Կառավարության առաջարկով խորհրդարանն արտահերթ նիստ է գումարել, օրակարգում 23 հարց: Պաշտպանության նախարարության մշակած փաթեթը զինծառայողների բնակարանային ապահովությանն է վերաբերում:
Հուլիսի 1-ից սկսած` ռազմաուսումնական հաստատություն ընդունված դիմորդները, ուսումն ավարտելուց ու սպայական ծառայության նշանակվելուց հետո, կստանան բնակարան՝ անհատույց օգտագործման իրավունքով՝ 20 տարի ժամկետով:
Սուրեն Պապիկյան (ՀՀ պաշտպանության նախարար) - Սա ենթադրում է, որ զինծառայողը Երևան քաղաքում կստանա 3 սենյականոց բնակարան, որի առավելագույն արժեքը 28,5 մլն դրամ է սահմանված: Սա ենթադրելու է, որ այս տարվա ընդունվողները արդեն 2026 թվականին ավարտելուց անմիջապես հետո կստանան իրենց բնակարանները և կտնօրինեն մինչև ծառայության ավարտն ամեն կերպ՝ բացառությամբ այն վաճառելու իրավունքի:
20-ամյա ժամկետը լրանալուց հետո սպան կդառնա բնակարանի սեփականատերը՝ մանրամասնեց Պապիկյանը: Ասաց՝ անշարժ գույքի սեփականության վկայականը ավելի վաղ կտրվի, եթե առողջական վիճակի պատճառով զինվորականը ծառայության համար ոչ պիտանի ճանաչվի, հաշմանդամության թոշակի անցնի կամ զոհվի: Իսկ անհատույց օգտագործման տարիների ընթացքում, ըստ նախարարի, այն կարող է վարձով տրվել, դառնալ զինծառայողի ընտանիքի համար լրացուցիչ ֆինանսական աղբյուր: Կառավարությունն էլ իր հաշվարկներն է արդեն արել, տարեկան ծախսը 12,5 մլրդ դրամ է, գնման գործընթացը պետք է սկսվի 2023-ից:
Դիմորդների հետաքրքրությունն արդեն մեծ է՝ շեշտեց Պապիկյանը:
Սուրեն Պապիկյան - Նրանք, ովքեր այս պահին դեռ հայտեր չեն ներկայացրել և չեն մասնակցել կենտրոնացված միասնական քննություններին, կա դրա երկրորդ փուլը: Մենք նամակներ ենք հղել բոլոր շրջանավարտներին, սա վերաբերում է նաև իգական սեռի շրջանավարտներին, նրանք նույնպես կարող են դառնալ սպաներ և օգտվել նույն այս պայմաններից:
Զինծառայողներին բնակարանով ապահովելու հարցը պետության առջև կանգնած է եղել տարիներ շարունակ՝ խոսելով նախագծից՝ ասաց հարակից զեկուցող Վահագն Ալեքսանյանը: Պատգամավորը նկատեց՝ ընդդիմությունն այս նիստին էլ չի եկել, ու արտահերթն անցնում է միայն մեծամասնության ներկայությամբ, եզրակացրեց՝ քաղաքական ուժերի առաջնահերթություններն են տարբեր:
Վահագն Ալեքսանյան (ՀՀ ԱԺ «Քաղաքացիական պայմանագիր» խմբակցության պատգամավոր) - Այսպիսի նախագծերն ու օրենքն են, որ պիտի ոտքի կանգնեցնեն մեր հանրապետությունը, պիտի ոտքի կանգնեցնեն մեր բանակը, և հենց այս նախագծերն են, որ պիտի թելադրեն այն ապագան, որը մենք ուզում ենք մեր երկրի համար, իսկ ովքեր որ մնացել են կորած անցյալում ու էդ անցյալի փնտրտուքներում ու դրանում եղած շքեղության շղարշի դեգերումներում դեռևս չեն գտնում իրենց տեղը մեր իրականության մեջ, կարծում եմ` էդպես էլ կմնան՝ մտքում պահելով թե խորհրդարանի դահլիճը, թե Վահագնի թաղամասի` քենու անունով գրանցված դղյակները:
ԳՇ ՊԵՏԸ՝ ՊԱՇՏՊԱՆՈՒԹՅԱՆ ՆԱԽԱՐԱՐԻ ԱՌԱՋԻՆ ՏԵՂԱԿԱԼ
Պապիկյանի ներկայացրած մեկ այլ նախագծով էլ առաջարկվում է փոփոխել օրենքն ու Գլխավոր շտաբի պետի պաշտոնը սահմանել որպես նախարարի առաջին տեղակալ: Նոր կարգավիճակը, սակայն, քաղաքական պաշտոն չէ, ու ԳՇ պետը չի լինելու նախարարին փոխարինող անձ, նկատեց Պապիկյանը: ԶՈՒ ապահովման գործընթացը կվերապահվի Պաշտպանության նախարարությանը, իսկ բանակը կզբաղվի իր անմիջական պարտականությամբ: Ըստ նախարարի՝ ոլորտի ղեկավարումը կդառնա վերից վար, ավելի սահուն, ու կլուծի ոչ թե անձերի, այլ համակարգի խնդիրները:
Սուրեն Պապիկյան - Շատերը խոսում են այն մասին, որ փորձ է արվում զինված ուժերը ենթարկել նախարարին: Նախ` զինված ուժերը ենթարկվում են նախարարին, դա փորձ չէ, շատ հստակ քայլ է: Այո, զինված ուժերը պետք է ենթարկվեն պաշտպանության նախարարին և գերագույն հրամանատարին: Որպեսզի տարընթերցումներ և այլ հարցեր չառաջանան, ես շատ հստակ եմ ասում` իշխանությունը, որը ժողովուրդն արտոնել է մեզ, մեզ իրավունք է վերապահում իրացնել ամբողջությամբ, և մենք պատրաստվում ենք մեր իշխանությունը իրացնել ամբողջությամբ:
Պապիկյանը նկատեց՝ ինքը շահագրգիռ էր, որ ընդդիմությունն էլ մասնակցեր նախագծի քննարկմանը: Նրանցից շատերն ունեն նաև զինվորական ծառայության փորձ, գիտելիքներ: Նախարարն անդրադարձավ նաև եռամսյա վարժանքների հարցերին:
Սուրեն Պապիկյան - ԱԺ ընդդիմադիր պատգամավորներից մեկը զանգահարել է գլխավոր զինկոմին ու հարցրել, թե ի՞նչ իրավունքով են վարժական հավաքներին զորակոչում ընդդիմության երիտասարդներին: Ժողովուրդ, դուք ՀՀ քաղաքացի՞ եք, թե՞ ոնց: Ճիշտ է ասվում` Երևանում երկիրը պաշտպանելը, փրկելը հեշտ է, երբ կատարվում է փափուկ, հանգիստ պայմաններում, բայց դուք, իհարկե, չեք փրկում, փորձում եք երկիրը տանել դեպի անորոշություն:
ԸՆԴԴԻՄՈՒԹՅԱՆ ՄԻԱԿ ՕՐԱԿԱՐԳԸ ԱԺ-ԻՑ ԳԼԽԻԿՈՐ ՓԱԽՉԵԼՆ Է. ՌՈՒԲԻՆՅԱՆ
Կարևոր նախագծերի քննարկումներից ընդդիմադիր պատգամավորների բացակայությանը ՔՊ անդամներն էլ անդրադարձան: Նկատեցին՝ նրանք հայտարարում են, որ անհանգստացած են երկրի պաշտպանական խնդիրներով, բայց շարունակում են խորհրդարան չգալ, հարց է առաջանում՝ ո՞րն է իրենց օրակարգը:
Ռուբեն Ռուբինյան (ՀՀ ԱԺ փոխնախագահ) - Ես կարծում եմ՝ նրանց օրակարգի մասին պատկերացում կարելի է կազմել վերջին օրերի նրանց հանրային ակտիվությամբ: Իսկ նրանց հանրային ակտիվությունը վերջին օրերին սահմանափակվել է հետևյալով՝ հրաժարականներ իրենց պաշտոններից այստեղ, մի քանի հոգու դեպքում էլ՝ մանդատներ վայր դնելը: Հետևաբար, կարելի է եզրակացնել, որ այս օրերին ընդդիմության միակ օրակարգը ԱԺ-ից գլխիկոր փախչելն է:
Անդրանիկ Քոչարյան (ՀՀ ԱԺ պաշտպանության հանձնաժողովի նախագահ) - Կարծում եմ, որ կարևորված էր այս երկու նախագծերի քննարկմանը իրենց մասնակցությունը, որովհետև ժամանակին, երբ որ հանձնաժողովի նիստերն էին, ու իրենք ակտիվ էին մինչև փողոց տեղափոխվելը, ես դիմել եմ, չեն եկել:
Գուրգեն Արսենյան (ՀՀ ԱԺ «Քաղաքացիական պայմանագիր» խմբակցության պատգամավոր) - Երբ հարցը հասնում է հայրենիքի պաշտպանությանը, ընդդիմությունը նախընտրում է Երևանում պաշտպանել հայրենիքը, իսկ երբ հարցը հասնում է եռամսյա հավաքներին, ընդդիմությունը գերադասում է հանդես գալ որպես «կիսապաշտպան», էստեղ կան` էնտեղ չկան:
ԸՆԴՈՒՆՎԵՑԻՆ ԴԱՏԱԿԱՆ ՕՐԵՆՍԳՐՔԻ ՓՈՓՈԽՈՒԹՅՈՒՆՆԵՐԸ
Պատգամավորները երկրորդ ընթերցմամբ քննարկեցին ու ընդունեցին Դատական օրենսգրքի փոփոխությունները: Նոր կարգավորմամբ հնարավոր կլինի կարգապահական վարույթ հարուցել այն դատավորների նկատմամբ, որոնց կայացրած վճիռներով ՄԻԵԴ-ը խախտումներ է բացահայտել: Վաղեմության ժամկետ է սահմանվել 15 տարին՝ հիշեցրեց արդարադատության փոխնախարար Գրիգոր Մինասյանը:
Օրեսդիրն այսօր ընդունեց նաև ԱՊՊԱ պայմանագիր չունենալու համար սահմանված տուգանքի չափի նվազեցման նախագիծը: Առանց պայմանագրի մեքենա վարելու դեպքում վարորդը կազատվի գործող 100 հազար դրամ տուգանքի 75 տոկոսից, եթե 24 ժամվա ընթացքում ներկայացնի ԱՊՊԱ պայմանագիր: