Խորհրդարան վերադառնալու ենք բացառապես մեր օրակարգով. իրենց տրամաբանությունն է ներկայացրել Իշխան Սաղաթելյանն ու հայտարարել.
Իշխան Սաղաթելյան (ՀՀ ԱԺ նախագահի տեղակալ) - Խորհրդարան վերադառնալու եմ, իմ անունից եմ ասում, որովհետև դաշինքում ամբողջական որոշում չունենք:
Ակցիաներին մասնակցող մյուս խորհրդարանական ուժի՝ «Պատիվ ունեմ» խմբակցության ղեկավար Արթուր Վանեցյանը, «Ազատության» հրապարակում անժամկետ ակցիա սկսելու օրերին հայտարարել էր, որ այլևս չի պատկերացնում իր վերադարձը խորհրդարան:
Որոշումը չի փոխել նաև հիմա. «Լուրերի» հետ զրույցում հայտնեց Վանեցյանը:
«Դիմադրություն» շարժման՝ մայիսի 1-ից սկսած ակցիաները, Իշխան Սաղաթելյանի խոսքով, վերջին 30 տարվա մեջ Հայաստանի համար աննախադեպ ծավալի են եղել: Իրենց այս 14 օրվա պայքարը նա համեմատեց 88-ի Ղարաբաղյան շարժման հետ՝ հայտարարելով, որ շատ նման են:
Շարժմանը նման բնորոշումներ տալուց հետո Սաղաթելյանը խոսեց նաև, թե ինչու դեռ չեն հասել իրենց առջև դրած նպատակին՝ վարչապետ Նիկոլ Փաշինյանի հրաժարականին. «Մենք իրոք կարողացել ենք և՛ քաղաքը պարալիզացնել, և՛ շենքեր շրջափակել մարզերում, Երևանում: Այդ արդյունքներն ակնհայտ են, բայց հեռացման համար դեռ բավարար չեն»:
Անդրադառնալով վերջին 30 տարում եղած թերություններին, բացթողումներին, անարդարություններին՝ Սաղաթելյանը նշեց՝ իրենք նույնպես պատասխանատվության բաժին ունեն:
Իշխան Սաղաթելյան - Թերություններ ու բացթողումներ ունեցե՞լ ենք, իհարկե, ունեցել ենք, բայց մեզ որևէ մեկը չի կարող մեղադրել երկիրը թալանելու կամ չգիտեմ ինչի մեջ. շատ հստակ եմ ասում և ուղիղ:
Սաղաթելյանը խոսեց նաև Ադրբեջանին փոխանցված Հայաստանի 6 կետանոց առաջարկի մասին: Մասնավորապես 3-րդ կետի, ըստ որի՝ հայկական կողմի համար հիմնարար են Լեռնային Ղարաբաղի հայերի անվտանգության երաշխավորման, նրանց իրավունքների և ազատությունների հարգման, ինչպես նաև Լեռնային Ղարաբաղի վերջնական կարգավիճակի որոշման հարցերը:
Սաղաթելյանն անգամ այս դեպքում շարունակում է պնդել, որ իշխանությունը պատրաստվում է Արցախը թողնել Ադրբեջանի կազմում:
Հեղինակ` Էդուարդ Հովհաննիսյան