Հորդանան գետի արևմտյան ափը և Գազայի հատվածը վաճառքի, սակարկման կամ փոխանակման ենթակա չեն, հայտարարել են Պաղեստինի արտաքին գործերի նախարարությունից: Գերատեսչությունից կոչ են արել միջազգային հանրությանը դիմակայել այս քաղաքականությանը, աշխատել ՄԱԿ-ի Անվտանգության խորհրդի ակտիվացման ուղղությամբ, որպեսզի այն կարողանա կատարել Պաղեստինի հարցով ՄԱԿ-ի բանաձևերի իրագործման և միջազգային խաղաղության ու անվտանգության պահպանման գործում իր պարտականությունները: ԱՄՆ նախագահ Դոնալդ Թրամփը փետրվարի 9-ին հայտարարել էր, որ մտադիր է գնել Գազայի հատվածը:
«Ինչ վերաբերում է վերակառուցմանը, կարող ենք թույլատրել Մերձավոր Արևելքի այլ պետությունների, որպեսզի նրանք վերակառուցեն Գազայի տարբեր հատվածներ, դա կարող են ուրիշներն անել մեր հովանավորության ներքո: Բայց մենք պարտավոր ենք ապահովել, որ Համասը չվերադառնա», - հայտարարել էր Դոնալդ Թրամփը:
Թուրքիայի նախագահ Ռեջեփ Թայիփ Էրդողանը նույնպես քննադատել է Դոնալդ Թրամփի՝ պաղեստինցիներին վերաբնակեցնելու ծրագիրը։ Նա ընդգծել է, որ ոչ ոք իրավունք չունի Գազայի բնակիչներին վտարել իրենց հայրենիքից։
«Իսրայելի վերնախավի ճնշման ներքո ԱՄՆ նոր վարչակազմի կողմից Գազայի հետ կապված առաջարկները քննարկման արժանի չեն», - մեկնաբանել է Էրդողանը Թրամփի ծրագիրը։
Թուրք առաջնորդի խոսքով՝ Պաղեստինը, ներառյալ Գազայի հատվածը, Հորդանան գետի արևմտյան ափը և Արևելյան Երուսաղեմը, պատկանում են պաղեստինցիներին։ Էրդողանը նաև նշել է, որ Գազայի հատվածից պաղեստինցիներին հեռացնելու ցանկացած փորձ՝ անկախ ձևից, դատապարտված է ձախողման։
Թուրքիայի նախագահի խոսքով՝ տարածաշրջանում խաղաղության, կայունության ու զարգացման հասնելու համար անհրաժեշտ է ոչ թե սրել իրավիճակը, այլ ճանաչել պաղեստինցիների իրավունքները։
Միջազգային նորությունները՝ Մերի Ներսիսյանի ռեպորտաժում։
