ՀՀ ԱԺ «Քաղաքացիական պայմանագիր» խմբակցության անդամ Թագուհի Ղազարյանը ֆեյսբուքյան գրառմամբ անդրադարձել է Հայաստանի ամերիկյան համալսարանի՝ դասախոս, ՀՀԿ-ական Սամվել Ֆարմանյանի շուրջ ստեղծված իրավիճակի վերաբերյալ տարածած հայտարարությանը, որում նշվում է․ «ՀԱՀ-ը հավասար հնարավորություններ ապահովող գործատու է և բաց է դասախոսական հաստիքների համար դիմող համապատասխան ակադեմիական որակավորում ունեցող բոլոր թեկնածուների համար՝ անկախ նրանց քաղաքական պատկանելությունից։ Համալսարանն առանձնահատուկ կերպով կարևորում է իր դասախոսական կազմի բազմազանությունը և հպարտ է այն հանգամանքով, որ դասախոսական կազմը ներառում է տարբեր քաղաքական ուժերի ներկայացուցիչներ, այդ թվում՝ «Քաղաքացիական պայմանագիր» կուսակցության բազմաթիվ անդամներ»։
Ղազարյանը տեղեկացրել է, որ ՀԱՀ-ն իր արդեն նախկին գործատուն է։
«Հայաստանի ամերիկյան համալսարանը դասախոս Սամվել Ֆարմանյանի շուրջ ստեղծված իրավիճակի վերաբերյալ հանդես է եկել հայտարարությամբ, որից դժվար է հասկանալ, թե ինչ է հետևելու այս իրավիճակին։ Սակայն գրառմանս նպատակը դա պարզելը չէ․ ՀԱՀ հայտարարության մեջ կան մի շարք վիճելի պնդումներ, որոնց կցանկանայի անդրադառնալ՝ որպես համալսարանի նախկին դասախոս։
Նախ հայտարարության մեջ պնդում է արվում, որ «ՀԱՀ-ը պաշտպանում է իր դասախոսական կազմի անդամների՝ իրենց քաղաքական հայացքներն ազատորեն արտահայտելու իրավունքը՝ պայմանով, որ նրանք հանդես չգան համալսարանի անունից»։
Այս պնդման ֆոնին, ուզում եմ հիշեցնել, որ 2020 թվականի դեկտեմբերին ՀԱՀ մի շարք դասախոսներ հանդես են եկել վարչապետի հրաժարականի պահանջով՝ ներկայանալով հենց Հայաստանի ամերիկյան համալսարանի անունից, ոչ թե որպես սեփական քաղաքական դիրքորոշում, մեջբերում եմ․ «մենք՝ Հայաստանի ամերիկյան համալսարանի («ՀԱՀ») ներքոստորագրյալ դասախոսներս և աշխատակազմի ներկայացուցիչներս, միանում ենք վարչապետ Նիկոլ Փաշինյանի և իր կառավարության անհապաղ հրաժարական տալու հանրային պահանջին»:
Չնայած սրան՝ ՀՀ կառավարությունը երբեք խնդիր չի դարձրել Հայաստանի Հանրապետության համար ճգնաժամային պահին Համալսարանի դրսևորած ոչ կառուցողական կեցվածքը և շարունակել է պահել առողջ աշխատանքային հարաբերություններ։ Հարկ է նշել նաև, որ համալսարանի այս պնդմանը հակասում է նույն Սամվել Ֆարմանյանի օրինակը, որ իր բազմաթիվ հարցազրույցներում ներկայանում է ոչ թե ՀՀԿ նախկին պատգամավոր, այլ ՀԱՀ դասախոս։ Մի բան, ի դեպ, որ համալսարանում աշխատելու ընթացքում ես երբեք չեմ արել՝ պահելով համալսարանի ներքին կանոնադրությունը։
Սակայն հետաքրքիր է նաև, որ օրինակ, երբ ամիսներ առաջ ՀՀԿ-ական ցուցակի նախկին թեկնածու դոկտոր Վահրամ Տեր-Մաթևոսյանը ինձ ներկայացնում էր պայմանագիրս չերկարացնելու հիմքերը, ի թիվս այլ փաստարկների, բարեկամաբար խորհուրդ էր տալիս ընտրել գիտության և քաղաքականության միջև։ Մի բան, որ, չգիտես ինչու, խորհուրդ չի տրվում հակառակ ճամբարի քաղաքական դիրքորոշումն ունեցող դասախոսներին։
Իմ նախկին գործատու Հայաստանի ամերիկյան համալսարանի տարածած հայտարարության մեջ նաև անում է հետևյալ պնդումը․ «Համալսարանն առանձնահատուկ կերպով կարևորում է իր դասախոսական կազմի բազմազանությունը և հպարտ է այն հանգամանքով, որ դասախոսական կազմը ներառում է տարբեր քաղաքական ուժերի ներկայացուցիչներ, այդ թվում՝ «Քաղաքացիական պայմանագիր» կուսակցության բազմաթիվ անդամներ»։
Այս պնդումը նույնպես չի համապատասխանում իրականությանը։ Այս պահին աշնանային կիսամյակի համար համալսարանի դասացուցակները պատրաստ են, դասախոսների հետ պայմանագրերը՝ կնքված, դասախոսների խմբերը՝ համալրված։ Այս հայտարարությունից հետո որքան էլ լավատեսորեն փնտրեցի, բայց չգտա գեթ մեկ ՔՊ-ական, որ աշնանը կշարունակի կամ կսկսի դաս տալ համալսարանում։
Բազմաթիվ պետք չէ, թող համալսարանը մեկ ՔՊ-ականի անուն տա, որ աշխատում է համալսարանում։ Ուշադրություն, ոչ թե աշխատել է, այլ աշխատում է ու, ասենք, այս սեպտեմբերին մտնելու է լսարան։
Հ․ Գ․ Այս գրառմամբ Համալսարանը նախընտրական պայքարի թատերաբեմի վերածած ադմինիստրացիայի հետ աշխատանքս վերականգնելու որևէ միտում չունեմ։ Սրանք պարզապես արձանագրումներ են, որ հարկ համարեցի անել և անցնել առաջ»,- գրել է նա։
Թեմային անդրադառնալով՝ ՔՊ-ական պատգամավոր Վահագն Ալեքսանյանը գրել է․
«Այսինքն՝ ես ճի՞շտ հասկացա, որ Ամերիկյան համալսարանի նորանշանակ դեկանը, ով համատեղությամբ նաև նախկին ՀՀԿ-ական պատգամավորի թեկնածու է, Ամերիկյանում դասավանդող իմ գործընկեր, ՔՊ-ական պատգամավոր Թագուհի Ղազարյանին առաջարկել է ընտրել գիտական ու քաղաքական գործունեության մեջ, հետո առհասարակ նրան զրկել Ամերիկյանում դասաժամերից ու սա այն դեպքում, երբ վարչապետի կնոջ հղի ժամանակվա նկարում արտաքինը ծաղրող, վիրավորող Սամվել Ֆարմանյանը, ով համատեղությամբ նորանշանակ դեկանի հետ նույն ՀՀԿ-ական ցուցակում է եղել՝ ոչ միայն շարունակում է աշխատել Ամերկյանում, այլև կարծես հավելյալ դասաժամեր է ստացել։ Հարգելի American University of Armenia , դուք այս իրավիճակում ոչ մի տրամաբանական, բարոյական, արժեքային խնդիր չե՞ք տեսնում։ Այսօրվա ձեր հրապարկման մեջ նշում էիք, որ խրախուսում եք քաղաքական բազմակարծությունը։ Այսպե՞ս եք խրախուսում։ Անչափ հիասթափված եմ»։
ԱԺ «Քաղաքացիական պայմանագիր» խմբակցության ղեկավար Հայկ Կոնջորյանը նշել է․
«Հայաստանի ամերիկյան համալսարանի ղեկավարությունը պետք է պարզաբանումներ տա այս հարցերին: Մենք ակնկալում ենք բացատրություններ: Չի կարող Ամերիկյան համալսարանի անունն ու հեղինակությունն օգտագործվել Հայաստանի ինքնիշխանության դեմ պայքարի դուրս եկած հակապետական տարրերի կողմից»:
«Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը նույնպես անդրադարձել է թեմային՝ գրելով․
«Խիստ անհանգստացնող են Հայաստանում Ամերիկյան Համալսարանի կողմից կիրառվող երկակի ստանդարտների մասին վկայող արժանահավատ տեղեկությունները: Համալսարանը հայտարարում է, որ դեմ չէ դասախոսների քաղաքական գործունեությանը, քանի դեռ իրենք չեն ներկայանում որպես համալսարանի դասախոս (լրիվ ընդունելի ու նորմալ մոտեցում): Բայց ՀԱՀ-ից հեռացվում է ոչ թե ՀՀԿ-ական Սամվել Ֆարմանյանը, որը աջ ու ձախ իր քաղաքական/հրապարակախոսական գործունեությունում հենց ՀԱՀ-ից է ներկայանում, այլ ՔՊ-ական Թագուհի Ղազարյանը, որը երբեք ՀԱՀ-ի անունից չի ներկայանում: ՀԱՀ-ը Հայաստանի բարձագույն կրթական համակարգի լավագույն կենտրոններից է: Մի շարք ոլորտներում ՀԱՀ-ի դերն անգնահատելի բարձր է և շատ ափսոս է, որ այսպիսի պահվածքով ստվերվում է այդ պայծառ ԲՈւՀ-ը:
Հ.Գ. Իսկ հետո պարզվում է, որ ՀԱՀ-ում որոշ հանգուցային պաշտոնների ՀՀԿ-ականներ են ու ամեն ինչ պարզ է դառնում. մարդիկ անում են այն, ինչ անում էին ամբողջ կրթական համակարգում նախքան հեղափոխությունը»։
