՆԻԱ-ՀԵՐՑԵԳՈՎԻՆԱ
ՊՏՏՎՈՂ ՏՈՒՆԸ
Բոսնիացի ինքնուս գյուտարարը պատրաստել է իր կնոջ երազանքի կացարանը, այնպիսի տուն, որը կարող է 360 աստիճան պտտվել, որպեսզի տանը եղած ժամանակ կինը տարբեր տեսարաններ վայելի: Կարող է տեսնել ինչպես արևածագը, այնպես էլ հակառակ կողմով քայլող անցորդներին և այն էլ ընդամենը րոպեների տարբերությամբ:
72-ամյա Վոյին Կուսիչը տան հիմքում տեղադրել է 7 մետրանոց առանցք, որի շուրջն էլ պտտվում է տունը: Ընդ որում, պտտվելու արագությունն ինքն է որոշում, ցանկության դեպքում կարող է արագացնել կամ դանդաղեցնել: Տանից հնարավոր է տեսնել մոտակա անտառը, եգիպտացորենի արտը կամ գետը: Եթե ամենադանդաղ արագությունն ընտրի, ապա տունը մեկ ամբողջ պտույտ կարող է գործել 24 ժամում, իսկ ամենաարագի վրա դնելու դեպքում` 22 վայրկյանում: Տղամարդը պատմում է, որ ժամանակին բազմաթիվ շինարարների և դիզայներների հետ է խորհրդակցել, սակայն տեսնելով, որ ոչ ոք իրեն օգնել չի կարող, որոշել է անձամբ ստեղծել տան ամբողջ համակարգը: Նախագիծը կյանքի կոչելու և ավարտին հասցնելու համար պահանջվել է վեց տարի:
ՎՈՅԻՆ ԿՈՒՍԻՉ (ՊՏՏՎՈՂ ՏԱՆ ՀԵՂԻՆԱԿԸ) - Երբ կառուցում էի մեր ընտանեկան այս տունը, ննջարանն այս կողմում էր, իսկ երեխաների սենյակըч մյուս կողմում: Երբ վերջացրեցի, կինս սկսեց դժգոհել և ասաց՝ արի պտտենք, որ ճաշասենյակը ճանապարհին ավելի մոտ լինի ու էլի նման փոփոխություններ անելու առաջարկ արեց: Քանդեցի պատերն ու նրա բոլոր ցանկությունները կատարեցի: Վերջացնելուց հետո դարձյալ դժգոհեց ու սկսեց փոփոխություններ պահանջել: Հենց այդ ժամանակ էլ մտածեցի, որ պետք է պտտվող տուն կառուցեմ:
Վեց տարի շարունակ տղամարդը կառուցել է կնոջ երազանքի տունը, դադար է տվել միայն այն ժամանակ, երբ սրտի հետ կապված խնդիրներ է ունեցել ու պառկել է հիվանդանոցում: Բժիշկներին խնդրել է ամեն ինչ անել` կյանքը երկարացնելու համար, քանի որ կիսատ թողած ծրագիր է ունեցել: Դուրս գրվելուց հետո այն բարեհաջող ավարտին է հասցրել:
ՄԵԾ ԲՐԻՏԱՆԻԱ
ՋՈԱՆ ՌՈՈՒԼԻՆԳԻ ՆՈՐ ԳԻՐՔԸ
Լույս է տեսել բրիտանացի մանկագիր Ջոան Ռոուլինգի նոր գիրքը, որը պատմություն է մի փոքրիկ տղայի և նրա խոզուկ խաղալիքի մասին: Հայտնի Հարի Փոթերի հեղինակի նոր ստեղծագործությունը վերնագրված է «Սուրբ ծննդյան խոզուկը»: Գլխավոր հերոսի` տղայի անունը Ջեք է: Սա հեքիաթ-պատմություն է: Սիրելի խաղալիքը կորցնելուց հետո Ջեքը բազմաթիվ փորձությունների միջով է անցնում` այն գտնելու համար:
Ռոլինգի` Հարի Փոթերի մասին պատմող գրքի` ավելի քան 500 միլիոն օրինակ է վաճառվել ամբողջ աշխարհում: Այն թարգմանվել է 80 լեզվով և վերածվել ութ մասանոց ֆիլմի:
2001 թվականին Ջոան Ռոլինգը գրել է «Ֆանտաստիկ գազանները և որտեղ գտնել նրանց» կոչվող գիրքը, որը նույնպես վերածվել է ֆիլմաշարի: 2020-ին լույս է տեսել հեղինակի «Իկաբոգը» կոչվող հեքիաթը, որի վաճառքից ստացված հոնորարն ուղղվել է կորոնավիրուսից տուժած խոցելի խմբերին օգնելուն:
ՄԵԾ ԲՐԻՏԱՆԻԱ
ԵՂԻՍԱԲԵԹ ԹԱԳՈՒՀՈՒ ՄԵՂՐԱՄՈՄԵ ԱՐՁԱՆԸ ԿԱՌՔՈՎ ՇՐՋԵԼ Է ԲԼԵՔՓՈՒԼՈՒՄ
Մեծ Բրիտանիայի Եղիսաբեթ Երկրորդ թագուհու մեղրամոմե արձանը կառքով շրջել է Անգլիայի Բլեքփուլ քաղաքում: «Մադամ Տյուսոն» այս կերպ է ցանկացել հանրությանը ներկայացնել իր նոր աշխատանքը: Թագուհու արձանը ձիասայլով անցել է քաղաքի այն փողոցով, որտեղ, սովորաբար, մարդիկ զբոսանքի են դուրս գալիս: Հետո հասել է թանգարան:
Թագուհու մեղարմոմե արձանը, որը Միացյալ Թագավորության միապետուհուն ներկայացնում է նստած դիրքում, «Մադամ Տյուսոյի» թանգարանում տեղադրվել է Սասեքսի դքսի և դքսուհու արձանների հարևանությամբ:
ՄԵԾ ԲՐԻՏԱՆԻԱ
ԴԱՐՎԻՆԻ ՄԱՆՐԱԴԻՏԱԿԸ ԿՎԱՃԱՌՎԻ ԱՃՈՒՐԴՈՒՄ
Այս տարվա դեկտեմբերին նախատեսվում է, որ Քրիստի աճուրդի տանը վաճառքի կհանվի Չառլզ Դարվինի մանրադիտակը, որը նա նվիրել է որդուն՝ Լեոնարդին: Այն 200 տարի շարունակ մնացել է Դարվինների ընտանիքում: Ակնկալում է, որ կվաճառվի մինչև 480 հազար դոլարով:
ՋԵՅՄՍ ՀԱՅՍԼՈՓ («ՔՐԻՍՏԻ» ԱՃՈՒՐԴԻ ՏԱՆ ԱՇԽԱՏԱԿԻՑ) - Գիտության պատմության մեջ Չառլզ Դարվինը շատ հնչեղ անուն է: Նա ցանկացել է, որ իր որդին՝ Լեոնարդը, որին Լեննի էր ասում, ծանոթանա մանրադիտակով աշխատելու հաճույքին: Որդին էլ շատ շնորհակալ է եղել հորն` այս հիասքանչ նվերի համար: Այս մանրադիտակը սերունդներ շարունակ պահվել է Դարվինների ընտանիքում: Դրա վերջին տերն անցած տարի է մահացել: Եվ քանի որ մնացած ժառանգները չեն կարողացել այն բաժանել իրար մեջ, որոշել են դիմել «Քրիստիի» օգնությանը:
Մանրադիտակը ստեղծվել է 1825 թվականին, «Քերի» ֆիրմայի համար, հեղինակը Չառլզ Գուլդն է: «Քրիստի» աճուրդի տնից հայտնել են, որ սա Չառլզ Դարվինից մնացած վեց մանրադիտակներից մեկն է: Այս մանրադիտակով կենսաբանը ժամանակին ուսումնասիրել է այնպիսի օրգանիզմներ, ինչպիսիք են մարջանները ու ծովային անեմոնը:
ՉԵԽԻԱ
ԼՈՒՍԱՅԻՆ ՇՈՈՒ ՊՐԱՀԱՅՈՒՄ
Չեխիայի մայրաքաղաք Պրահայում անցկացվող «Ազդանշանի փառատոնի» շրջանակում ձայնային, լուսային և լազերային շոու է անցկացվել քաղաքի տեսարժան հուշակոթողների վրա և դրանց հարևանությամբ: Փառատոնը կորոնավիրուսի համավարակի պատճառով երկու տարի չի անցկացվել:
ՄԱՐՏԻՆ ՌՈՍՏԱ («ԱԶԴԱՆՇԱՆԻ ՓԱՌԱՏՈՆԻ» ԿԱԶՄԱԿԵՐՊԻՉ ԵՎ ՏՆՕՐԵՆ) - Ուրախ ենք, որ երկու տարվա ընդմիջումից հետո «Ազդանշանի փառատոնը» վերադարձավ մայրաքաղաք Պրահայի փողոցներ՝ ամբողջական ծրագրով: Այս տարի մենք ավելացրեցինք նաև փառատոնի, այսպես կոչված, 4-րդ ուղին, որը հնարավորություն է տալիս այս ամենը դիտել նաև բջջային հեռախոսի համապատասխան հավելվածի օգնությամբ:
Միջոցառման կազմակերպիչների խոսքով, Պրահան այս տոնի շրջանակում կծառայի որպես կտավ` տարբեր արվեստագետների համար: Փառատոնի նպատակն է մարդկանց մոտեցնել ժամանակակից արվեստին ու բարձրագույն տոխնոլոգիաների ձեռքբերումներին: Տոնի այցելուներն այս միջոցառումը որակել են «գունագեղ և ինտենսիվ»:
ԻՍՊԱՆԻԱ
ՓՈՒՉԻԿԻ ԱՇԽԱՐՀԻ ԱՌԱՋԻՆ ԱՌԱՋՆՈՒԹՅՈՒՆԸ
Իսպանիայում` Տարագոնայի զվարճանքների զբոսայգում, անցկացվել է Փուչիկի աշխարհի առաջին առաջնությունը: Միջոցառումը կազմակերպել են իսպանացի հայտնի վեբ հաղորդավար և մեկնաբան Իբայ Լանոսն ու Բարսելոնայի ֆուտբոլիստ Ժերար Պիկեն:
Նրանք ոգեշնչվել են ամերիկյան Օրեգոն նահանգում ապրող երեք քույր-եղբայրների՝ Անտոնիոյի, Դիեգոյի և Իզաբելի տիկտոկյան և ինստագրամյան տեսաշարերից, որոնք միլիոնավոր դիտումներ են ունեցել:
Փուչիկի աշխարհի առաջին առաջնությանը մասնակցել են 32 երկրի ներկայացուցիչներ: Խաղի կանոններից մեկն է այնպես անել, որ փուչիկը դիպչի գետնին, նախքան հակառակորդ թիմի անդամը կդիպչի դրան:
Այս խաղ-սպորտաձևում աշխարհի առաջին չեմպիոն է դարձել 18-ամյա Ֆրանչեսկո Դե Լա Քրուզը՝ Պերուից: Նա 6-2 հաշվով առաջ է անցել իր գերմանացի մրցակցից: Երրորդ տեղը զբաղեցրել է Իսպանիայի ներկայացուցիչը: Խաղերն անցկացվել են ութ մետր երկարություն և ութ մետր լայնություն ունեցող կորտում, որտեղ տեղադրված են եղել բազմաթիվ խոչընդոտներ, այդ թվում՝ մեկ ավտոմեքենա:
