Իտալիայի վարչապետ Ջորջիա Մելոնին պաշտոնական այցով ժամանել է բաքու, հանդիպել Ադրբեջանի նախագահ Իլհամ Ալիևի հետ, քննարկել երկկողմ գործակցության առանցքային ուղղությունները: Իտալիան Ադրբեջանի կարևորագույն առևտրային գործընկերն է՝ հատկապես նավթագազային ոլորտում՝ հայտարարել է Իլհամ Ալիևը: Նրա խոսքով՝ իտալական շուկան Ադրբեջանի համար առաջնային նշանակություն ունի: Ալիևի խոսքով՝ 2025 թվականին Ադրբեջանը արտահանել է 25 մլրդ խմ բնական գազ, որից մոտ 10 միլիարդը բաժին է ընկել Իտալիային, քննարկվում են այդ ծավալի ավելացման միջոցառումները։
Ադրբեջանի նախագահը նշել է, որ Իտալիայի հետ համագործակցության մյուս կարևորագույն ուղղությունը ռազմատեխնիկականն է: «Այսօր քննարկվեց նաև այդ հարցը։ Կոնկրետ գաղափարներ ունենք համատեղ նախագծերի իրականացման, համատեղ արտադրության կազմակերպման, իտալական տեխնոլոգիաներն ադրբեջանական ֆինանսական միջոցների հետ միավորելու վերաբերյալ»,- ասել է Ալիևը։
Նա նաև նշել է, որ Ադրբեջանում ներկայումս գործում է շուրջ 130 իտալական ընկերություն:
Մելոնին էլ վստահություն է հայտնել, որ Իտալիայի և Ադրբեջանի միջև բարեկամական կապերը կշարունակեն զարգանալ: Նրա խոսքով՝ բանակցությունների ընթացքում հաստատվել է համագործակցության հետագա ընդլայնման հանձնառությունը:
«Մենք ցանկանում ենք, որ Ադրբեջանն ամրապնդի իր դերը որպես Եվրոպայի և Ասիայի միջև հիմնարար հանգույց»,- հավելել է Իտալիայի վարչապետը:
Մանրամասները՝ տեսաշարում:
