2021 թվականին ինչպես ամբողջ աշխարհում, այնպես էլ Հայաստանում կորոնավիրուսը շարունակել է մարտահրավեր մնալ: Դրան դիմակայելու համար մեր երկրի կառավարությունը վարել է հավասարակշռված քաղաքականություն՝ մի կողմից զսպելով վարակի տարածումը, կանխարգելելով հիվանդությունը պատվաստումների միջոցով և քաղաքացիների համար ապահովելով բարձրորակ բժշկական օգնություն, մյուս կողմից էլ, չգնալով տնտեսական գործունեության սահմանափակումների, զերծ է մնացել լոքդաուններից: Առողջապահության նախարար Անահիտ Ավանեսյանը այս արձանագրումով սկսեց 2021-ին կատարված աշխատանքների վերաբերյալ իր զեկույցը:
Անահիտ Ավանեսյան (ՀՀ առողջապահության նախարար) - Հետահայացք գցելով՝ այսօր կարող ենք ասել, որ ընտրված այս ճանապարհը ճիշտ էր:
Հաշվետու տարում իրականացվել է շուրջ 1 միլիոն 980 հազար թեստավորում, դրական դեպքերի թիվը կազմել է ավելի քան 185240: Նույն տարում էլ քովիդի դեմ պատվաստումներն են սկսվել: Այսօր ամբողջական պատվաստում է ստացել չափահաս բնակչության 43.7 տոկոսը:
Անահիտ Ավանեսյան - Պետք է նշենք, որ 2021 թվականի ընթացքում Կառավարության կարևորագույն հանձնառությունն էր նաև ապահովել պատերազմի ընթացքում վիրավորում ստացած զինվորների ամբողջական բժշկական օգնության տրամադրումը, այդ թվում` արտասահմանյան բժշկական կենտրոններում:
ԱՌՈՂՋԱՊԱՀՈՒԹՅԱՆ ՈԼՈՐՏԻ ՁԵՌՔԲԵՐՈՒՄՆԵՐՆ ՈՒ ԲԱՐԵՓՈԽՈՒՄՆԵՐԸ
Այս երկու հավելյալ մարտահրավերներին դիմակայելով՝ Կառավարությունը, նախարարի վստահեցմամբ, անշեղորեն կատարել է առողջության պահպանման և բարելավման ուղղությամբ հանձնառությունները՝ ավելացնելով ոլորտին ուղղվող բյուջետային միջոցները և շարունակելով համակարգային բարեփոխումները:
Առողջության առաջնային պահպանման օղակում իրականացվել է ամբողջական գնահատում ենթակառուցվածքների, սարքավորումների, մարդկային ռեսուրսի, ծառայությունների ծավալի ու որակի, ֆինանսավորման մեխանիզմների վերաբերյալ, արդյունքում պոլիկլինիկաների ու ամբուլատորիաների համար ձևավորվել է ընդհանրական մոդել:
Դրա շրջանակներում իրականացվել են վերանորոգման, վերազինման աշխատանքներ: Մի շարք մարզային պոլիկլինիկաներ առաջին անգամ հագեցվել են նորագույն ռենտգեն սարքավորումներով և մի շարք այլ կարևոր պարագաներով:
Նախարարը կարևոր ձեռքբերում է համարում վերարտադրողական ծրագիրը, որը ավելի մեծ թվով շահառուներ ընդգրկելու հնարավորություն է ստացել:
Անահիտ Ավանեսյան - Ուրախությամբ պիտի նշեմ, որ 2021 թվականի ընթացքում մենք ունեցել ենք 76 բալիկի ծնունդ, և 2022 թվականին արդեն իսկ 21 երեխա է ծնվել:
Առաջին անգամ Հայաստանում ստեղծվել են մանկական քաղցկեղի պալիատիվ ծառայություն և մանկական հոգեբուժական ստացիոնար բաժանմունք: Սևան քաղաքում բացվել է մանկական վերականգնողական կենտրոն:
Իրականացվել է 18 երեխայի ականջի խխունջի պատվաստման վիրահատություն: Երեխաները ձեռք են բերել լսողություն ու ազատվել հաշմանդամությունից: Նվազել է մինչև 5 տարեկան երեխաների մահացության ցուցանիշը 0.5 պրոմիլեով:
Առողջ ապրելակերպի խթանման ուղղությամբ աշխատանքները ևս գերատեսչության առաջնահերթությունների թվում են եղել: Ծխախոտային արտադրատեսակների ու դրանց փոխարինիչների արգելքն էլ ուժի մեջ է մտել անցյալ տարի:
Պետության կողմից տրամադրվող դեղորայքի և շահառուների թիվը ևս ընդլայնվել է՝ 65 անուն դեղ և շուրջ 166790 շահառու:
Հիվանդությունները վաղ հայտնաբերելու նպատակով 2021-ին իրականացվել է մոտ 440 հազար սքրինինգային հետազոտություն: Անահիտ Ավանեսյանը առանձնացրեց կրծքագեղձի քաղցկեղի հայտնաբերման ծրագրիրը: Այս ծրագրի շրջանակներում հետազոտվել է մոտ 10 հազար կին, այնուհետև այն քաղաքացիները, ովքեր կարիք են ունեցել լրացուցիչ բժշկական հետազոտությունների կամ միջամտությունների, ևս ամբողջապես պետական պատվերի շրջանակում ստացել են այդ օգնությունը:
Առողջապահության համակարգում, ըստ նախարարի, մեկնարկել են աննախադեպ թվով շինարարական ծրագրեր: Շարունակվել են էլեկտրոնային առողջապահության ներդրման աշխատանքները. դա և ընդհանրապես թվայնացման գործընթացը անկյունաքարային է լինելու հետագայում առողջապահության համապարփակ ապահովագրության ռեֆորմը բարեհաջող իրականացնելու համար:
Հեղինակ` Աննա Զախարյան
