Ադելա Արիստակեսյան (Երևանի Արգիշտի Առաջին արքայի անվան թիվ 61 հիմնական դպրոցի ուսուցչուհի) - Արդեն ավարտել ենք, պատրաստ ենք երեխաներին ընդունելու համար:
Ախտահանիչ միջոցներ, աղբամաններ, սեղանների միջև հեռավորություն. սեպտեմբերի 1-ից մի քանի օր առաջ դպրոցներում նախապատրաստական աշխատանքները գրեթե ավարտված են: 1 տարվա փորձ ունենք՝ ասում են 61-րդ հիմնական դպրոցի ուսուցիչները:
Ադելա Արիստակեսյան - Առկա ուսուցումը ավելի ճիշտ է, քան հեռավարը, էն արդյունքը չի տալիս: Փորձում ենք շատ չմոտենալ երեխաներին, բայց գրատախտակի մոտ կանչում ենք, հնարավոր չէ առանց դրա:
Զոյա Դանիելյան (Երևանի Արգիշտի Առաջին արքայի անվ. թիվ 61 հիմնական դպրոցի ուսուցչուհի) - Երեխաները դասամիջոցին դուրս չեն գալիս, դա դժվարություններից մեկն է, սեպտեմբերին շոգ է դիմակներով, բայց ի՛նչ անենք:
Քովիդի պայմաններում ոչ միայն կրթության բովանդակությունն ու որակն են ուսուցչի պատասխանատվության տակ, այլև հակահամաճարակային կարգուկանոնը: Նշում է հայոց լեզվի և գրականության ուսուցչուհին, ավելացնում՝ պատրաստ են, միայն թե կրթությունը հեռավար չդառնա:
Դասերը կլինեն առկա և ամենօրյա. նախարարության այս որոշումը դրական արձագանք է ստացել կրթության բոլոր օղակներում: Ի դեպ, եթե դասարանում սովորողների թիվը 20-ից ավելի է, ապա ամենօրյա դասերի համար պետք է համապատասխան թույլտվություն:
Զոյա Դանիելյան - Դե, հստակ տեղյակ չենք՝ օրումե՞ջ կանենք, թե՞ ամենօրյա, բայց երկու ռեժիմին էլ պատրաստ ենք, ցանկալի է ամենօրյա անել:
Սա արդեն Երևանի ամենամեծ ավագ դպրոցներից մեկն է՝ շուրջ 600 աշակերտի են դիմավորելու սեպտեմբերի 1-ին. օգոստոսի 27-ից արդեն պատրաստ են:
Անահիտ Նազարյան (Անդրանիկ Մարգարյանի անվան Երևանի թիվ 29 ավագ դպրոցի ուսումնական գծով փոխտնօրեն) - Տեսնում եք՝ էստեղ դեռ նստարանները դասավորված չեն, կարմիր գծերը կան, ըստ այդ գծերի կդասավորենք, մնացածն արդեն դասավորված է:
Անահիտ Նազարյանը կորոնավիրուսով արդեն վարակվել է, նշում է՝ ծանր է եղել ընթացքը: Նախորդ ուսումնական տարում շատ դասարաններ են 14 օրով անցել հեռավար կրթության: Եղել է ընթացք, որ դպրոցն ամբողջությամբ է փակվել՝ վարակման դեպքերը շատ են եղել: Այդ ամենը որպեսզի չկրկնվի, օրինակ՝ փոխտնօրենն արդեն պատվաստվել է:
Ուսուցիչների պատվաստումներն իրականացվում են կամավոր: Եթե չունեն պատվաստման սերտիֆիկատ, ապա ուսուցիչները, դասախոսները և անձնակազմը երկու շաբաթը մեկ ՊՇՌ թեստ պետք է հանձնեն: Պատվաստումների և թեստավորման հակացուցում ունեցող անձանց համար թե ինչ կարգավորումներ են տրվելու, պարզ կլինի առողջապահության նախարարության նոր պահանջների և կանոնների հրապարակումից հետո: Նոր պահանջները կիրառվելու են ոչ թե սեպտեմբերի, այլ հոկտեմբերի 1-ից:
Հեղինակ՝ Իրինա Մկրտչյան
