Հայաստանի կառավարության բնապահպանության և ընդերքի տեսչական մարմնի ղեկավարն այսօր ամփոփեց նախորդ տարվա աշխատանքը: Նաև բարձր ցուցանիշներ գրանցելու համար պարգևատրվեցին մի խումբ աշխատակիցներ:
Հովհաննես Մարտիրոսյան (Բնապահպանության և ընդերքի տեսչական մարմնի ղեկավար) - 2022 թվականին տեսչական մարմինը աշխատել է ծանրաբեռնված և հիմնականում կատարել է իր առջև դրված խնդիրները:
Արձանագրվել է իրավախախտման մոտ 2 400 դեպք: 2021-ի համեմատ դա ավելի է գրեթե 15 տոկոսով, 2020-ի համեմատ՝ 49.1-ով: Իրավախախտումների մեծ մասը վերաբերել է բուսական աշխարհին և ընդերքօգտագործման ոլորտին: Մոտ 750 անձի նկատմամբ կիրառվել է ավելի քան 1000 վարչական տույժ: Տուգանքի ընդհանուր գումարը՝ 99 միլիոն դրամից ավելի: Շրջակա միջավայրին հասցված վնասի չափը կազմել է շուրջ 1 մլրդ 270 մլն դրամ:
Հովհաննես Մարտիրոսյան - 2022թ. հաշվարկված վնասի չափը 2021 թվականի համեմատությամբ աճել է 13 տոկոսով, իսկ 20 թվականի համեմատությամբ 43 տոկոսով:
Իրավապահ մարմիններին ուղարկված 661 գործի նյութերից 514-ը վերաբերել են ապօրինի ծառահատմանն ու փայտանյութի ձեռքբերմանը: 2022 թվականին վերահսկողության արդյունքում պետական բյուջե է մուտքագրվել մոտ 315 մլն դրամ: 2021-ի համեմատ աճը 150 տոկոս է, 2020-ի համեմատ՝ 223 տոկոս:
Հակոբ Սիմիդյան (ՀՀ շրջակա միջավայրի նախարար) - Աշխատանքը շարունակվող պրոցես է, այսինքն՝ մեկ տարվա ամփոփումը դեռևս մեծ գնահատականների հնարավորություն չի տալիս, բայց ամեն դեպքում թվային դրսևորումներով տեսնում ենք, որ տեսչականի աշխատանքը շարունակաբար ավելի արդյունավետ է դառնում: Հուսամ` մենք նաև իրական հողի վրա ենք դրա արդյունքները տեսնում: Էս ամեն ինչը նաև հավելյալ վերլուծությունների անհրաժեշտություն ունի:
Ցուցանիշների այս աճը վկայում է, որ իրավախախտումնե՞րն են շատացել, թե դրանք սկսել են ավելի շատ հայտնաբերվել ու արձանագրվել:
Հակոբ Սիմիդյան - Երևի երեք րոպե առաջ մենք տեսչական մարմնի ղեկավարի և պարոն Սանոսյանի հետ հենց կարճ դրա մասին խոսեցինք՝ թվերի շատանալը և նվազելը ինչ արդյունքներ են: Սրանք էլ անպայման վերլուծելու անհրաժեշտություն ունեն:
Սիմիդյանը կարծում է՝ տեսչական մարմնի աշխատանքի արդյունավետությունը կախված է նաև լիազոր մարմնի մշակած քաղաքականությունից ու իրավական դաշտից: Նախարարությունը պատրաստվում է այս տարի իրականացնել բավական մեծ փոփոխություններ, այդ թվում՝ օրենսդրական դաշտը ավելի հստակ ու թիրախային դարձնելով:
Այս տարի արդեն երկրորդ անգամ բնապահպանության և ընդերքի տեսչական մարմինը կազմակերպել է մրցանակաբաշխություն՝ չորս անվանակարգում՝ լավագույն կառուցվածքային և տարածքային ստորաբաժանումներ, այդ ստորաբաժանումների մեկական լավագույն աշխատակից: Բայց բոլոր թեկնածուները խրախուսվեցին շնորհակալագրով:
Տեսչական մարմնի ղեկավարը նշում է՝ սուբյեկտիվությունը հասցված է նվազագույնի, մանրամասն ուսումնասիրվում են բոլոր թեկնածությունները, կարևորվում է՝ աշխատակիցը տարվա ընթացքում տույժի ենթարկվել է, թե չէ, ինչ ծավալի աշխատանք է կատարել:
Տարածքային ստորաբաժանումներից ամենաբարձրը այս տարի գնահատվել է Արմավիրի բաժնի աշխատանքը: Բաժնի պետ Արսեն Խաչատրյանը նշում է՝ այդ ցուցանիշները գրանցել են ապօրինի ընդերքօգտագործման, ջրօգտագործման, ինչպես նաև բուսական և կենդանական աշխարհի պահպանության ոլորտում իրավավախտումների գծով:
Թե ինչպես են աշխատել՝ գնահատման արժանի արդյունք ապահովելու համար, բաժնի պետը նշեց.
Արսեն Խաչատրյան (Բնապահպանության և ընդերքի տեսչական մարմնի Արմավիրի տարածքային բաժնի պետ) - Սրտացավ, առաջնային և պատասխանատվության մեծ զգացումով:
Հեղինակ` Աննա Զախարյան