Եվրասիական տնտեսական միության (ԵԱՏՄ) մասնակից երկրների ղեկավարները հավանություն են տվել Մոնղոլիայի հետ ազատ առևտրի ժամանակավոր համաձայնագրի կնքման բանակցությունների մեկնարկին։ Մոնղոլիան ԵԱՏՄ դիտորդ երկրներից է:
Որոշումն ընդունվել է չորեքշաբթի Մոսկվայում ԵԱՏՄ-ի հոբելյանական գագաթնաժողովի շրջանակներում կայացած Եվրասիական տնտեսական բարձրագույն խորհրդի նիստում։
Ռուսաստանի Դաշնության տնտեսական զարգացման նախարարության տվյալով՝ սկզբնական փուլում Մոնղոլիայի հետ ազատ առևտրի գոտու մասին համաձայնագիրը կընդգրկի արդյունաբերական և գյուղատնտեսական ապրանքների սահմանափակ տեսականի՝ մոտ 400 ապրանք։ Ապագայում կողմերը կկարողանան պայմանավորվել ազատ առևտրի լայնածավալ համաձայնագրի կնքման շուրջ։
Ներկայումս Մոնղոլիան ունի միայն մեկ պայմանագիր Ճապոնիայի հետ, որը սահմանում է առևտրի արտոնյալ պայմաններ։ Մյուս երկրները Մոնղոլիայի հետ նման ռեժիմ չունեն։
