Կանցլեր Ֆրիդրիխ Մերցը Գերմանիայի և Հնդկաստանի միջև դիվանագիտական հարաբերությունների հաստատման 75-ամյակի և ռազմավարական գործընկերության 25-ամյակի առթիվ ժամանել է Ահմադաբադ:
Այցի նպատակն է տնտեսության, անվտանգության և պաշտպանության ոլորտներում երկու երկրների հարաբերությունների ամրապնդումը: Երկօրյա այցի ընթացքում Մերցը գործարարների պատվիրակության հետ կմեկնի նաև Բանգալոր:
Ֆրիդրիխ Մերցը Հնդկաստանի վարչապետ Նարենդրա Մոդիի հետ այցելել է Մահաթմա Գանդիի նախկին կեցավայր: Այնուհետև երկու ղեկավարները բացել են Օդապարուկների ամենամյա միջազգային փառատոնը:
Բանակցություններից հետո համատեղ մամուլի ասուլիսում Մոդին ընդգծել է, որ առևտրի և ներդրումների ոլորտներում հարաբերությունները նոր խթան են հաղորդել ռազմավարական գործընկերությանը: Նրա խոսքով՝ Հնդկաստանի և Գերմանիայի միջև երկկողմ առևտուրը գերազանցել է 50 միլիարդ դոլարը: Մերցն էլ իր հերթին նշել է, որ Գերմանիան ցանկանում է անվտանգության ոլորտում ավելի սերտորեն համագործակցել Հնդկաստանի հետ, որպեսզի նվազեցնի Նյու Դելիի կախվածությունը Ռուսաստանից: Գերմանիայի կանցլերը հնարավոր է համարել հունվարի վերջին Եվրամիության և Հնդկաստանի միջև ազատ առևտրի համաձայնագրի կնքումը:
Երկու ղեկավարների ներկայությամբ ստորագրվել են մի շարք փաստաթղթեր տարբեր ոլորտներում գործակցության վերաբերյալ:
Մերցի այցից երկու շաբաթ անց Նյու Դելիում տեղի կունենա Եվրամիություն-Հնդկաստան գագաթնաժողովը:
