Մարտի 12-ին Ստրասբուրգում` Եվրոպայի խորհրդի կողմից ՄԻՊ հաստատությունների համար կազմակերպված բարձրաստիճան համաժողովում առաջին անգամ ելույթ է ունեցել ՀՀ մարդու իրավունքների պաշտպանին առընթեր երեխաների և երիտասարդների իրավունքների պաշտպանության հարցերով հասարակական խորհրդի ներկայացուցիչ Տիգրան Մանուկյանը։ Այդ մասին հայտնում է ՄԻՊ-ի աշխատակազմը:
Ստրասբուրգում անցկացված համաժողովին նա մասնակցել է Մարդու իրավունքների պաշտպան Անահիտ Մանասյանի գլխավորած պատվիրակության կազմում՝ որպես ՀՀ մարդու իրավունքների պաշտպանի երիտասարդ ներկայացուցիչ։
Այս մասնակցությունը կարևոր քայլ է երեխաների և երիտասարդների իրավունքների ձայնը լսելի դարձնելու և նրանց որոշումների կայացման գործընթացներում ներգրավելու տեսանկյունից։
«Երիտասարդների ներգրավվածություն» խորագրով նիստը մոդերացրել է Եվրոպայի խորհրդի ժողովրդավարության և մարդկային արժանապատվության գլխավոր տնօրինության Երիտասարդության բաժնի ղեկավար Տոբիաս Ֆլեսենկեմպերը։
Քննարկմանը մասնակցել են Ֆրանսիայի իրավունքների պաշտպան Քլեր Հեդոնը, Իռլանդիայի Մարդու իրավունքների և հավասարության հանձնաժողովի գլխավոր հանձնակատար Լիամ Հերիկը, Եվրոպայի խորհրդի Երիտասարդության հարցերով Խորհրդատվական խորհրդի փոխնախագահ Մաուրիցիո Քութինը։
Տիգրան Մանուկյանն իր ելույթում նշել է, որ հատկապես վերջին տարիներին ՀՀ մարդու իրավունքների պաշտպանի հաստատությունը հետևողականորեն զարգացրել է խորհրդի գործունեությունը՝ ապահովելով երեխաների և երիտասարդների ձայնի լսելիությունը ոչ միայն ազգային, այլև միջազգային հարթակներում, ինչպես նաև նրանց լիարժեք մասնակցությունը միջազգային բարձր մակարդակի քննարկումներին։ Ելույթում նշվել է նաև, որ խորհրդի գործունեության կարևոր ձեռքբերումներից էր 2024 թվականին Պաշտպան Անահիտ Մանասյանի գլխավորությամբ ՄԱԿ-ի երեխայի իրավունքների կոմիտեի նախանիստին մասնակցությունը, որտեղ անդամներն առաջին անգամ անձամբ բարձրաձայնեցին իրենց հուզող խնդիրները և ներկայացրեցին այլընտրանքային զեկույց պետության կողմից միջազգային պարտավորությունների կատարման վիճակի հետ կապված։
Մարդու իրավունքների պաշտպանին առընթեր խորհրդի գործունեության առաքելությունն ու հիմնական նպատակներն են երեխաների մասնակցության խթանումը երեխայի իրավունքներին առնչվող մարտահրավերների և խնդիրների բարձրաձայնման, ինչպես նաև այդ խնդիրների լուծմանն ուղղված առաջարկությունների ներկայացման գործընթացում, այդ թվում՝ ՀՀ պետական մարմինների ներկայացուցիչների և միջազգային կազմակերպությունների հետ երկխոսության ձևաչափով երեխաների մասնակցության ապահովման միջոցով։
Այս գործընթացների արդյունքում երեխաներն ու երիտասարդները ոչ միայն արտահայտում են իրենց դիրքորոշումները, այլև անմիջական ներգրավվածություն ունեն որոշումների կայացման գործընթացներում՝ ներկայացնելով Հայաստանի փորձը միջազգային գործընկերներին։
