Տղաների աչքերը տեսել են պատերազմի ահասարսուռ տեսարանները. թշնամու՝ մի քանի գերազանցող զորքի առաջ չեն ծնկել:
Միսակ Տեր-Գեղամյան (Արցախյան պատերազմի մասնակից) - Մերոնք շատ դուխով էին, մինչև վերջ պահում էին:
Միսակենց դասակը մասնակցել է Շուշիի ծանր մարտերին: Զինակիցները չկան: Բերդաքաղաքը պաշտպանելիս ընկան նաև ընկերն ու եղբայրը:
Միսակ Տեր Գեղամյան - Ձորերով դուրս ենք եկել: Աստված ա էլի պահել:
Պատերազմի մասին տղաները շատ խոսել չեն սիրում: Մեխակավան, Հադրութ՝ պատերազմի ծանր ուղղություններում էր պայքարում նաև Էդմոն Նազարյանը: Կրակի միջից երկու վիրավոր զինծառայողի կյանք է փրկել, երբ ինքը ևս վիրավոր էր և կարիք ուներ շտապօգնության:
Էդմոն Նազարյան (Արցախյան պատերազմի մասնակից) - Խոշտանգումները, անմարդկային պահվածքը, որը մեր կողմից անընդունելի են: Մեզ չենք կարող թույլ տալ, կենդանու են նման:
Վերակենդանացման բաժանմունքում օր ու գիշեր պայքարից հետո ծանր վերքերն աստիճանաբար սպիանում են: Դուրս գրվելուց հետո գալիս են բուժկենտրոն՝ հոգեբանական աջակցության նպատակով: «Շենգավիթ» բուժկենտրոնի հոգեբան Նարինե Պետրոսյանը հաստատում է՝ մինչև ատամները զինված ադրբեջանա-թուրքական բանակին չի հաջողվել հաղթել հոգեբանական պատերազմում:
Նարինե Պետրոսյան («Շենգավիթ» ԲԿ հոգեբան) - Տղաներից ոչ մեկը չի կոտրվել, մարտական ոգին չի կոտրվել: Որևիցե մեկը չկա, որ ընկճված լինի, ընկճախտի մեջ լինի, ասի՝ էլ չեմ գնա, պատրաստակամ, որ չնեղվեք, բոլորս կհավաքվենք:
Կռվել են հայրենիքի՝ իրենց վստահված հատվածն ամեն գնով պաշտպանելու համար: Ապրիլյան պատերազմին Ավետ Սուքիասյանը ժամկետային էր: Մասնակցել է Արցախի հյուսիսի պաշտպանությանը, պարգևատրվել «Մարշալ Բաղրամյան» շքանշանով: Արցախյան այս պատերազմ մեկնել է կամավոր: Հիացած է 18, 20 տարեկան տղաների խիզախությամբ:
Ավետ Սուքիասյան (Արցախյան պատերազմի մասնակից) - Տեսա ավելի ուժեղ, տարբերությունը մեծ էր...
Նարինե Պետրոսյան - Ինչ արվում է՝ ամենաքիչն է, իրենց կյանքի հաշվին կարողանում ենք մեզ լավ զգալ, մեր ուժն են, հպարտությունը, արժանապատվությունը:
Ծանր պատերազմը չի փոխել նաև Տիգրանի ծրագրերը, կվերադառնա Ստեփանակերտ՝ հիմա արդեն ապրելով պաշտպանելու իր հայրենիքը:
Տիգրան Մկրտչյան (Արցախյան պատերազմի մասնակից) - Գնալու եմ, աշխատեմ, ամուսնանամ...
Ավետն իր ձայնով է օգնում, որ միասին վիրավոր տղաներն ավելի շուտ լիարժեք ոտքի կանգնեն:
