ՄԻՐԶՈՅԱՆԸ՝ ՍՏՈԿՀՈԼՄԻ ՉԵՂԱՐԿՎԱԾ ՀԱՆԴԻՊՄԱՆ ՄԱՍԻՆ
Հայաստանի և Արցախի անվտանգության ապահովումը, նաև Մինսկի խմբի մանդատի ներքո ԼՂ քաղաքական կարգավորումը եղել է ու կա արտաքին գերատեչության կարևորագույն գերակայությունը՝ խորհրդարանում վստահեցրել է նախարար Միրզոյանը: 2021-ի բյուջեի կատարողական զեկույցը նա երկու հատվածի բաժանեց՝ քաղաքական մասում ներկայացնելով կատարված աշխատանքի ամենակարևոր կետերը: Անցած տարի Հայաստանի ու Ադրբեջանի արտգործնախարարները երեք անգամ են հանդիպել. երկուսը՝ համանախագահության ձևաչափով Նյու Յորքում և Փարիզում, մեկն էլ Մինսկում՝ ռուսական կողմի նախաձեռնությամբ:
Արարատ Միրզոյան (ՀՀ արտաքին գործերի նախարար) - Քննարկումների առումով մեզ համար հատուկ կարևորություն է ունեցել ԵԱՀԿ Մինսկի խմբի ձևաչափը: Հանդիպումների ընթացքում հայկական կողմն ընդգծել է իր դիրքորոշումը ինչպես այդ ձևաչափով ԼՂ հակամարտության խաղաղ կարգավորման լիարժեքորեն վերականգնելու առնչությամբ, վերահաստատվել է սահմանագոտում դեէսկալացիայի և հումանիտար խնդրի կարգավորման անհրաժեշտությունն ու սադրանքների ու հայատյաց հռետորաբանության անընդունելիությունը:
Միրզոյան-Բայրամով 2021-ի 4-րդ հանդիպումն էլ պետք է անցած դեկտեմբերին Ստոկհոլմում լիներ, բայց հնգակողմ հանդիպումից ժամեր առաջ ադրբեջանական կողմը չեղարկեց այն՝ ասաց նախարարը՝ հիշեցնելով դրան նախորդած դեպքերը: Համանախագահները հստակ բանակցային օրակարգ էին ներկայացրել՝ արձանագրելով իրենց մանդատը:
Արարատ Միրզոյան - Դրանից օրեր առաջ Վիեննայում տեղի ունեցած ԵԱՀԿ մշտական խորհրդի նիստում համանախագահները կրկին հստակորեն արձանագրել էին իրենց մանդատը: Եվ այս գործոններն էլ՝ համանախագահության ձևաչափի և մանդատի շուրջ ունեցած Ադրբեջանի ընդհանուր վերաբերմունքին զուգահեռ, մեր կարծիքով, դարձան ստոկհոլմյան հանդիպման չեղարկման հիմնական պատճառները:
Ստոկհոլմում, սակայն, ԵԱՀԿ մասնակից պետությունների մեծամասնությունը, նաև մի շարք միջազգային կազմակերպությունների բարձրաստիճան ներկայացուցիչներ հստակ ընդգծեցին ԼՂ հակամարտությունը Մինսկի խմբի ձևաչափում բանակցություններով կարգավորելու անհրաժեշտությունը՝ ասաց Միրզոյանը: Ներկա պատգամավորներին նա հիշեցրեց, որ Մինսկի խումբն ու համանախագահող երկրները տարվա ընթացքում ընդհանուր 11 հայտարարություն են ընդունել, որոնցում արտացոլված են առկա և լուծում պահանջող քաղաքական ու հումանիտար խնդիրները:
ՌԱԶՄԱԳԵՐԻՆԵՐԻ ՎԵՐԱԴԱՐՁՆ ԱՌԱՋՆԱՅԻՆ Է. ԱԳ ՆԱԽԱՐԱՐ
Արտգործնախարարության ամենօրյա աշխատանքում առաջնային տեղ ունի Ադրբեջանում պահվող ռազմագերիների վերադարձի հարցը՝ շեշտեց Միրզոյանը:
Արարատ Միրզոյան - Գերիների վերադարձի հարցը բարձրաձայնվել է ԵԱՀԿ ՄԽ համանախագահության շրջանակներում տեղի ունեցած հանդիպումների ընթացքում, արծարծվել համանախագահների հայտարարություններում, այդ թվում՝ համանախագահող երկրների անունից շրջանառված՝ դեկտեմբերի 7-ի հայտարարության մեջ:
Միջազգային հեղինակավոր կազմակերպությունները ևս փաստել են հայ գերիների նկատմամբ իրականացված խոշտանգումները, անցած տարվա մայիսին էլ Եվրոպական խորհրդարանն է 607 անդամի ձայնով ընդունել հայ գերիների անհապաղ ազատ արձակման և վերադարձի կոչ անող բանաձևը: Միջազգային հանրության հետ աշխատանքում արտգործնախարարությունը բարձրացնում է նաև Ադրբեջանի վերահսկողության տակ մնացած հատվածներում հայկական մշակութային ժառանգության պահպանման, դրանք աղավաղումից փրկելու հարցերը: 2021-ին սկսվեց ու այժմ էլ շարունակվում է Հայաստան-Ադրբեջան հարաբերությունների կարգավորման գործընթացը:
ՃԱՆԱՊԱՐՀՆԵՐԸ ՊԵՏՔ Է ԳՈՐԾԵՆ ԵՐԿՐՆԵՐԻ ԻՆՔՆԻՇԽԱՆՈՒԹՅԱՆ ՆԵՐՔՈ
Ըստ Միրզոյանի՝ տրանսպորտային կապերի ապաշրջափակման հարցով եռակողմ աշխատանքային խումբն անցած տարի 8 հանդիպում է ունեցել՝ արձանագրելով հստակ պայմանավորվածություններ՝ ասաց նախարարը:
Արարատ Միրզոյան - Կա ընդհանուր ընկալում այն մասին, որ բոլոր ապաշրջափակվող տրանսպորտային ենթակառուցվածքները, ճանապարհները, երկաթուղիները պետք է գործեն այն երկրների ինքնիշխանության և օրենսդրության ներքո, որոնց տարածքով դրանք անցնում են: Բոլորիդ հայտնի են այդ շահարկումները, և տեսնում ենք, որ դրանք անհիմն են:
ԴԵՍՊԱՆՆԵՐԻ ՔԱՂԱՔԱԿԱՆ ՆՇԱՆԱԿՈՒՄԸ ՏԱՐԱԾՎԱԾ ՊՐԱԿՏԻԿԱ Է
2021-ի օրակարգը հագեցած էր, նախարարի ելույթը՝ ծավալուն: Պատգամավորները Միրզոյանից հետաքրքրվեցին՝ իսկ ինչպե՞ս է նա գնահատում քաղաքական նշանակումները, հատկապես դեսպանների դեպքում՝ հիշեցնելով քննադատությունների մասին, որ մի շարք կարևոր երկրներում դեսպանի պաշտոն զբաղեցնողները դիվանագետ չեն: Միրզոյանն արձագանքեց՝ դեսպանների քաղաքական նշանակումն աշխարհում լայն տարածված պրակտիկա է:
Արարատ Միրզոյան - Դա եղել է մինչև 2018 թվականի հեղափոխությունը, եղել է հեղափոխությունից հետո, եղել է մինչև պատերազմը, պատերազմից հետո և, վստահաբար, կլինի նաև ապագայում: Եթե դուք դեսպանների վերջին մի քանի քաղաքական նշանակումների մասին եք հարցնում, ապա չափազանցրած չեմ լինի, եթե ասեմ, որ մեր լավագույն դեսպաններից են:
Ինչ վերաբերում է ֆինանսական հատվածին, ապա, ըստ Միրզոյանի, 2021-ի ճշտված բյուջեն կազմել է 17 միլիարդ 427 միլիոն դրամ, նախարարության կատարողականը 98 տոկոս է:
