Պեկինը քննադատել է Պանամայի Գերագույն դատարանի որոշումը, որը Սահմանադրությանը չհամապատասխանող է ճանաչել Պանամայի ջրանցքի երկու կողմում գտնվող երկու նավահանգիստները Հոնկոնգում գործող CK Hutchison ընկերությանը հանձնելու կոնցեսիոն պայմանագիրը, հաղորդում է EFE-ն։
Պեկինը հիշեցրել է, որ «կոնցեսիան ուժի մեջ է եղել գրեթե 30 տարի, և դրա երկարաձգումը հաստատել են Պանամայի իշխանություններն ու կարգավորող մարմինները»։ Հետևաբար, Չինաստանի իշխանությունները Պանամայի դատարանի որոշումը համարում են «իրավունքի գերակայության և պայմանագրի ոգու լուրջ խախտում»։
«CK Hutchison-ը Պանամայում օրինական գործունեության մեջ է ներդրել ավելի քան 1,8 միլիարդ դոլար՝ ստեղծելով հազարավոր աշխատատեղեր, բայց դա գնահատելու փոխարեն Պանաման դաժան և անմարդկային կերպով զրկել է ընկերությանը նավահանգստային իրավունքներից»,- հայտարարել է Պեկինը և զգուշացրել, որ Չինաստանն ունի «միջոցներ, մեթոդներ, ուժ և հնարավորություններ՝ պահպանելու արդար և հավասար միջազգային տնտեսական և առևտրային կարգը»։
Հունվարի վերջին Պանամայի Գերագույն դատարանը հակասահմանադրական է ճանաչել Պանամայի Պետության և Հոնկոնգի CK Hutchison կոնգլոմերատի դուստր ձեռնարկության՝ Panama Ports Company-ի (PPC) միջև կնքված կոնցեսիոն համաձայնագիրը։ PPC-ն 1997 թվականից կառավարում է Պանամայի ջրանցքի Բալբոա (Խաղաղ օվկիանոսի ափին) և Քրիստոբալ (Ատլանտյան օվկիանոսի ափին) նավահանգիստները։
2025 թվականին CK Hutchison-ը համաձայնել է կոնցեսիան հանձնել ամերիկյան BlackRock ընկերության գլխավորած կոնսորցիումին, սակայն Չինաստանն արգելափակել է գործարքը։
Այդ կապակցությամբ Պանամայի գլխավոր վերահսկիչ Անել Ֆլորեսը հուլիսի 30-ին երկու հայց է ներկայացրել Գերագույն դատարան՝ PPC-ին տրամադրված կոնցեսիայի դեմ` հիմնվելով աուդիտի վրա, որը բազմաթիվ խախտումներ է բացահայտել պայմանագրում:
PPC-ն չորեքշաբթի հայտարարել է, որ արբիտրաժային վարույթ է սկսել Պանամայի դեմ՝ որոշումը համարելով «Պանամայի պետական իշխանությունների կողմից ընկերության դեմ ուղղված արշավ և, հետևաբար, պահանջում է լիարժեք փոխհատուցում»։
