Եթե ղեկին ես, ապա վթարի ենթարկվելու վտանգը զուգահեռ քայլում է: Իսկ ի՞նչ պետք է անել վթարի դեպքում՝ շատերը չգիտեն:
Պատահարները բաժանվում են 2 տեսակի՝ պարզեցված և ստանդարտ հատուցման գործընթացներով: Ըստ վիճակագրության՝ մեր երկրում պատահարների կեսը պարզեցված հատուցման գործընթաց է ենթադրում. երբ երկու վթարված մեքենա է, միայն գույքի վնասով, և կողմերից մեկն ընդունել է մեղքը: Վնասն էլ, իր հերթին, տուժող կողմի գնահատմամբ, պետք է չգերազանցի մարզերում և Երևանում՝ 100 հազար դրամը, բայց եթե վթարը ձևակերպվում է «ԱՍՎԱ» հավելվածով, Երևանում շեմը կրկնապատկվում է:
Արտյոմ Նազարյան (Հայաստանի ավտոապահովագրողների բյուրոյի գործադիր տնօրենի տեղակալ) - Դուք բոլոր դեպքերում կարող եք և՛ բջջայինով լրացնել, և՛ թղթային, բայց եթե լրացրիք թղթային, չեք կարող ավել հատուցում ստանալ 100 հազար դրամից, իսկ եթե բջջայինով լրացրիք, կարող եք մինչև 200 հազար դրամը ստանալ, բայց եթե Երևան քաղաքում է եղել դեպքը:
Պարզեցված հատուցման ժամանակ որոշակի նրբություններ կան, որոնք վարորդները պարտավոր են իմանալ: Բջջային հավելվածում ամեն ինչ պարզ է՝ լրացվում են վարորդների անձնական տվյալները, վթարի ժամը, հասցեն, էլեկտրոնային փոստի հասցեն, ապա՝ 3 լուսանկար: Լրացնելուց վայրկյաններ հետո էլեկտրոնային հասցեին նամակ է գալիս՝ գործարքը հաջողությամբ իրականացված լինելու բովանդակությամբ: Միայն նման հաղորդագրություն ստանալու դեպքում է պատահարը համարվում գրանցված: Ընդ որում՝ մասնագետները հորդորում են թե՛ ԱՊՊԱ պայմանագիր կնքելիս, թե՛ պատահարի դեպքում էլեկտրոնային հասցեն ուշադիր գրել, որ սխալ չլինի:
Արտակ Խաչատրյան (ԱՊՊԱ ոլորտում մեղավորության և հատուցումների գծով խորհրդատու) - Մշտապես խնդիրներ ենք ունենում, որովհետև քաղաքացիների համար սովորական է, ասում են՝ մի մեյլ գրի, էլի, մեկ ա մեզ ինչ ենք անում, էդ մեյլը պետք էլ չի, բայց այնպիսի մեյլ ա պետք, որ քաղաքացիները կարողանան օգտվել ու հասանելիություն ունենան:
Հաջորդ խնդիրը նկարներին է առնչվում: Ծրագիրն ընդամենը 3 նկարի թույլտվություն է տալիս: Հիմա ավտոապահովագրողների բյուրոն պահանջ է ներկայացրել ծրագրավորող ընկերությանը՝ ավելացնել ԱՍՎԱ հավելվածում բեռնվող նկարների քանակը:
Արտյոմ Նազարյան - Առնվազն 3 լուսանկար պետք է արվի՝ ինչպես թղթային հայտարարագրի դեպքում է, այնպես էլ բջջային հավելվածով: 3 լուսանկարները պետք է էնպես անել, կամ տեսագրություն, կապ չունի, որպեսզի հետևյալ բաները ֆիքսվեն պարտադիր՝ 2 մեքենաների վնասվածքները անպայման պետք է երևան, և երկու ավտոմեքենաների փոխադարձ դիրքերը, այսինքն՝ ինչ դիրքով են եղել ավտոները պատահարից հետո. կոպիտ ասած՝ 2 ավտոները մեկ լուսանկարում որ երևան:
Ցանկալի է, որ նկարներում երևան նաև մեքենաների համարանիշները: Եթե 3 նկարը բավարար չէ, ինչը հիմնականում այդպես է, վարորդները կարող են հավելյալ նկարներ անել, ապա էլեկտրոնային փոստով ուղարկել ապահովագրական ընկերությանը՝ ի լրումն փաստաթղթերի: Եվս մեկ նրբություն. վարորդները պարտավոր են վթարից հետո 40 րոպեի ընթացքում զանգահարել իրենց ապահովագրական ընկերություն և տեղյակ պահել պատահարի մասին:
Արտակ Խաչատրյան - Ըստ ԱՊՊԱ-ի կանոնների՝ 40 րոպեն պետք է չգերազանցի: Դա հենց բերում է կասեցումների, կամ ռեգրեսի հիմք ա առաջանում ԱՊՊԱ-ի կողմից, որ հետգանձում վերցնեն:
Եթե գործը կասեցվել է ապոհովագրականի կողմից, վարորդը պետք է պարզի՝ ինչ հիմքով, պարզելուց հետո էլ դիմում ներկայացնի ապահովագրական՝ կասեցման հիմք հանդիսացած հավելյալ տեղեկատվությամբ: Վարորդները միշտ կարող են նաև բյուրո դիմում ներկայացնել՝ խնդրի լուծման խնդրանքով: Կարևոր է հիշել նաև, թե երբ է թույլատրվում տեղաշարժել մեքենաները:
Արտակ Խաչատրյան - Ամենակարևոր բարդույթը հենց տեղաշարժելն է, բայց մինչ տեղաշարժելը պետք է էդ հետվթարային դիքերի տեսանյութը կամ լուսանկարները պահպանված լինեն, որից հետո կարող են տեղաշարժել:
Սա՝ պարզեցվածի մասին: Հիմա անցնենք ստանդարտ հատուցման գործընթացին: Այս տարբերակը ևս տեսակավորված է՝ ստանդարտ 1 և 2:
Արտյոմ Նազարյան - Ստանդարտ հատուցման գործընթաց 1-ն այն դեպքն է, երբ ՃՈ կամ պարեկային ծառայություն են կանչում, գալիս են կողմերը, ելակետներն են նշում, տվյալները, և ՃՈ-ն կամ պարեկայինը էդ տվյալները մուտքագրում է մեր տեղեկատվական համակարգ՝ էլեկտրոնային եղանակով: ԱՊՊԱ ոլորտում փորձագետները գնահատում են՝ ով է մեղավոր, և ով մեղավոր չէ: Էդ կարգով են իրականացվում գրեթե բոլոր պատահարները, որոնք համաձայնեցված հայտարարագրով չեն, բացառությամբ՝ եթե քրեական գործ է հարուցվում, այսինքն՝ երբ մարմնական վնասվածքներ են:
Այլ կերպ ասած՝ եթե տուժողը կարծում է, որ մեքենան 200 հազար դրամից շատ վնաս է կրել, կամ կողմերից ոչ մեկը մեղավորությունը չի ընդունում, պետք է զանգել 1-02: Այս կարգն է կիրառվում նաև, երբ 3 և ավելի մեքենա կա վթարված: Պարեկները թղթի վրա պատկերում են վթարը, լրացնում վարորդների անձնական տվյալները, ստուգում՝ ալկոհոլի ազդեցության տակ են թե ոչ, ձևակերպում վթարը և ազատում երթեկելի գոտին: Հաճախ, սակայն, վարորդները կարգախումբ են կանչում անգամ մինչև 200 հազար վթարի դեպքում՝ ապահովության համար:
Ռաֆիկ Պռազյան (ՀՀ պարեկային ծառայության ավագ պարեկ) - Շատ հաճախ է հանդիպում, դա գալիս է մեր քաղաքացիների իրազեկված լինելու պակասից: Շատ քաղաքացիներ չգիտեն, որ հնարավորություն կա ինքնորույն վթարը ձևակերպելու:
Հիմա՝ փոխհատուցման մասին: Եթե վարորդը համաձայն չէ գնահատման արդյունքներին, կա՛մ պետք է 2 աշխատանքային օրվա ընթացքում դիմում գրի լրացուցիչ փորձաքննության համար, կա՛մ 5 աշխատանքային օրվա ընթացքում դիմի կրկնակի փորձաքննության համար, որը, սակայն, վճարովի է:
Արտյոմ Նազարյան - Վնասի փորձաքննությունն իրականացվում է 15 հազար դրամով, բացառությամբ մինչև 100 հազար դրամ վնասների, որի դեպքում 5000 դրամ է կրկնակի փորձաքննության վճարը: Իսկ պատճառի փորձաքննությունը, երբ մարդը մեղավորությանը համաձայն չէ, դրա համար վճարում է 17 հազար դրամ:
Ֆինանսական համակարգի հաշտարար. սա ևս մեկ հասցե է, որտեղ վարորդը կարող է դիմել վերագնահատման համար:
