Ապրիլի սկզբին Նախիջևանից Հայաստանի տարածքն ապօրինի հատած, Պղնձամոլիբդենային կոմբինատի պահնորդին սպանելու համար մեղադրվող ադրբեջանցի զինծառայող Հուսեյին Ախունդովը դատարան ներկայացվեց ԱԱԾ ծառայողների ուղեկցությամբ. Սյունիքի մարզի ընդհանուր իրավասության դատարանի Կապանի նստավայրում սկսվեց նրա գործով առաջին նիստը:
Դատարանը նախ քննեց Ախունդովի խափանման միջոց կալանքը երկարաձգելու կամ փոփոխելու հարցը, ամբաստանյալը հայտարարեց՝ կողմ է, որ մնա կալանքի տակ: Դատարանը որոշեց երեք ամսով երկարաձգել:
Նապոլեոն Օհանյան (դատավոր) - Վերջինս կարող է խոչընդոտել քրեական վարույթին, դիմել փախուստի, կատարել հանցանք:
Պահնորդ Հայրապետ Մելիքսեթյանին սպանելու, պետական սահմանն ապօրինի հատելու, հրազեն և ռազմամթերք ապօրինի տեղափոխելու համար մեղադրվող ադրբեջանցի զինծառայողն ամբողջությամբ ընդունել է մեղքը, զղջում է կատարվածի համար:
Լրագրողները միայն նախնական լսումների փուլում հնարավորություն ունեցան մասնակցել նիստին, ինչից հետ այն քննվեց դռնփակ, քանի որ սահմանն ապօրինի հատելու դրվագը պետական գաղտնիք է պարունակում:
Տուժողի ներկայացուցիչը լրագրողների հետ զրույցում ասաց՝ նիստը դռնփակ քննելու որոշումը արդարացված էր:
Փաստաբանն ասաց, որ այս նիստին դատարանը հետազոտեց գործում առկա գրավոր ու իրեղեն ապացույցները: Մյուս նիստին դատարանը կհարցաքննի վկաներին, վերջում ցուցմունք կտա ամբաստանյալը: Ադրբեջանցի զինծառայողը, որը համածառայակցի հետ հատել էր պետական սահմանը, պահնորդի սպանությունից հետո հափշտակել էր տուժողի հեռախոսն ու տեսաուղերձ նկարել, հրապարակել սոցիալական ցանցի իր էջում` նշելով, թե եկել են Հայաստան, հայերի արյուն են թափել: Ախունդովին հայտնաբերել էին քաղաքացիները, երբ նա փորձել էր ոտքով հասնել Իրանի սահման: Ախունդովի հետ սահմանը հատած մյուս զինծառայողը՝ Ագշին Բաբիռովը, մեկ ամիս առաջ դատապարտվել է 11,5 տարվա ազատազրկման:
Հեղինակ` Տաթև Խաչատրյան