ՀՀ-ԱԴՐԲԵՋԱՆ ԽԱՂԱՂՈՒԹՅԱՆ ՀԱՄԱՁԱՅՆԱԳԻՐԸ ՀԱՍԱՆԵԼԻ Է. ՄԻԼԼԵՐ
Խաղաղության համաձայնագրին հասնելու համար ԱՄՆ-ը կշարունակի աշխատել Հայաստանի ու Ադրբեջանի հետ,- ճեպազրույցի ընթացքում հայտարարել է Պետքարտուղարության խոսնակը՝ անդրադառնալով Մոսկվայից վերջերս հնչած հայտարարությանը, թե «հապճեպ» պատրաստված փաստաթուղթը հակամարտության վտանգ է պարունակում։ Մեթյու Միլլերը ընդգծել է՝ «չնայած այս հարցում կողմ չհանդիսացող այլ երկրի մեկնաբանություններին»՝ Հայաստանի և Ադրբեջանի միջև խաղաղության համաձայնագիրը հասանելի է»։
Մեթյու Միլլերը ճեպազրույցի անդրադարձել է նաև ԱՄՆ պետքարտուղար Էնթոնի Բլինքենի և Թուրքիայի արտգործնախարար Հաքան Ֆիդանի հեռախոսազրույցին։ Հայաստանի և Ադրբեջանի միջև հարաբերությունների կարգավորման գործընթացում Թուրքիայի դերի մասին խոսելիս՝ Միլլերը նշել է․ «Հեռախոսազրույցի վերաբերյալ մանրամասներ չեմ ուզում նշել․ դա մասնավոր դիվանագիտական խոսակցություն էր: Միայն կասեմ, որ մենք հավատում ենք, որ Թուրքիան կարող է արդյունավետ դեր ունենալ այս հարցում, ինչպես այլ հարցերում»։
«Խոշտանգումների զոհերի աջակցության կենտրոնի» նախագահ և գործադիր տնօրեն դոկտոր Սայմոն Ադամսը հայտարարել է, որ համացանցում ադրբեջանամետ օգտահաշիվներից իրեն պարբերաբար վիրավորում են՝ Լաչինի միջանցքի և Լեռնային Ղարաբաղի շրջափակումը դադարեցնելու իր կոչերի համար։
«Նշեմ, որ ես հայ կամ ամերիկացի չեմ։ Ես պարզապես հավատում եմ մարդու իրավունքներին և մարդասիրությանը: Եվ ես կշարունակեմ գրել Twitter-ում»,- իր միկրոբլոգում գրել է Ադամսը։
ՊԵՏՔ Է ԴԱԴԱՐԵՑՆԵԼ ԱԴՐԲԵՋԱՆԻՆ ՏՐԱՄԱԴՐՎՈՂ ՕԳՆՈՒԹՅՈՒՆԸ. ՇԻՖ
Այն օրվանից, երբ սկսվեց Լաչինի միջանցքի արգելափակումը, ես Կոնգրեսի իմ գործընկերների և երկրի հայերի հետ կոչ եմ արել Սպիտակ տանը, պետքարտուղարությանը և Միջազգային զարգացման գործակալությանը միջոցներ ձեռնարկել ԼՂ ժողովրդի և նրա ինքնորոշման իրավունքի պաշտպանության համար,-՝ Facebook-ի իր էջում գրել է ԱՄՆ Կոնգրեսի Ներկայացուցիչների պալատի անդամ Ադամ Շիֆը։
«Ադրբեջանի կողմից Կարմիր խաչի միջազգային կոմիտեին Արցախ կենսական անհրաժեշտ մարդասիրական օգնություն հասցնելու և անհետաձգելի բժշկական օգնության կարիք ունեցող հիվանդներին Արցախից դուրս բերելու թույլտվության մերժման հետևանքով միջազգային հանրության կողմից գործողություններ ձեռնարկելու և հակամարտության տևական լուծում գտնելու անհրաժեշտությունն օրեցօր աճում է: Ես համառորեն կոչ եմ արել Ադրբեջանին վերացնել շրջափակումը և թույլ տալ, որ մարդասիրական օգնությունն ազատ տեղաշարժվի Լաչինի միջանցքով, և ես կոչ եմ արել նախագահ Բայդենին անհապաղ քայլեր ձեռնարկել Արցախում ստեղծված ծանր իրավիճակը կարգավորելու համար»- նշել է Շիֆը։
Նա շեշտել է, որ միշտ անսասան է եղել ԼՂ ժողովրդի հիմնարար իրավունքների պաշտպանությունն ապահովելու իր հանձնառության մեջ՝ դատապարտելով հրադադարի ռեժիմի խախտումները, հանդես գալով հայ ռազմագերիների ազատ արձակման օգտին, կոչ անելով պատժամիջոցներ կիրառել և պատասխանատվության ենթարկել Ադրբեջանին։
Շիֆի կարծիքով՝ ԼՂ անվտանգությունն ապահովելու համար ԱՄՆ-ը պետք է օգտագործի իր տրամադրության տակ եղած բոլոր գործիքները, այդ թվում՝ ԼՂ-ին մարդասիրական օգնության տրամադրումը, Ադրբեջանին տրամադրվող ռազմական և այլ օգնության դադարեցումը և ճգնաժամի պատասխանատուների նկատմամբ պատժամիջոցների սահմանումը։
«Ես միշտ կլինեմ Հայաստանի և Արցախի ժողովրդի կողքին»,- հավաստիացրել է Շիֆը։
Մեծ Բրիտանիայի կառավարությունը ևս 500 հազար ֆունտ ստեռլինգ է հատկացրել Ադրբեջանին ականազերծման աշխատանքների համար: Այդ մասին հայտարարել է Բաքվում Մեծ Բրիտանիայի դեսպան Ֆերգուս Օլդը։
Նրա խոսքով՝ այս միջոցները հատկացվում են Ադրբեջանի Ականազերծման գործողությունների գործակալության և ՄԱԿ-ի Զարգացման ծրագրի համագործակցության շրջանակում:
Դիվանագետը նշել է, որ 2020 թվականից ի վեր Մեծ Բրիտանիան ականների սպառնալիքի դեմ պայքարելու համար Ադրբեջանին հատկացրել է մոտ 1,5 միլիոն ֆունտ ստեռլինգի աջակցություն։
ԱՄՆ-Ն 200 ՄԼՆ ԴՈԼԱՐԻ ՌԱԶՄԱԿԱՆ ՕԳՆՈՒԹՅՈՒՆ ԿՏՐԱՄԱԴՐԻ ՈՒԿՐԱԻՆԱՅԻՆ
Միացյալ Նահանգները այսօր մտադիր է հայտարարել Ուկրաինային 200 մլն դոլարի ռազմական օգնության նոր փաթեթ հատկացնելու մասին՝ հաղորդում է Reuters-ը։ Գործակալության աղբյուրի տվյալով՝ փաթեթը կներառի հակատանկային հրթիռային համալիրներ, ականազերծման միջոցներ և Patriot զենիթահրթիռային համալիրների զինամթերք:
Ավելի վաղ Վաշինգտոնը խոստովանել էր, որ թյուրիմացության պատճառով սխալ էր գնահատել Կիևին փոխանցված սպառազինության մի մասի արժեքը, որը ուռճացված է եղել մոտ 6,2 մլրդ դոլարով: Այժմ ԱՄՆ-ն ձեռնամուխ է լինում Ուկրաինային այդ գումարի չափով ռազմական օգնության տրամադրմանը:
ԲԵԼԱՌՈՒՍԻ ՀԵՏ ԼԻՏՎԱՅԻ ՍԱՀՄԱՆԻ ՊԱՀՊԱՆՈՒԹՅՈՒՆԸ ԿՈՒԺԵՂԱՑՎԻ
Բելառուսի հետ Լիտվայի սահմանի պահպանությունը կուժեղացվի լրացուցիչ անձնակազմի ներգրավմամբ։ Այդ մասին հայտնել է Լիտվայի ներքին գործերի նախարարությանն առընթեր պետական սահմանի պահպանության ծառայության պետ Ռուստամաս Լյուբաևասը։ Նրա խոսքով՝ իրադրության փոփոխությանն արձագանքելու համար ամենակարճ ժամանակահատվածում հնարավոր կլինի լրացուցիչ ուժեր տեղակայել սահմանի մոտ։ Պաշտոնյայի գնահատմամբ, սակայն, սահմանին իրավիճակը մնում է կայուն, բայց լարվածությունը պահպանվում է։ Լիտվան սահմանի համար հիմնական սպառնալիք է համարում Բելառուսում «Վագներ» մասնավոր ռազմական ընկերության մարտիկների ներկայությունը:
Լեհաստանը նույնպես լրացուցիչ հազար զինծառայող է տեղափոխում Բելառուսի հետ սահման: Այդ մասին հայտնել է Հանրապետության պաշտպանության նախարարությունը։ Գերատեսչությունը նման քայլը բացատրել է «լեհ-բելառուսական սահմանին դինամիկ իրավիճակով և սահմանապահ ծառայության պարետի պահանջով: Ըստ գերատեսչության անցած տարվա ընթացքում ավելացել է Բելառուսից Լեհաստանի տարածքով դեպի ԵՄ անցնել փորձող անօրինական ներգաղթյալների թիվը: Երկու երկրների սահմանին արդեն հերթապահում է 2 հազար լեհ զինծառայող։