Հնդկաստանը նավթ գնելու վերաբերյալ որոշումներ կկայացնի՝ հիմք ընդունելով իր պահանջները, ուրբաթ հայտարարել է ֆինանսների նախարար Նիրմալա Սիթհարամանը։
«Հնդկաստանը կշարունակի գնել ռուսական նավթ։ Մենք ինքներս ենք որոշում ինչ գնել՝ մեր պահանջարկը բավարարելու համար, և ինքներս ենք որոշում, թե ումից նավթ գնել»,- նախարարի խոսքն է մեջբերում The Economic Times-ը։
Չինաստանը և Հնդկաստանը ռուսական նավթի ամենամեծ գնորդներն են։ Անցյալ ամիս Վաշինգտոնը լրացուցիչ 25% մաքսատուրք է սահմանել ԱՄՆ ներմուծվող հնդկական արտադրանքի համար՝ կապված Հնդկաստանի կողմից ռուսական նավթի շարունակական գնումների հետ։ Այսպիսով, օգոստոսի 27-ից հնդկական ապրանքները ենթակա են 50% մաքսատուրքի՝ հաշվի առնելով նախկինում սահմանված 25% մաքսատուրքերը՝ որպես ԱՄՆ վարչակազմի կողմից աշխարհի երկրների հետ առևտրային համաձայնագրերի վերանայման մաս։
Հնդկաստանի ԱԳՆ-ն ավելի վաղ հայտարարել էր, որ ԱՄՆ-ի գործողությունները «անարդար են, անհիմն ու անխոհեմ»:
