Փոխվարչապետ Մհեր Գրիգորյանն ընդունել է Արժույթի միջազգային հիմնադրամի (ԱՄՀ) հայաստանյան առաքելության ղեկավար Իվա Պետրովային, որն ավարտում է գործունեությունը առաքելության ղեկավարի պաշտոնում: Հանդիպմանը ներկա են եղել նաև Հայաստանում ԱՄՀ մշտական ներկայացուցիչ Ումանգ Ռավաթը և Ալեքսանդր Թիմանը, որն ստանձնելու է ԱՄՀ հայաստանյան առաքելության ղեկավարի պաշտոնը: Այս մասին տեղեկացնում են Կառավարության մամուլի ծառայությունից:
Հանդիպման սկզբում փոխվարչապետն ընդգծել է ԱՄՀ հետ համագործակցության առանցքային նշանակությունը Հայաստանի համար՝ կարևորելով ԱՄՀ պահուստային ծրագրի ներքո կատարված բարեփոխումները:
Զրուցակիցները քննարկել են հարկաբյուջետային և տնտեսական քաղաքականությանը վերաբերող մի շարք հարցեր, մտքեր փոխանակել տարածաշրջանային զարգացումների շուրջ:
