1250 բնակչություն ունեցող Գորիս համայնքի Քարահունջ բնակավայրն է: Գյուղացիները մեկը մյուսին ձայն տալով հավաքվում են Ավան Աղբյուրի փողոցում, շտապում են ներկայացնել իրենց մտահոգող հարցերը: Իսկ խնդիրների պակաս այստեղ չկա. Քարահունջցի Սուրեն Սարգսյանի խոսքով՝ 30 տարի է ոչ մի հարց լուծում չի ստանում, կարծես համայնքի ղեկավարները գյուղի մասին մոռացել են:
Սուրեն Սարգսյան, Քարահունջ գյուղի բնակիչ - Համայնքի ղեկավար չենք ունեցել, մենակ թալանով է զբաղված՝ իր գործերով, իր թալանով, ոչ մի բան էլ այս գյուղի համար չեն կատարել: Այս վերջին համայնքապետն առանց ժողովրդին տեղյակ պահելու՝ հողերը տվել է, ՀԷԿ-եր են կառուցել, 5 հատ ՀԷԿ՝ 10 կմ հատվածի վրա, 130 հեկտար այգիները չորացել, վերացել են: Համայնքի համար մի քոռ կոպեկ չեն ծախսել:
Տարիներ շարունակ գյուղի փողոցները չեն բարեկարգվել, տարվա կեսից ավելին անանցանելի է, խմելու ջրի խնդիրը ևս լուրջ մարտահրավեր է բնակիչների համար:
Մհեր Սարգսյան, Քարահունջ գյուղի բնակիչ - Մեր գյուղը խնդրիներ շատ ունի, կատարողներ չունի: Նորմալ մարդիկ գան, նորմալ ղեկավարներ, որ հարցերը լուծվեն:
Բնակավայրի ամենալուրջ մարտահրավերներից մեկն էլ սողանքն է: Քարահունջի հնաբնակների համար մտահոգիչ է սողանքի գոտում հայտնված իրենց բնակարանների հարցը: 10-ը՝ վթարային է:
Արմեն Ալավերդյան, Քարահունջ գյուղի բնակիչ - 50 հազար փող են ուզել, որ գան նայեն: Այսքան ժամանակ մեր գյուղապետից մի օգնություն չեմ տեսել:
Պատերի վրա առաջացող ճաքերի աղմուկից արթնանում են ու ամեն օր վախով ապրում՝ հնարավոր է մի օր փլատակներում հայտնվեն:
Ստյոպա Ղազարյան, Քարահունջ գյուղի բնակիչ - Դրսից որ նայում ես, տունը թեքված է: 2016-ից դիմել եմ, ոչ մեկ ոչինչ չի արել:
Հենց այսպես էլ ապրել են տարիներ շարունակ, իրենց գոյության մասին միայն ընտրությունից ընտրություն են հիշել: Այս անգամ էլ նախկին բարքերի հետքերով փորձեցին գնալ համայնքի պատասխանատուները:
Հիմա Քարահունջի անունն ամբողջ մարզում և երկրում շատ է հնչում, իրավապահներ են գալիս-գնում: Ըստ Հատուկ քննչական ծառայության՝ բնակավայրի վարչական ղեկավարը համայնքի բյուջեից տված օգնությունը բնակիչներին որպես կաշառք է ներկայացրել ու պարտադրել ընտրությանը «Հայաստան» դաշինքին ձայն տալ: Գործը քննում են, իսկ համայնքի խնդիրները կրկին մնացել են օդից կախված: