Հայաստան-Թուրքիա հարաբերությունների կարգավորման գործընթացում չկան նախապայմաններ՝ սա հատուկ ներկայացուցիչների պայմանավորվածությունն է: Թեմային անդրադարձել է վարչապետը՝ պատասխանելով պատգամավոր Սարգիս Խանդանյանի հարցին: Կառավարող ուժի ներկայացուցչին հետաքրքրում էր՝ արդյոք Թուրքիան չի՞ շարունակում հարաբերությունների կարգավորման գործընթացը կապել հայ-ադրբեջանական հարաբերությունների, նաև Լեռնային Ղարաբաղի հիմնախնդրի հետ: Միաժամանակ վարչապետը հավելել է՝ Հայաստանը պետք է գործադրի բոլոր մեխանիզմները, որ գործընթացը տասնամյակներ չտևի և չլճանա:
Նիկոլ Փաշինյան (ՀՀ վարչապետ) - Մենք հասկանում ենք բոլոր խութերը, հասկանում ենք բոլոր ռիսկերը և, միևնույն ժամանակ, էդ տրամաբանությամբ կարծում ենք, որ խոսակցությունը պետք է շարունակվի և խոսակցությունը պետք է իրոք դառնա երկխոսություն:
ՍԱՀՄԱՆԱԳԾՈՒՄՆ ՈՒ ՍԱՀՄԱՆԱԶԱՏՈՒՄԸ ԵՐԿԱՐԱԺԱՄԿԵՏ ԳՈՐԾՈՂՈՒԹՅՈՒՆ ԵՆ
Սահմանազատումն ու սահմանագծումը երկարաժամկետ գործողություններ են, կարող են տարիներ տևել. արդյոք կա՞ն մոտավոր հաշվարկներ, թե երբ կավարտվի Հայաստանի և Ադրբեջանի միջև սահմանագծումը, և արդյոք կա՞ն մեխանիզմներ, որոնք կկանխեն այդ ընթացքում հակառակորդի կողմից սադրանքներն ու առճակատումները՝ հետաքրքրվեց Սերգեյ Բագրատյանը:
Նիկոլ Փաշինյան - Փորձագիտական գնահատական տալը շատ դժվար է, պրոցեսը պետք է սկսվի, և հընթացս կերևա, բայց որ դա 1-2 օրվա, 1-2 ամսվա գործ չէ, դա ակնհայտ է, որովհետև կան բազմաթիվ նյուանսներ, որ պետք է ճշգրտվեն: Իհարկե, ես իմ զեկույցում ասացի, որ մենք հասկանում ենք նաև, որ Ադրբեջանը փորձում է ինչ-որ ձևով ռազմական լարվածության իրավիճակը պահել սահմանի երկայնքով, դեմարկացիայի գործընթացում Հայաստանի նկատմամբ թաքնված կամ անթաքույց տարածքային պահանջներ ներկայացնելու համար և մեր այս դիրքորոշումը կարծում եմ ընկալված է միջազգային հանրության կողմից, և մենք պետք է առաջ գնանք՝ պաշտպանելով մեր երկրի շահերը և սահմանները:
ԺՈՂՈՎՐԴԱՎԱՐՈՒԹՅԱՆ ՀԱՍՆԵԼՈՒ ՀԱՐՑՈՒՄ ՀՀ-Ն ՈՒՇԱՑԵԼ Է. ՓԱՇԻՆՅԱՆ
Ժողովրդավարության հասնելու հարցում Հայաստանը ուշացել է, և դա է այսօրվա իրականությանը առերեսվելու պատճառը՝ նկատեց Փաշինյանը: Ժամանակին Հայաստանը վարել է պայթյունը հետաձգելու քաղաքականություն և այն պատկերացումները, թե ինչ է լինելու հետո, չեն ունեցել որևէ իրական հիմք:
Նիկոլ Փաշինյան - Ոչ մի գաղտնիք չկա, որ Ղարաբաղի հարցը օգտագործվել է իշխանության հասնելու և իշխանություն պահելու համար: Ի վերջո, ո՞վ չգիտի սա, ես գաղտնիքներ չեմ բացահայտելու: Էլի եմ ասում՝ ժողովրդավարությունը նպատակ չէ, ժողովրդավարությունը միջոց է, որ երկիրը լինի մաքսիմալ մրցունակ:
ԲԱՆԱԿՑԱՅԻՆ ԳՈՐԾԸՆԹԱՑԸ 2016 ԹՎԱԿԱՆԻՆ. ՊԱՐԶԱԲԱՆՈՒՄ
Պատգամավոր Վահագն Ալեքսանյանը խնդրեց ևս մեկ անգամ ներկայացնել, թե բանակցային գործընթացում ինչ է տեղի ունեցել 2016 թվականին: Փաշինյանի խոսքով՝ 1998-ին իշխանափոխություն եղավ այն պատճառով, որ այդ ժամանակվա իշխանությունը գտնում էր՝ Ղարաբաղի հարցը պետք է լուծվի փուլային տարբերակով, հակառակ թևը գտնում էր՝ ճիշտը փաթեթային տարբերակն է:
Նիկոլ Փաշինյան - Էն բանակցային թուղթը, որը սեղանին դրված ա, վերնագիրը եղել ա հետևյալը՝ О первом этапе и дальнейших шагах Нагорхо Карабахского урегулирования: Շրջանը պատկերացնում եք, այսինքն՝ էն մարդը, որն ասել ա, որ փուլային լուծումը համարյա դավաճանություն է, պարտվողականություն, 2018 թվականին թողել ա բանակցային սեղանին մի փաստաթուղթ, որի վերնագիրը О первом этапе и дальнейших шагах Нагорхо Карабахского урегулирования, այսինքն՝ փուլային լուծման դեմ իշխանափոխություն անող մարդը եկել հանգել ա նորից փուլային լուծման, բայց էդ փուլային լուծման մեջ էնքան տրոհումներ կան, որ ես, օրինակ, ինքն էլ, իմիջիայլոց, միշտ հաշվի առել է, հլը էս ամեն ինչը Ադրբեջանը համաձայն ա դրա հետ, թե չէ: Ասում են՝ մենք Ղարաբաղի հարցը սենց կլուծեինք, նենց կլուծեինք, ժողովուրդ ջան, լուծեիք, լուծեիք: Մոռանում են, չստորագրված թղթերում առկա գաղափարները ներկայացնում են որպես հաղթանակ: Համանախագահների դերակատարումը որն ա. իրանք վերցնում են գաղափարներ, թե տարբեր կողմերն ինչ գաղափարներ ունեն, փորձում են էդ գաղափարները հղկել և դնել թղթի մեջ: Է, բոլորս էլ բոլոր գաղափարները կարող ենք ունենալ, բայց Ղարաբաղի հարցի ամբողջությունը 18 թվականի դրությամբ էնքան ա կտրտված եղել մանրամասների, ինքը փուլային տարբերակ չէր է, ինքը հիպերփուլային տարբերակ էր, հիպերփուլային տարբերակ:
ԿԱՐԵՎՈՐ Է ԱՌԱՋՆՈՐԴՎԵԼ ԻՆՍՏԻՏՈՒՑԻՈՆԱԼ ՏՐԱՄԱԲԱՆՈՒԹՅԱՄԲ
Արփի Դավոյանն էլ բարձրացրեց մի հարց, որի մասին քաղաքացիներն են հետաքրքրվել հանդիպումների ժամանակ: Երբ են վերադարձվելու պետությունից թալանված գումարները: Պատգամավորի պնդմամբ՝ քաղաքացիները դժգոհում են տեմպերից: Վարչապետ Փաշինյանը պատասխանեց, մեր երկրում տասնամյակներ բացակայել են ինստիտուտները, և այս հարցում կարևոր է առաջնորդվել ոչ թե հեղափոխական, այլ ինստիտուցիոնալ տրամաբանությամբ:
Նիկոլ Փաշինյան - Մեզ համար ավելի կարևոր ա մեխանիզմներ ստեղծել, որ էսօրվա իշխանությունը չթալանի. նախ էս ա կարևոր, հետո՝ էն. մեկ ա, ոչ մի տեղ չեն փախնի: Ես ուզում եմ ձեր ուշադրությունը հրավիրել, հարգելի գործընկերներ, ընդամենը նախորդ ամիս «Զանգեզուրի պղնձամոլիբդենային կոմբինատի» գործով պետական բյուջե ա վճարվել 15 մլրդ դրամ, ՀՀ-ն «Զանգեզուրի պղնձամոլիբդենային կոմբինատի» սեփականատերն է, ժողովուրդը, բոլորը, բա էդ թալանածի վերադարձ չի՞, էդ էլ ա թալանածի վերադարձ:
Պետություն, ինստիտուտ, օրենքի գերակայություն. վարչապետի խոսքով՝ միայն այսպես է հնարավոր շրջադարձային բարեփոխումներ անել:
