Գործադիրն առաջարկում է օրենքով նախատեսված տեղեկություններն ապօրինաբար չտրամադրելու համար գործող տուգանքի չափն ավելացնել: Սահմանված նվազագույն աշխատավարձի 10-ապատիկից մինչև 50-ապատիկի չափով տուգանքը նախատեսվում է դարձնել 30-ապատիկից 70-ապատիկի չափով, իսկ նույն խախտումը վարչական տույժ կիրառելուց հետո մեկ տարվա ընթացքում կրկին կատարելու դեպքում՝ սահմանված նվազագույն աշխատավարձի 50-ապատիկից մինչև 100-ապատիկի չափով տուգանքը դարձնել 100-ապատիկից մինչև 150-ապատիկի չափով:
Այս կարգավորումներն առաջարկվում են Վարչական իրավախախտումների վերաբերյալ օրենսգրքում: Մայիսի 24-ի նիստում հարցը ներկայացնելով՝ ՀՀ արդարադատության նախարարի տեղակալ Երանուհի Թումանյանցը բարձրաձայնել է օրենսդրական առաջարկի պատճառներն ու հիմքերը: Նշվել է, որ Givemeinfo.am կայքում տեղադրված հարցումների և դրանց պատասխանների վիճակագրության համաձայն՝ 2019 թ. առ այսօր տեղեկություն տնօրինողներին հասցեագրված գրավոր հարցումների 3 տոկոսին առհասարակ որևէ պատասխան չի ներկայացվել, 9 տոկոսի դեպքում պատասխանները թերի են եղել, այսինքն՝ հարցմամբ պահանջված որոշ տեղեկություններ չեն տրամադրվել, 3 տոկոսի դեպքում ստացվել է անհիմն պատասխան: Datalex.am դատական տեղեկատվական համակարգում տեղադրված գործերի ուսումնասիրության համաձայն՝ օրենսգրքի 189.7-րդ հոդվածի խախտման հիմքով վարչական պատասխանատվության ենթարկելու վերաբերյալ ներկայացված հայցադիմումները մեծ թիվ չեն կազմում:
Ըստ փոխնախարարի՝ 10-50 հազար դրամ տուգանքը բավարար չափով չի շահագրգռում քաղաքացիներին, իրավաբանական անձանց հայց հարուցել պետական և տեղական ինքնակառավարման մարմինների, պետական հիմնարկների, բյուջեներից ֆինանսավորվող կազմակերպությունների, ինչպես նաև հանրային նշանակության կազմակերպությունների պաշտոնատար անձանց դեմ՝ օրենքով նախատեսված տեղեկությունն ապօրինաբար չտրամադրելու համար: Երանուհի Թումանյանցի խոսքով՝ տեղեկատվությունը չստացած անձն իրավախախտին վարչական պատասխանատվության ենթարկելու վերաբերյալ հայց ներկայացնելու նպատակահարմարությունը որոշելիս՝ գիտակցում է, որ ավելի շատ ֆինանսական միջոցներ է վատնելու, քան հայցի բավարարման դեպքում իրավախախտում կատարած անձի նկատմամբ տուգանքի չափը, և հաճախ չի օգտվում նման եղանակով հայց ներկայացնելու իր իրավունքից:
Լիլիթ Մինասյանը, ներկայացնելով ԱԺ պետական-իրավական հարցերի մշտական հանձնաժողովի դրական եզրակացությունը, կարծիք է հայտնել, որ նախաձեռնությունը կնպաստի պետական և տեղական ինքնակառավարման մարմինների գործունեության թափանցիկության բարձրացմանը:
Երկրորդ ընթերցմամբ խորհրդարանը քննարկել է «ՀՀ անտառային օրենսգրքում փոփոխություններ և լրացումներ կատարելու մասին» օրենքի նախագիծը և «ՀՀ քրեական դատավարության օրենսգրքում փոփոխություններ և լրացում կատարելու մասին» ու «ՀՀ քրեական դատավարության օրենսգրքում փոփոխություն կատարելու մասին» օրինագծերի փաթեթը: