Քննչական կոմիտեի զինվորական քննչական գլխավոր վարչությունում ավարտվել է Հադրութի Խծաբերդ գյուղի դեպքով քրեական գործի նախաքննությունը: Խծաբերդի դիրքերում պահպանություն իրականացրած ստորաբաժանման հրամանատար Արսեն Ղազարյանը մեղադրվում է Քրեական օրենսգրքի 3 հոդվածով՝ 2020-ի դեկտեմբերի 13-ին Խծաբերդ գյուղում տեղակայված մարտական դիրքը ինքնակամ լքելու, պետի օրինական հրամանը չկատարելու, ծառայության նկատմամբ անփույթ վերաբերմունք դրսևորելու համար:
Ռաֆայել Վարդանյան (ՀՀ ՔԿ զինվորական քննչական գլխավոր վարչության հատկապես կարևոր գործերի քննության վարչության պետ) - Տևական նախաքննության ընթացքում իրականացվել են մեծածավալ քննչական և դատավարական գործողություններ, որոնց արդյունքում ստացվել են վերջինիս ստորաբաժանման հրամանատարին առաջադրված մեղադրանքը փաստող անհերքելի ապացույցներ, և քրեական գործով նախաքննությունն ավարտվել է:
Նախաքննությամբ պարզվել է, որ Ղազարյանի գործողություններն առաջացրել են ծանր հետևանքներ. մասնավորապես, Խծաբերդը, գյուղի մարտական հենակետերը թողնելու հետևանքով այդ տարածքներն անցել են ադրբեջանական զինված ուժերի վերահսկողության տակ: Ըստ քննչական խմբի ղեկավարի՝ Արսեն Ղազարյանը վերադասից հրաման է ստացել անցնել շրջանաձև պաշտպանության, չնահանջել, մինչդեռ փոխգնդապետը անձնակազմին հրամայել է նահանջել: Գրիգորյանի խոսքով՝ նախաքննությունը տևել է մոտ 5 ամիս:
Արսեն Գրիգորյան (ՀՀ ՔԿ զինվորական քննչական գլխավոր վարչության ՀԿԳ քննության վարչության ՀԿԳ քննիչ) - 2020-ի դեկտեմբերի 13-ին՝ ժամը 17:00-ին, ադրբեջանական զորքերը կրակ են արձակել Արսեն Ղազարյանի մարտական դիրքի ուղղությամբ, վերջինս գրեթե մարտ չի վարել, նահանջել է, անձնակազմին հրաման է տվել նահանջելու:
Նախաքննության տվյալով՝ Արսեն Ղազարյանը իր մոտ գտնվող գաղտնի կրիչն ու տեղանքի գաղտնի քարտեզը թողել է տեղամասում, մեկնել մարտական հերթապահության, ինչի հետևանքով գաղտնիք պարունակող տեղեկություններն անցել են հակառակորդի հսկողության տակ:
Քննչական կոմիտեի զինվորական քննչական գլխավոր վարչության հատկապես կարևոր գործերի քննության վարչության պետի խոսքով՝ քննության առարկա են դարձել նաև Հին Թաղեր գյուղում տեղակայված մեկ այլ ստորաբաժանման հրամանատարների գործողությունները, այս գործով նախաքննությունը շարունակվում է:
Ռաֆայել Վարդանյան - Էս պահին միայն մեկ անձի մասով է ավարտվել նախաքննությունը: Հին Թաղերի մասով 2 մեղադրյալ ունենք՝ ստորաբաժանման հրամանատարը և շտաբի պետը:
Առանձին ուսումնասիրվում են Խծաբերդում 62 զինծառայողի գերության հանգամանքները:
Ադրբեջանից Հայաստան վերադարձած ռազմագերիների մասնակցությամբ նույնպես իրականացվել են մեծածավալ քննչական և դատավարական գործողություններ:
Պարզվել է, որ գերեվարումը պատճառահետևանքային կապ չունի Արսեն Ղազարյանի գործողությունների հետ:
62 շիրակցի զինծառայողից 32-ը վերադարձել է, 30-ը դեռևս պահվում է Ադրբեջանում: