Հայաստանի ու Արցախի ռազմական գերատեսչություննեը պարզում են վերջին օրերին շրջափակման մեջ հայտնված զինծառայողների հետ կապված բոլոր մանրամասները: Հարցը նաև Արցախի նախագահի ուշադրության կենտրոնում է: Արայիկ Հարությունյանն այսօր նաև նախանշել է առաջիկա ներքաղաքական անելիքները, հայտնել, որ հրաժարվում է «Ազատ հայրենիք» կուսակցության նախագահի պաշտոնից:
Ավելի ուշ, վերախմբագրելով ուղերձը, Արայիկ Հարությունյանն ավելացրել է, որ առաջին իսկ հնարավորության պահին վայր է դնելու նախագահի լիազորությունները, ողջամիտ ժամկետում կազմակերպվելու են արտահերթ համապետական ընտրություններ և ինքը դուրս է գալու քաղաքականությունից: Առաջիկա օրերին հաստատելու է կառավարության նոր կառուցվածքը, կլինեն կադրային փոփոխություններ, այդ թվում՝ ուժային կառույցներում:
Խծաբերդի ուղղությամբ գերի է ընկել մի քանի տասնյակ զինծառայող: Արայիկ Հարությունյանի խոսքով, թե ի՞նչ պայմաններում, դեռ պարզ չէ:
Արայիկ Հարությունյան, Արցախի նախագահ - Ես անձամբ հետևողական եմ լինելու, որ այս միջադեպի մեղավորները ենթարկվեն իրավական պատասխանատվության: Նրանց արագ ու անվտանգ վերադարձը հայրենիք պետք է լինի բոլորիս առաջիկա ջանքերի կիզակետում, և արդեն իսկ քայլեր ենք ձեռնարկում այդ ուղղությամբ:
Հարությունյանը խոսքով՝ ադրբեջանական կողմը շարունակում է սադրիչ վարքագիծը: Չնայած եռակողմ հայտարարությանը՝ հակառակորդը գործողություններ է իրականացրել Խծաբերդի ու Բերդաձորի հատվածներում:
Արայիկ Հարությունյան - Պաշտպանության բանակի զինծառայողների և ռուս խաղաղապահների կողմից կանխվել են ադրբեջանական զինծառայողների տարբեր սադրանքներ, իսկ երեկ երեկոյան նրանց դուրս են մղել Շուշիի Հին Շեն գյուղի մերձակայքից: Այս օրերին Բերդաձորի ուղղությամբ ոչ մի անձ չի տուժել, իսկ հակառակորդին թույլ չի տրվել մուտք գործել որևէ բնակավայր:
Արայիկ Հարությունյանը տեսաուղերձում ոլորտ առ ոլորտ ներկայացրել է իր պատկերացումները Արցախի Հանրապետության հետագա զարգացման վերաբերյալ: Պատերազմի հետևանքով մոտ 2,5 անգամ երկարել է շփման գիծն ադրբեջանական կողմի հետ: Հակառակորդը գտնվում է որոշ բնակավայրերի անմիջական հարևանությամբ: Խիստ սահմանափակվել են հաղորդակցության միջոցները Հայաստանի հետ: Դրան գումարվում է սուղ մարդկային ու տեխնիկական միջոցները, ինչպես նաև սահմանափակ ժամանակը՝ նոր առաջնագիծն ամրացնելու համար
Արայիկ Հարությունյան - Այժմ Արցախի իշխանությունները կատարում են հնարավոր ամեն բան՝ մեր լիազորությունների ու կարողությունների սահմաններում առկա անվտանգային մարտահրավերների չեզոքացման ու անորոշությունների հստակեցման ուղղությամբ, որոնց մի մասը կախված է նաև ամենաբարձր մակարդակի միջազգային բանակցությունների արդյունքներից: Այնուամենայնիվ, անկախ առկա օբյեկտիվ դժվարություններից, մեկ բան ակնհայտ է մեզ համար, այն է՝ Պաշտպանության բանակը, ողջ հայության աջակցությամբ, շարունակելու է իր գործառույթներն ու ջանքերն Արցախի բնակչության ֆիզիկական անվտանգության ապահովման ուղղությամբ, որոնք լրացվում են Ռուսաստանի Դաշնության խաղաղապահ զորակազմի երաշխիքներով:
Արտաքին քաղաքականության ոլորտում իշխանության գերնպատակն Արցախի ժողովրդի անվտանգության ապահովումն է՝ հայտարարել է Հարությունյանը: Առաջնահերթություններից է նաև Արցախի Հանրապետության միջազգային ճանաչումը:
Մեկնարկել է գերիների փոխանակման գործընթացը: Հարությունյանը նշել է, որ Հայաստանի իշխանությունների հետ պետք է անեն ամեն ինչ՝ բոլորին տուն վերադարձնելու համար: Պատերազմի հետևանքով տասնյակ հազարավոր մարդիկ անօթևան են մնացել: Դա ենթադրում է ծանր սոցիալական բեռ, սակայն կոնկրետ ժամանակահատված է նշված՝ խնդիրը լուծելու համար:
Արայիկ Հարությունյան - Կարճ ժամկետում կարգավորել անօթևան քաղաքացիների ժամանակավոր կացարանների խնդիրը՝ թե՛ տարբեր շինություններում կենտրոնացված տեղավորման, թե՛ բնակվարձի պատշաճ փոխհատուցման, թե՛ արագ բնակարանաշինության և հնարավոր այլ ծրագրերի միջոցով՝ երեք տարում բոլոր անօթևաններին ապահովել բնակարանային պայմաններով, առաջիկա երեք տարում քաղաքացիների փոխարեն վճարել իրենց հիփոթեքային վարկերի գումարներն ու դրանց տոկոսները:
Հարությունյանն անդրադարձել է 44-օրյա պատերազմին վերաբերող մի շարք հարցերի: Ճի՞շտ էր արդյոք պատերազմը կանգնեցնել նոյեմբերի 9-ին՝ այդ պայմաններով: Եթե դա չարվեր, այլընտրանքն ավելի մեծ մարդկային ու տարածքային կորուստներն էին լինելու, ընդհուպ՝ լրիվ հայրենազրկումը՝ ասում է Հարությունյանը:
Արայիկ Հարությունյան - Երկրորդ հարցն այն է, թե արդյո՞ք հնարավոր չէր ավելի շուտ դադարեցնել պատերազմը հարաբերականորեն ավելի լավ պայմաններով ու ավելի քիչ կորուստներով, իսկ երրորդը, թե արդյո՞ք հնարավոր չէր նախօրոք այնպես անել, որ հայկական զինված ուժերն ավելի լավ պատրաստված լինեին պատերազմին: Վերջին երկու հարցերի պատասխաններն էլ դրական են, սակայն մանրամասներին կանդրադառնամ մեկ այլ առիթով:
Արցախի նախագահն սկսել է քաղաքական խորհրդակցություններ խորհրդարանական ու արտախորհրդարանական ուժերի և հասարակական տարբեր խմբերի հետ: Հարությունյանը նաև հրաժարվել է «Ազատ հայրենիք» կուսակցության նախագահի պաշտոնից և դուրս է եկել կուսակցությունից՝ պետության վերկուսակցական ղեկավար ընկալվելու և հասարակությունը համախմբելու համար:
