Քրեական գործերով հետախուզման մեջ գտնվող նախկին պաշտոնյաները՝ Միքայել Հարությունյանը, Գևորգ Կոստանյանն ու Միհրան Պողոսյանը, պաշտպանների միջոցով դիմել են իրավապահներին՝ խնդրելով դադարեցնել հետախուզումը և հնարավորություն տալ վերադառնալ Հայաստան:
Այս առնչությամբ 1lurer.am-ի հարցին ի պատասխան ՀՀ գլխավոր դատախազի խորհրդական Գոռ Աբրահամյանը նշեց. «Նման խնդիրները բացառապես քրեական դատավարության տիրույթում գտնվող հարցեր են, և յուրաքանչյուր դեպքում լուծումներն էլ են միայն քրեադատավարական ընթացակարգ ենթադրում ու չեն կարող պայմանավորված լինել որևէ այլ հանգամանքով: Հետևաբար դատախազությունը նման հարցերում չի առաջնորդվում հայտարարություններով:
Իսկ կոնկերտ մեղադրյալների պաշտպանի կողմից ներկայացված համապատասխան միջնորդությունների քննարկման արդյունքում կկայացվեն պատճառաբանված որոշումներ: Միջնորդության քննարկման համար սահմանված են կոնկրետ ժամկետներ, որոնք տվյալ միջնորդությունների պարագայում դեռևս չեն լրացել: Այդ ժամկեների պահպանմամբ կայացված որոշումները կուղարկվեն միջնորդություն ներկայացնողներին:
Հորդորում ենք տարատեսակ մեկնաբանություններով չփորձել ազդել քրեադատավարական գործընթացների վրա»:
