Ռոբերտ Քոչարյանի ազատության հանձնախմբի համակարգող Աղվան Վարդանյանն այսօր հրավիրած ասուլիսում հայտարարել է, որ հանրային լարվածության պատճառներից մեկը Մարտի 1-ի գործի շուրջ ընթացող զարգացումներն են և Ռոբերտ Քոչարյանին ոչ իրավական ճանապարհով կալանքի տակ պահելը:
Վարդանյանն ասել է, որ ներկայացված մեղադրանքը որևէ կապ չունի 10 զոհերի մահվան հանգամանքների բացահայտման հետ: Նա նշել է նաև, որ Ռոբերտ Քոչարյանին անազատության մեջ պահելն անպատիվ գործ է, չի բխում մեր պետության շահերից, ընդհակառակը՝ վնասում է պետության վարկը, խարխլում է դատական համակարգը:
«Այս վիճակից պետք է դուրս գալ: Ամենապարզ ելքը երկրորդ նախագահի խափանման միջոցը փոխելն է: Իշխանությունը առայժմ չի անում դա՝ դատավորներին պարտադրելով հակաօրինական որոշումներ: Մնում է երկրորդ ճանապարհը՝ խափանման միջոցի փոփոխությունը դարձնել հանրային, քաղաքական պահանջ: Արձագանքելով այդ առայժմ 60 հազար քաղաքացիների պահանջին՝ ստեղծվել է նախաձեռնող խումբ, որի գործունեության նպատակը նախագահ Քոչարյանի ազատությունն է»,- հավելել է Աղվան Վարդանյանը:
