Երևանի պետական համալսարանում այսօր մեկնարկել է «Գիտության, կրթության և արտադրության ինտեգրումը` տնտեսության արդիականացման շարժիչ ուժ» հայ-ռուսական գիտակրթական երկօրյա համաժողովը, որին մասնակցել է շուրջ 200 պատվիրակ:
Ինչպես տեղեկացնում են ԿԳՄՍՆ-ից՝ համաժողովի բացմանը ներկա են եղել ՀՀ ԿԳՄՍ նախարար Ժաննա Անդրեասյանը, ՌԴ լուսավորության նախարար Սերգեյ Կրավցովը, ՌԴ գիտության և բարձրագույն կրթության նախարարի տեղակալ Կոնստանտին Մոգիլյևսկին, ՀՀ ԳԱԱ նախագահ Աշոտ Սաղյանը, ԵՊՀ ռեկտոր Հովհաննես Հովհաննիսյանը, Մոսկվայի Մ. Լոմոնոսովի անվան պետական համալսարանի ռեկտոր Վիկտոր Սադովնիչին, ՀՀ և ՌԴ բուհերի ու գիտական կազմակերպությունների, կառավարման և բիզնես ոլորտի ներկայացուցիչներ։
Շնորհավորելով համաժողովի պատվիրակներին՝ ԿԳՄՍ նախարար Ժաննա Անդրեասյանը նշել է, որ կրթության որակի ապահովման և երկու երկրների գիտակրթական ներուժի զարգացման պատասխանատուների և մասնագետների հանդիպման հնարավորությունը ողջունելի է. «Ուրախ ենք, որ հնարավորություն ունենք ևս մեկ անգամ քննարկելու համագործակցության հեռանկարները և ոլորտում առկա խնդիրները: Հուսով եմ՝ այս երկու օրերի ընթացքում կկարողանանք նախանշել նոր համագործակցության ծրագրեր: Ժամանակակից մարտահրավերներն ամբողջ աշխարհում ավելի են ընդգծում կրթության և գիտության հիմնախնդիրները, քանի որ դրանք նաև հաճախ համարվում են տնտեսական արդիականացման հիմնական շարժիչ ուժը։ Գիտության և կրթության ոլորտում հայ-ռուսական հարաբերությունները ոչ միայն շարունակում են զարգանալ, այլև ձեռք են բերում նոր ձևաչափեր»:
Նախարարը նաև նշել է, որ նախատեսված են մի շարք հուշագրերի ստորագրում երկու երկրների բուհերի միջև, ինչը լավ հնարավորություն է յուրաքանչյուր հաստատության համար նոր ծրագրերի իրագործման, համագործակցության, դասախոսների և ուսանողների փոխանակման առումով: Ժաննա Անդրեասյանը համաժողովի մասնակիցներին արդյունավետ աշխատանք, հետաքրքիր և կառուցողական քննարկումներ է մաղթել:
ԶԼՄ-ների հետ հարցուպատասխանի ընթացքում Հայաստանում ռուսական դպրոցներ բացելու վերաբերյալ հարցին ի պատասխան՝ Ժաննա Անդրեասյանը տեղեկացրել է, որ աշխատանքային խմբերը ձևավորված են, հեռավար ձևաչափով կայացել են մի քանի հանդիպումներ:
«Հարցերը քննարկում ենք հիմնականում 2 ուղղությամբ. առաջինը համագործակցությունն է` ՀՀ օրենսդրության շրջանակում, որի շատ լավ օրինակը մենք ունենք Հայ-չինական դպրոցի փորձով: Երկրորդ ուղղությունը Հայաստանում գտնվող ՌԴ քաղաքացիների կրթական իրավունքի ապահովումն է, և այս ուղղությամբ ևս քննարկումներ են ընթանում: Խնդիրը մեր ուշադրության կենտրոնում է. պատրաստակամ ենք ամեն կերպ կարգավորել հարցերը»,- ասել է նա:
ՌԴ լուսավորության նախարար Սերգեյ Կրավցովն իր հերթին նշել է, որ ռուսական կողմը հետաքրքրված է Հայաստանի կրթական հաջողված ծրագրերի փորձով: Նա, մասնավորապես, անդրադարձել է դպրոց-թանգարան համագործակցային ծրագրերին և նշել, որ այդ փորձը ՌԴ դպրոցներում ևս կարող է կիրառվել:
Անդրադառնալով Հայաստանում ռուսերենի ուսուցման զարգացմանը` Սերգեյ Կրավցովը նշել է. «Հայկական դպրոցներում ռուսերեն դասավանդվում է 2-12-րդ դասարաններում, և մենք պատրաստ ենք ապահովել մեթոդական, ուսուցիչների վերապատրաստման աջակցություն»: ՌԴ լուսավորության նախարարը նաև տեղեկացրել է, որ Ռուսաստանի որոշ դպրոցներում դասավանդվում է հայոց լեզու, որի զարգացման ուղղությամբ ևս պատրաստ են օրենսդրության սահմաններում աջակցություն ցուցաբերել:
«Երկու երկրների նպատակը նույնն է՝ դպրոցականների որակյալ կրթության ապահովումը, և այս առումով մեր հետաքրքրությունների շրջանակները համընկնում են»,- եզրափակել է ՌԴ լուսավորության նախարարը:
ՌԴ գիտության և բարձրագույն կրթության նախարարի տեղակալ Կոնստանտին Մոգիլյևսկին հույս է հայտնել, որ համաժողովը նոր ազդակ կտա երկու երկրների համագործակցությանը:
«Կա մի հայկական բառ, որն ամբողջովին արտացոլում է այն ամենն, ինչ այստեղ տեղի է ունենում՝ «բարեկամություն»: Շնորհակալ եմ բոլոր այն մարդկանց, որոնք իրենց ներդրումն են ունեցել նմանօրինակ համաժողովի կազմակերպման համար: Վստահ եմ՝ արդյունավետ երկխոսություն ենք ունենալու: Քննարկելու ենք կրթության ու գիտության ոլորտում համատեղ ծրագրերի իրականացման հարցեր, այդ թվում՝ ուսանողների փոխանակման, գիտահետազոտական ծրագրերի իրականացման հետ կապված: 34 բարձրագույն ուսումնական հաստատության, 21 գիտական կենտրոնների ավելի քան բազմաթիվ ներկայացուցիչներ այստեղ են՝ հայ ընկերների հետ խոսելու համատեղ նախագծերի և համագործակցության շարունակականության ապահովման մասին»,- ասել է Կոնստանտին Մոգիլյևսկին` ընդգծելով, որ Հայ-ռուսական համալսարանի գործունեությունը համագործակցության լավագույն օրինակ է:
Ռուսաստանի Դաշնության նախագահի` միջազգային մշակութային համագործակցության հարցերով հատուկ ներկայացուցիչ Միխայիլ Շվիդկոյի խոսքով` հայ-ռուսական մշակութային և կրթական համագործակցությունը բարձր մակարդակի վրա է և ամուր հիմքեր ունի. «Պատահական չէ, որ այս օրերին, երբ մենք Հայաստանում ենք, անցկացվում են Արամ Խաչատրյանի ծննդյան 120-ամյակին նվիրված միջոցառումները: Պետք է նշեմ, որ Ռուսաստանի բարձրագույն ուսումնական հաստատություններում համեմատաբար քիչ հայ ուսանողներ են սովորում և Երևանում նույնպես ավելի քիչ ՌԴ քաղաքացի ուսանողներ են սովորում, քան կարող են սովորել: Բայց սա, կարծում եմ, լուծելի խնդիր է»:
Ողջույնի խոսքով հանդես են եկել նաև ԵՊՀ ռեկտոր Հովհաննես Հովհաննիսյանը, Մոսկվայի Մ. Լոմոնոսովի անվան պետական համալսարանի ռեկտոր Վիկտոր Սադովնիչին:
«Բուհերի միջև միջազգային համագործակցությունն այսօր ներառում է նոր ոլորտներ, զարգանում ու կատարելագործվում են տարբեր մեխանիզմներ, ի հայտ են գալիս նոր խնդիրներ ու գործիքներ, սակայն պահպանվում է առաջնահերթությունների, սկզբունքների ու նպատակների շարունակականությունը։
Միևնույն ժամանակ՝ այսօր անհրաժեշտություն կա ամրապնդելու գիտական նախագծերի ու կրթական ծրագրերի համատեղ մշակմամբ ու իրականացմամբ միջազգային համագործակցությունը, ինչը պետք է իրականացվի ակադեմիական շարժունակության ընդլայնման և կրթության որակի կառավարման համակարգերի զարգացման միջոցով»,- նշել է ԵՊՀ ռեկտոր Հովհաննես Հովհաննիսյանը։
ՌԴ ռեկտորների միության անունից ողջունելով ֆորումի մասնակիցներին՝ Վ. Ա. Սադովնիչին կարևորել է հայ-ռուսական համագործակցության շրջանակում իրականացված համատեղ գիտական աշխատանքները.
«Անցյալ ամսվա վերջին հանդիպում ունեցանք ԵՊՀ ռեկտորի հետ և քննարկեցինք մեր համալսարանների համագործակցության շրջանակի ընդլայնման հնարավորությունները: Այսօր ուրախ ենք ԵՊՀ-ում երկկողմ համաձայնագիր կնքելու համար և մեծ սիրով կընդունենք բոլոր այն առաջարկները, որոնք միտված կլինեն կրթության և գիտության զարգացմանը»:
Սադովնիչին շնորհակալություն է հայտնել ՀՀ ԿԳՄՍ նախարարությանը և ԵՊՀ-ին՝ միջոցառումը բարձր մակարդակով կազմակերպելու համար:
Համաժողովի շրջանակում ստորագրվել են մի շարք համագործակցության փաստաթղթեր ՀՀ և ՌԴ բուհերի միջև:
