Ազգային ժողովը պատգամավորների նախաձեռնությամբ հուլիսի 3-ին գումարել է արտահերթ նստաշրջան` նախաձեռնողի սահմանված օրակարգով: ՀՀ ԱԺ-ից հայտնում են, որ քննարկվել է ՀՀ ԱԺ «Քաղաքացիական պայմանագիր» խմբակցության կողմից ներկայացված «Բռնության ճանապարհով պետական իշխանությանը տիրանալու անթույլատրելիության և ժողովրդավարության պաշտպանության մասին» ԱԺ հայտարարության նախագիծը:
«ՀՀ Ազգային ժողովը, պաշտպանելով Հայաստանի Հանրապետության տարածքային ամբողջականությունը, ինքնիշխանությունը և վերահաստատելով իր հավատարմությունն իրավունքի գերակայության և սահմանադրական կարգի սկզբունքներին, հիմնվելով ժողովրդավարության և մարդու իրավունքների համամարդկային արժեքների վրա, հավատարիմ մնալով ՀՀ Սահմանադրության անխախտ դրույթին, համաձայն որի՝ իշխանությունը պատկանում է ժողովրդին և ձևավորվում է միայն ժողովրդի կամքի ազատ արտահայտմամբ, մերժելով ահաբեկչությունը, սպառնալիքը և բռնության ցանկացած ձև քաղաքական պայքարում և հանրային կյանքի կազմակերպման մեջ, հիմք ընդունելով ահաբեկչության դեմ պայքարի հարցում ՀՀ ստանձնած միջազգային պարտավորությունները, հայտարարում է, որ խստորեն դատապարտում է Հայաստանի Հանրապետության ինքնիշխանության, սահմանադրական կարգի և օրինական իշխանությունների դեմ նախապատրաստված ահաբեկչության փորձը, որը բացահայտվեց Հայաստանի Հանրապետության իրավապահ մարմինների կողմից 2025 թվականի հունիսին»,- ներկայացնելով հայտարարության նախագիծը՝ նշել է ՀՀ ԱԺ «Քաղաքացիական պայմանագիր» խմբակցության ղեկավար Հայկ Կոնջորյանը:
Նշվել է, որ ահաբեկչության և սահմանադրական կարգի տապալմանն ուղղված ցանկացած գործողություն արժանանալու է ամենախիստ պատժի՝ համաձայն Հայաստանի Հանրապետության Սահմանադրության և օրենքների:
«Ահաբեկչությունը և բռնության ճանապարհով պետական իշխանությանը տիրանալու փորձերն ուղիղ հարված են ՀՀ ինքնիշխանությանն ու ժողովրդին: Դրանք միտված են կազմալուծելու Հայաստանի ժողովրդավարական ինստիտուտները և հարվածելու պետության դիմադրողականությանը՝ ստեղծելով ներքին և արտաքին սպառնալիքներ ՀՀ-ի և ՀՀ ժողովրդի համար»,- նշել է խմբակցության ղեկավարը՝ ընդգծելով, որ բոլոր այն քաղաքական ուժերն ու կազմակերպությունները, որոնք ՀՀ-ում ծավալում են քաղաքական գործունեություն, պետք է աներկբայորեն դատապարտեն այս ահաբեկչության փորձը և երկրում ռազմական հեղաշրջման կամ այլ որևէ բռնի եղանակով սահմանադրական կարգի տապալման բոլոր կոչերը:
Նշվել է, որ ահաբեկչության արդարացման յուրաքանչյուր դրսևորում ուղղված է ՀՀ ինքնիշխանության, տարածքային ամբողջականության և ժողովրդի՝ ընտրությունների միջոցով իշխանություն ձևավորելու սահմանադրական իրավունքի դեմ:
Հայտարարությամբ անընդունելի է համարվել ՀՀ-ում սահմանադրական կարգի տապալման և Հայաստանի դեմ վարվող հիբրիդային հարձակումներում Հայաստանյանց Առաքելական Սուրբ Եկեղեցին ներգրավելու բոլոր փորձերը:
«ՀՀ ԱԺ-ն՝ որպես Հայաստանի ժողովրդի առաջնային մանդատով օժտված լեգիտիմ ներկայացուցչական մարմին, կոչ է անում բոլոր քաղաքական ուժերին, քաղաքացիական հասարակության ներկայացուցիչներին և քաղաքացիներին դատապարտել ահաբեկչությունը և բռնության միջոցով պետական իշխանության զավթման փորձերը, աջակցել ՀՀ օրինական իշխանություններին իրենց սահմանադրական պարտականությունների կատարման մեջ, նպաստել ազգային համերաշխությանը և պետական ինստիտուտների ամրապնդմանը»,- նշել է Հայկ Կոնջորյանը:
Նա տեղեկացրել է, որ խորհրդարանական ընդդիմությունը բոյկոտել է և նիստին չի մասնակցում: Խմբակցության ղեկավարը պատասխանել է պատգամավորների հարցերին՝ անդրադառնալով ծրագրված ահաբեկչությանը, Հայաստանի դեմ վարվող հիբրիդային գրոհներին:
Հարակից զեկուցող, Պետական-իրավական հարցերի մշտական հանձնաժողովի նախագահ Վլադիմիր Վարդանյանը տեղեկացրել է, որ հանձնաժողովի նիստում բավականին մանրամասն քննարկվել է հայտարարության նախագիծը: Նշելով, որ նախագիծը դրական եզրակացություն է ստացել հանձնաժողովում՝ նա առաջարկել է այն դրական քվեի արժանացնել:
«Ահաբեկչության դեմ պայքարը Հայաստանի ստանձնած միջազգային պարտավորությունների մաս է»,- ընդգծել է հանձնաժողովի նախագահը:
Հայտարարության առնչությամբ ելույթ են ունեցել պատգամավորները՝ անդրադառնալով ներքաղաքական խնդիրներին, ապօրինի կերպով իշխանափոխությանն ու ահաբեկչությամբ իշխանության գալու անթույլատրելիությանը, հոկտեմբերի 27-ի և մարտի 1-ի ոճրագործություններին, դրանց չկանխմանը, պետության դեմ նախապատրաստվող ռազմական հեղաշրջման անթույլատրելիությանը և այլ հարցերի:
«Սա լինելու է պատմական հայտարարություն: Մենք պիտի այս հայտարարությունն ընդունենք, ուղերձը տանք, որպեսզի կանխենք հաջորդ ահաբեկչությունները: Եթե 1999 թվականի հոկտեմբերի 27-ից հետո այն ժամանակվա խորհրդարանը լեգիտիմ լիներ և արձանագրեր, դատապարտեր, քաղաքական կանոն ամրագրեր, ես վստահ եմ, որ չէր լինի մարտի 1-ը»,- եզրափակիչ ելույթում ասել է «Քաղաքացիական պայմանագիր» խմբակցության ղեկավար Հայկ Կոնջորյանը՝ անդրադառնալով նաև այդ ժամանակներում տեղի ունեցած ընտրակեղծիքներին և իշխանազավթմանը:
Նա կոչ է արել պատգամավորներին կողմ քվեարկել ԱԺ հայտարարության նախագծին: Երկրորդ ընթերցմամբ քննարկվել է պատգամավոր Նարեկ Ղահրամանյանի հեղինակած «Գովազդի մասին» և «Շահումով խաղերի, ինտերնետ շահումով խաղերի և խաղատների մասին» օրենքներում փոփոխություններ նախատեսող օրենսդրական փաթեթը:
Նարեկ Ղահրամանյանը ներկայացրել է առաջինից երկրորդ ընթերցում ընկած ժամանակահատվածում կատարված որոշ փոփոխություններ: Օրենքի ուժի մեջ մտնելու ժամկետ է սահմանվել պաշտոնական հրապարակման հաջորդող տասներորդ օրը: Տնտեսական հարցերի մշտական հանձնաժողովի անդամ Ալեքսանդր Ավետիսյանը ներկայացրել է հանձնաժողովի դրական եզրակացությունը:
ՀՀ էկոնոմիկայի նախարար Գևորգ Պապոյանի խոսքով՝ կազինոների և շահումով խաղերի գովազդների տեղադրման հնարավորությունը սահմանափակվում է նաև դեռևս թույլատրելի որոշ հատվածներում, օրինակ՝ օդանավակայանում, հյուրանոցներում: Խորհրդարանը քվեարկությամբ ընդունել է քննարկված հարցերը:
