Ֆրանսիայի նախագահ Էմանուել Մակրոնը պաշտպանության նախկին նախարար Սեբաստիան Լըկորնյուին վերանշանակել է վարչապետի պաշտոնում։ Լըկորնյուն հրաժարական էր ներկայացրել հոկտեմբերի 6-ին՝ վարչապետի պաշտոնում մնալով ընդամենը 27 օր:
Նա իքսի էջում գրել է, որ ընդունում է իրեն վստահված առաքելությունը՝ «պարտականության զգացումից ելնելով»։
Լըկորնյուն խոստացել է «անել հնարավորը՝ մինչև տարեվերջ Ֆրանսիայի պետբյուջեի հետ կապված խնդիրները հասցեագրելու համար»։
«Պետք է վերջ դնենք քաղաքական ճգնաժամին, որը զայրացնում է ֆրանսիացիներին, և անկայունությանը, որն ազդում է Ֆրանսիայի կերպարի և շահերի վրա»,- նշել է պաշտոնյան:
Լըկորնյուն պետք է ձևավորի նոր կառավարություն, ապա ներկայացնի 2026 թվականի բյուջեն, որի նախագծի շուրջ առկա տարաձայնություններն էլ հենց դարձել են նախորդ վարչապետ Ֆրանսուա Բայրուի հրաժարականի հիմնական պատճառը։
Լըկորնյուի անսպասելի վերանշանակմանն ընդառաջ Էմանուել Մակրոնն ընդունել է խորհրդարանում ներկայացված քաղաքական ուժերի առաջնորդներին՝ բացառությամբ ծայրահեղ աջ և ծայրահեղ ձախ կուսակցությունների։
Բյուջետային հարցերի համաձայնեցմանը և կառավարության հետագա ծրագրերին նվիրված հանդիպումից հետո պաշտոնյաները չեն բացառել, որ դեմ կքվեարկեն Լըկորնյուի կառավարությանը:
Ֆրանսիայում սեպտեմբերի 18-ից զանգվածային ցույցեր էին սկսվել:
Հազարավոր մարդիկ դուրս էին եկել փողոցներ, այդ թվում՝ Փարիզում՝ բողոքելու կառավարության տնտեսական խիստ քաղաքականության դեմ:
Քաղաքացիները դժգոհել են իշխանության բյուջետային ծրագրերից, պահանջել չեղարկել նախորդ կառավարության ֆինանսական նախաձեռնությունները, ավելացնել հանրային ծառայությունների համար նախատեսված ծախսերը, մեծացնել հարուստների համար հարկերը և չբարձրացնել կենսաթոշակային տարիքը:
