Պաղեստինյան արմատական իսլամիստական ՀԱՄԱՍ շարժումն Իսրայելին է հանձնել ևս չորս պատանդի մարմին, այդ մասին հայտարարել է ՑԱՀԱԼ-ը։
Մարմինների հանձնումը տեղի է ունեցել, երբ Իսրայելի իշխանությունները հայտարարել են, որ կիսով չափ կկրճատեն թույլատրված մարդասիրական օգնության բեռնատարների քանակը Գազայի հատված, եթե ԱՄՆ նախագահ Դոնալդ Թրամփի ծրագրի շրջանակում պայմանավորվածությունները չկատարվեն, հաղորդում է Reuters-ը։
Ներկայումս Գազայում մնում է 20 մարմին։ Times of Israel-ի տվյալներով՝ ՀԱՄԱՍ-ը խոստացել է հոկտեմբերի 15-ին վերադարձնել ևս չորս պատանդի աճյուն։
ԱՄՆ նախագահ Դոնալդ Թրամփը պահանջել է, որ պաղեստինյան շարժումը հանձնի բոլոր մահացած իսրայելցի պատանդների մարմինները՝ հայտարարելով, որ սկսվում է Գազայի իր խաղաղության ծրագրի երկրորդ փուլը։
ՀԱՄԱՍ-ի ներկայացուցիչները հայտարարել են, որ իրենց համար դժվար կլինի գտնել մարմինների մի մասը, քանի որ պատանդները պահվել են տարբեր խմբավորումների կողմից և զոհվել Գազայի հատվածի տարբեր շրջաններում, որոշ մարմիններ էլ կարող են գտնվել պատերազմի ընթացքում ավերված շենքերի փլատակների տակ:
Իսրայելի վարչապետ Բենիամին Նեթանյահուն պնդել է, որ պատերազմը չի կարող ավարտվել, քանի դեռ ՀԱՄԱՍ-ը չի հանձնել զենքը և չի զիջել վերահսկողությունը Գազայի հատվածում: Զինյալները մերժել են այդ պահանջը։
Նման պահանջ է ներկայացրել նաև ԱՄՆ նախագահը: Նա սպառնացել է ՀԱՄԱՍ-ին ռազմական հարվածներով, եթե խմբավորումը չզինաթափվի։ «Եթե նրանք չզինաթափվեն, մենք կզինաթափենք նրանց։ Եվ դա տեղի կունենա արագ ու, հնարավոր է, ուժով»,- ասել է Թրամփը Սպիտակ տանը։
