Նիկոլ Աղբալյան ուսանողական միությունից հեռացված անդամները հաստատել են, որ վերջերս համացանցում տարածված հայտնի նամակն իրենք են տարածել: Երիտասարդները հիմնավորել են, որ դա արել են ՀՅԴ առողջացման համար: Եվս մեկ անգամ հայտարարել են, որ ՀՅԴ ԳՄ հայաստանյան կոմիտեի ժողովում որոշվել է պարտիզանական հարվածներ հասցնել ներկա իշխանությանը:
«Դաշնակցության վերնախավը գործի դրեց իր հնարավոր ու անհնար մանիպուլատիվ, իրականությունը կեղծող և խեղաթյուրող բոլոր միջոցները և ջանք ու եռանդ չխնայեց, որ մեր շարժումը, մեր անկեղծ նպատակները մրոտի: Մեր շարժման նպատակը ՀՅԴ առողջացմումն է: Կարծիք է ձևավորվել, թե մենք հեռացել ենք մեր գաղափարներից ու պատկերացումներից՝ դա այդպես չէ: Մեր 100-ամյակից հետո Հրանտ Մարգարյանի գծած օրակարգը կուսակցությանը հեռացրել է իր գաղափարներից»,- նշել է Նիկոլ Աղբալյան ուսանողական միությունից հեռացված անդամ Արտակ Մելիքյանը:
Շահարկումներին, թե այս թեմայով ելույթներ են ունենում, խոսում են նրանք, ովքեր չեն մասնակցել ժողովին և նման ինֆորմացիայի չէին կարող տիրապետել, ըստ այդմ էլ նամակում գրվածը սուտ է՝ ուսանողական միության լուծարաված վարչության նախագահ Ռուբեն Սողոյանը հակադարձել է: Հոկտեմբերի 31-ին տեղի ունեցած ԳՄ ժողովին մասնակցել է վարչության 5 անդամներից 4-ը, և ժողովին քննարկված թեմաներից միության մյուս անդամներին տեղյակ են պահել իրենք ընկերային հավաքի ժամանակ: Սողոյանը նաև նշել է, որ ԿԳՄՍ նախարար Արայիկ Հարությունյանի հրաժարականի պահանջով ցույցերին մասնակցելու, ցույցերի առաջամարտիկը լինելու հրահանգ-որոշում են ստացել Գերագույն մարմնից՝ առանց որոշման ընդունման գործընթացին մասնակից լինելու: Սակայն և՛ վարչության 5 անդամները, և՛ ուսանողական միության մեծամասնությունը դեմ է եղել և չեն կատարել ԳՄ որոշումը, որից 2 շաբաթ անց էլ վարչությունը լուծարվել է, ու կուսակցական կյանքից մեկուսացվել են անդամները:
«Երկու շաբաթվա ընթացքում մեր դեմ արշավ սկսվեց, որը բնորոշվում էր տարաբնույթ պիտակավորումներով, մեր մասին, ուսանողական միության մասին ապատեղեկատվության տարածումով՝ Դաշնակցության համասփյուռ կառույցով մեկ, Նաև մեզ ուղղված էժանագին առաջարկներով, որոնց մերժելուն հաջորդում էին սպառնալիքները»,- ասել է Սողոյանը:
Նիկոլ Աղբալյան ուսանողական միության անդամները վերջերս սկսել են ստանալ շատ գրավիչ գործնական առաջարկներ ԳՄ-ի, Դաշնակցության խողովակների կողմից՝ հայտնել է Ռուբեն Սողոյանը:
«Ամեն տարբերակ փորձեցին համոզելու, սպառնալու, հիմա անցել են գործ առաջարկելուն: Գաղտնիք չէ, որ ուսանողի համար աշխատանքը շատ կարևոր, օրհասական բան է, իրենք էլ են դա շատ լավ գիտակցում: Ուզում եմ ասել, որ չտանջվեն իզուր, մենք հպարտություն ունենք ու մեզ ոչ կարող եք ինչ-որ բանով գնել, ոչ էլ առավել ևս սպառնաք»,- ասել է Սողոյանը:
«Արտաքին լայն հասարակության համար մեզ պիտակավորում են որպես իշխանական թև, իշխանությունից ուղղորդված՝ մեր գործողությունները կապելով հիմնականում գործող կուսակցության հետ: Չենք ժխտում, որ այսօր կա հակադաշնակցական արշավ և դյուրին է ավելի այս շարժումը, այս ազնիվ մղումը կապել իշխանական թևի հետ և տանել հակադաշնակցական արշավի ուղով: Երկրորդ թեզը ներկուսակցական շրջանակների համար ավելի խղճուկ իրավիճակ է իրենից ներկայացնում: Սփյուռքի դաշնակցական կառույցների, տարբեր անհատների, ովքեր իրենց կերպարով կարող է և ընդդիմադիր են, չեզոք են, իրենց կողմից ղեկավարվելու թեզն են առաջ քաշել տարբեր հանդիպումների, քննարկումների շրջանում»,- ասել է հեռացված անդամներից Անուշ Հովհաննիսյանը:
