Բուր-լը-Վալանսի քաղաքապետ Մարլեն Մուրիեն ուղերձ է հղել Հայոց ցեղասպանության 105-րդ տարելիցի կապակցությամբ:
«Սիրելի բարեկամներ, չնայած այսօր կորոնավիրուսի պատճառով մեր կյանքում ստեղծված բարդ իրավիճակին և Հայոց ցեղասպանության 105-րդ տարելիցի հիշատակման արարողությանը ֆիզիկապես ներկա գտնվելու անհնարինությանը՝ 1915թ. թուրքական պետության զոհը դարձած 1.5 մլն հայերին հարգանքի տուրքը մատուցելն ինձ համար առանցքային նշանակություն ունի։
Նույնիսկ եթե այս ապրիլի 24-ին առողջապահական նկատառումներով մեկուսացման հետևանքով երթ կամ հավաք չի լինելու, ուզում եմ ձեզ ասել, որ ոչինչ չի խաթարում հանուն արդարության մեր պահանջները, մենք չենք դադարի բոլորս միասին աշխատել Թուրքիայի կողմից Ցեղասպանության ճանաչման համար և ձեռք ձեռքի պայքարելու ենք ժխտողների դեմ:
Հիշենք Սևրի պայմանագիրը, որի հարյուրամյակն է լրանում այս տարի՝ 2020-ին, և թող այս տարին լինի պայքարի տարի, որ ամեն օրը լինի ապրիլի 24-ի հիշողության օր՝ ի հիշատակ 20-րդ դարի առաջին ցեղասպանության զոհերի:
Ինչպես ամեն տարի, ես ձեզ կողքին եմ՝ հավատարիմ աջակիցը ձեր պայքարի և մեր ընդհանուր արժեքների։
Վերջապես, իմ մտքում է հայ ժողովուրդը Հայաստանում և Արցախում, որ նույնպես տուժում է կորոնավիրուսից։ Նույնիսկ եթե գիտեմ, որ մեր բարեկամները Հայաստանում և Արցախում ի սկզբանե լավ էին պատրաստվել վիրուսի կանխմանը՝ անմիջապես կանխարգելիչ միջոցների ներդրման, մեկուսացման, ամբողջ բնակչության համար մեծ քանակությամբ դիմակների պատվերների միջոցով, իմ ուղերձում, ինչպես որ անդադար ասում եմ իմ համաքաղաքացիներին, ուզում եմ նրանց հորդորել մնալ տանը և հատկապես հոգ տանել իրենց և իրենց հարազատների մասին։
Կեցցե՛ Ֆրանսիան, կեցցե՛ Արցախը»,- նշված է ուղերձում:
