ՀՐԴԵՀ ԵԳԻՊՏՈՍԻ ԳԻԶԱ ՔԱՂԱՔԻ ԵԿԵՂԵՑՈՒՄ. ԿԱՆ ԶՈՀԵՐ
Կիրակի հրդեհ է բռնկվել Եգիպտոսի Գիզայի քաղաքի ղպտի եկեղեցում, ինչի հետևանքով զոհվել է 41 մարդ, մեծ մասը՝ երեխաներ, գրում է Reuters-ը: Հրդեհը սկսվել է առավոտյան ժամը 9-ին՝ պատարագի ժամանակ, որին ներկա է եղել մոտ 1000 մարդ: Կրակն արգելափակել է եկեղեցու մուտքը՝ սկսվել է հրմշտոց, զոհերի մեծ մասը մահացել է ծխի պատճառով: Եգիպտոսի ներքին գործերի նախարարության հաղորդագրության մեջ ասվում է, որ երկրորդ հարկի օդորակիչում հրդեհը բռնկվել է էլեկտրականության անսարքության հետևանքով։
Կահիրեում ՀՀ դեսպան Հրաչյա Փոլադյանը ցավակցություն է հայտնել «Նորին Սրբություն Թավադրոս Պապին, Ալեքսանդրիայի Պապին և Սուրբ Մարկոսի Աթոռի պատրիարքին, Եգիպտոսի Արաբական Հանրապետության ժողովրդին, հատկապես՝ ղպտի եղբայրներին, Աբու Սեֆեյն եկեղեցում տեղի ունեցած հրդեհի զոհերի համար՝ շուտափույթ ապաքինում մաղթելով բոլոր տուժածներին»։
ԹՈՒՐՔԻԱՅԻ ՊՆ ՊԱՏՎԻՐԱԿՈՒԹՅՈՒՆԸ ՄԵԿՆԵԼ Է ԱՄՆ
Թուրքիայի ՊՆ պատվիրակությունը մեկնել է ԱՄՆ: Այցի շրջանակում նախատեսվում է բանակցություններ վարել F-16 ինքնաթիռների մատակարարման և արդիականացման թեմաների շուրջ: Հարցի հետ կապված՝ Թուրքիայում ամերիկյան կողմի հետ արդեն երեք հանդիպում է անցկացվել՝ 2021 թ. դեկտեմբերին և 2022 թ. փետրվար և մարտ ամիսներին:
Ըստ Թուրքիայի ՊՆ հայտարարության՝ բանակցությունների նախաձեռնողն ամերիկյան կողմն է. բանակցությունների նպատակն է F-16-երի մատակարարումը և արդիականացումն իրականացնել ամենակարճ ժամկետներում:
ԹՐԱՄՓԸ ՊԱՀԱՆՋԵԼ Է ՎԵՐԱԴԱՐՁՆԵԼ ԱՌԳՐԱՎվԱԾ ՓԱՍՏԱԹՂԹԵՐԸ
ԱՄՆ նախկին նախագահ Դոնալդ Թրամփը պահանջել է վերադարձնել այն փաստաթղթերը, որոնք առգրավել են Հետաքննությունների դաշնային բյուրոյի գործակալները՝ Մար-ա-Լագոյում գտնվող իր կալվածքի խուզարկության ժամանակ։ Թրամփն իր ստեղծած Truth Social սոցցանցում գրել է, որ ՀԴԲ-ի առգրաված փաստաթղթերը փաստաբանական գաղտնիք են պարունակում:
«Ես խնդրում եմ, որպեսզի այդ փաստաթղթերն անհապաղ վերադարձվեն այնտեղ, որտեղից դրանք վերցվել են։ Շնորհակալություն»,- գրել է Թրամփը, ում խոսքերը մեջբերում է New York Post-ը։
Անցյալ շաբաթ Թրամփը հայտարարել էր, որ Մար-ա-Լագոյում գտնվող իր տունը խուզարկության է ենթարկվել ՀԴԲ-ի գործակալների կողմից: Նախկին նախագահը հավելել է, որ ՀԴԲ-ի գործակալները թույլ չեն տվել որևէ մեկին, այդ թվում՝ փաստաբաններին, ներկա գտնվել խուզարկություններին։
ԿՔՆՆԱՐԿՎԵՆ ԱՄՆ-ԹԱՅՎԱՆ ՀԱՐԱԲԵՐՈՒԹՅՈՒՆՆԵՐԻՆ ԱՌՆՉՎՈՂ ՀԱՐՑԵՐ
Միացյալ Նահանգների Ներկայացուցիչների պալատի խոսնակ Նենսի Փելոսիի` Թայվան այցից ընդամենը 12 օր անց ամերիկացի օրենսդիրների պատվիրակությունը այցելում է կղզի:
Մասաչուսեթսից դեմոկրատ սենատոր Էդ Մարկիի գլխավորած հինգհոգանոց պատվիրակությունը կհանդիպի Թայբեյի բարձրաստիճան ղեկավարների հետ՝ քննարկելու ԱՄՆ-Թայվան հարաբերություններին, տարածաշրջանային անվտանգությանը, առևտրին, ներդրումներին վերաբերող հարցեր:
ԳԵՐՄԱՆԻԱՆ ՊԵՏՔ Է ԿՐՃԱՏԻ ԳԱԶԻ ՍՊԱՌՈՒՄԸ ՄԵԿ ՀԻՆԳԵՐՈՐԴՈՎ
Գերմանիան պետք է կրճատի գազի սպառումը մեկ հինգերորդով, որպեսզի այս ձմռանը խուսափի գազի լուրջ պակասից, ասել է ցանցի գլխավոր կարգավորիչը: Այդ մասին հայտնել է Financial Times-ը: Պարբերականը հավելել է, որ բիզնեսներն ու տնային տնտեսությունները պատրաստվում են Եվրոպայի ամենամեծ էներգետիկ ճգնաժամին:
Դաշնային ցանցային գործակալության ղեկավար Կլաուս Մյուլլերն ասել է, որ եթե չկարողանան հասնել իրենց նպատակին՝ 20 տոկոսով խնայելու գազը, ապա լուրջ վտանգ կա, որ բավարար գազ չի լինի։
Գերմանիան ստիպված կլինի հույս դնել նաև եվրոպական այլ երկրներից գազի ներկրման վրա, ասել է Մյուլլերը և զգուշացրել, որ Ռուսաստանից Գերմանիայի կախվածությունը դադարեցնելու երկարաժամկետ արժեքը կլինի գազի շատ բարձր գինը։
Մատակարարումների նվազումը բարձրացրել է գազի գինը, իսկ էլեկտրաէներգիայի մեկ ՄՎտ/ժ-ի գինը 66 եվրոյից բարձրացել է մինչև 206 եվրոյի:
ՄԻՋԱԶԳԱՅԻՆ ՀԱՆՐՈՒԹՅՈՒՆԸ ՊԵՏՔ Է ԱՋԱԿՑԻ ԱՖՂԱՆՍՏԱՆԻՆ. ՉԺՀ ԱԳՆ
Միջազգային հանրությունը պետք է կապեր հաստատի Աֆղանստանի ժամանակավոր կառավարության հետ՝ աջակցելով ներառական կառավարության ստեղծմանը, ապահովելով կառավարման չափավոր կուրսը, երաշխավորելով երկրի բնակչության բոլոր շերտերի իրավունքները: Այդ մասին հայտարարել է Չինաստանի ԱԳՆ-ն` Քաբուլում իշխանափոխության 1-ամյակի կապակցությամբ:
Ըստ չինական կողմի` մեկ տարի առաջ թալիբների իշխանության գալուց հետո Աֆղանստանում շատ դրական զարգացումներ են եղել 1990-ական թվականներին նրանց կառավարման հետ համեմատած:
Պեկինը միաժամանակ ընդգծել է, որ միջազգային հանրությունը պետք է նպաստի, որպեսզի Աֆղանստանի իշխանությունները երաշխավորեն բոլոր աֆղանստանցիների իրավունքները, վճռականորեն պայքարեն ահաբեկչության բոլոր ձևերի դեմ և երկարաժամկետ խաղաղության և կայունության հասնեն Աֆղանստանում:
