ԱԺ տնտեսական հարցերի մշտական հանձնաժողովը հունվարի 15-ի նիստում երկրորդ ընթերցմամբ քննարկել է մի շարք օրենքների նախագծեր:
««Երկակի նշանակության ապրանքների արտահանման, Հայաստանի Հանրապետության տարածքով դրանց տարանցիկ փոխադրման, ինչպես նաև երկակի նշանակության տեղեկատվության և մտավոր գործունեության արդյունքների փոխանցման նկատմամբ հսկողության մասին» օրենքում լրացում կատարելու մասին» և ««Լիցենզավորման մասին» օրենքում լրացում կատարելու մասին» օրենսդրական փաթեթն առաջին ընթերցմամբ ընդունելուց հետո փոփոխությունները միայն բովանդակային բնույթ են կրել: ԱԺ մամուլի ծառայության փոխանցմամբ՝ այս մասին հայտնել է ՀՀ բարձր տեխնոլոգիական արդյունաբերության նախարար Մխիթար Հայրապետյանը: Հիմնական կարգավորումները՝ այստեղ:
Նախարարի խոսքով՝ հիմնական նպատակը գործարար միջավայրի, հատկապես՝ տեխնոլոգիական խոշոր ընկերությունների համար բարենպաստ պայմանների ապահովումն է:
ՀՀ հարկային օրենսգրքում առաջարկվող լրացումները քննարկման է ներկայացրել ՀՀ կադաստրի կոմիտեի ղեկավար Սուրեն Թովմասյանը:
Նշվել է, որ փոփոխությամբ կարգավորումը տարածվելու է 2021 թվականի հունվարի մեկից ծագած իրավահարաբերությունների վրա: Այսինքն՝ երբ շտկումներ կկատարվեն, համապատասխանաբար գույքահարկի հաշվարկի մեխանիզմը կգործի, և տարբերությունը կվճարի քաղաքացին, իսկ տարբերության մասով հաշվարկվող տույժերն օրենքի ընդունումից հետո կզրոյացվեն:
ԱԺ պատգամավորներ Ալխաս Ղազարյանի, Հակոբ Արշակյանի, Բաբկեն Թունյանի, Սոնա Ղազարյանի, Արուսյակ Ջուլհակյանի, Արսեն Թորոսյանի, Մարիամ Պողոսյանի և Հասմիկ Հակոբյանի հեղինակած «Առևտրի և ծառայությունների մասին» և կից օրենքներում փոփոխություններ առաջարկող օրենսդրական փաթեթը խորհրդարանն արդեն ընդունել է առաջին ընթերցմամբ:
Առաջին ընթերցումից հետո Կառավարությունը ներկայացրել է տեխնիկական փոփոխության մեկ առաջարկ: Համահեղինակ Ալխաս Ղազարյանը հնչեցրել է իր առաջարկը, որը ևս տեխնիկական բնույթի էր:
«Թանկարժեք մետաղների մասին» օրենքում նախատեսվող փոփոխությունը և լրացումները ևս քննարկվել են երկրորդ ընթերցմամբ: ՀՀ էկոնոմիկայի նախարարի տեղակալ Էդգար Զաքարյանը պարզաբանել է, որ նախաձեռնության շահառուները թանկարժեք զարդեր արտադրելու և վաճառելու իրավունք ունեցողներ են, որոնք դա իրականացնում են հատուկ տարբերանշանի առկայությամբ: Հիմնական կարգավորումները՝ այստեղ:
Առաջին ընթերցումից հետո փոփոխություններ չեն եղել: Հիմնական զեկուցողի առաջարկով օրենքն ուժի մեջ կմտնի պաշտոնական հրապարակումից 6 ամիս հետո:
Հարկային օրենսգրքում առաջարկվող նոր կարգավորումներն առաջին ընթերցմամբ ընդունվելուց հետո տեխնիկական երկու փոփոխություն է կատարվել: Այս մասին հայտնել է էկոնոմիկայի փոխնախարար Սևակ Միքայելյանը: Նա պարզաբանել է, որ բիզնեսի համար որոշակի թեթևացվում է տուգանքների ռեժիմը: Գործող օրենսդրությամբ տնտեսավարող սուբյեկտների կողմից ՀԴՄ կտրոնների շահագործման հետ կապված խախտումների դեպքում բոլորի համար միատեսակ տուգանք է նախատեսված: Առաջարկվում է ԱՏԳ կոդերի մասով տեխնիկական խնդիրներ առաջանալու դեպքում առաջին խախտման համար տրվի նախազգուշացում, մեկ տարվա ընթացքում նույն խախտումը կրկնելու դեպքում նշանակվի 50.000 դրամ տուգանք՝ գործող 200.000-ի և նվազագույն շեմերի փոխարեն: Մնացած դեպքերում, երբ ՀԴՄ կտրոնի շահագործման խախտումը կբերի բյուջետային մուտքերի կամ գումարի թերարժեք ներկայացման, ապա փոփոխություն չի նախատեսվի: Ըստ փոխնախարարի՝ հատկապես փոքր և միջին բիզնեսի համար կարևոր փոփոխություն է: Այսպիսով՝ «ապրանքային կոդ» արտահայտությունը կփոխարինվի «ԱՏԳ կոդ» արտահայտությամբ: Կփոխվի նաև օրենքի ընդունման ժամկետը. 2025 թվականի հունվարի մեկի փոխարեն այն ուժի մեջ կմտնի մարտի 3-ին:
Հայաստանի Հանրապետության հարկային օրենսգրքում առաջարկվող հաջորդ փոփոխությունը ևս վերաբերում է ՓՄՁ-ների համար վարչարարության մեղմացմանը և արդարացի ու համաչափ մոտեցումների կիրառմանը: Առաջինից երկրորդ ընթերցում ընկած ժամանակահատվածում փոփոխություններ չեն եղել:
Կառավարության ներկայացուցչի առաջարկով օրենքն ուժ մեջ կմտնի հրապարակման հաջորդ օրվանից և կտարածվի հունվարի մեկից ծագած հարաբերությունների վրա:
Մինչև երկու ամիս ժամկետով հետաձգվել են Կառավարության հեղինակած Հարկային օրենսգրքում առաջարկվող լրացումներին և փոփոխությանը վերաբերող նախագծի ու «ՀՀ հարկային օրենսգրքում լրացումներ և փոփոխություններ կատարելու մասին» ու ««ՀՀ հարկային օրենսգրքում փոփոխություններ կատարելու մասին» 2024 թվականի հունիսի 12-ի ՀՕ-285-Ն օրենքում լրացումներ կատարելու մասին» օրենսդրական փաթեթի, ինչպես նաև ԱԺ պատգամավոր Բաբկեն Թունյանի ներկայացրած ««Պետական տուրքի մասին» օրենքում լրացումներ և փոփոխություն կատարելու մասին» օրենքում փոփոխություն կատարելու մասին» և «ՀՀ հարկային օրենսգրքում լրացումներ կատարելու մասին» օրենքների նախագծերի քննարկումները:
