Տարեցտարի ընդլայնվում է երկկողմ փոխշահավետ գործակցությունը առևտրատնտեսական, էներգետիկ, տրանսպորտային, նորարարության, լեռնահանքային արդյունաբերության ոլորտներում, իրականացվում են հեռանկարային ներդրումային ծրագրեր, թափ են առնում միջտարածաշրջանային և հումանիտար կապերը:
Դիվանագիտական կապերի 25-ամյակին Հայաստանը հյուսիսային հարևանի հետ ևս մեկ հոբելյան է տոնում: Այսօր լրանում է Ռուսաստանի հետ բարեկամության, գործակցության և փոխադարձ օգնության մասին պայմանագրի ստորագրման 20-ամյակը: Ռուսաստանի պաշտոնակցին հղած շնորհավորական ուղերձում Հայաստանի նախագահը գրել է, որ մեր երկրների հարաբերություններն առանձնանում են բարձր մակարդակի ակտիվ երկխոսությամբ, արտաքին քաղաքական արդյունավետ համակարգմամբ, անվտանգության, ռազմական և ռազմատեխնիկական ոլորտներում հաջող գործակցությամբ:
