ԸՆԴԴԻՄՈՒԹՅՈՒՆԸ ՊԱՀԱՆՋԵԼ Է ՀԱՆԴԻՊՈՒՄ ՎԱՐՉԱՊԵՏԻ ՀԵՏ
Ազգային ժողովում արտահերթ նիստ է՝ օրակարգում մեկ հարց՝ ՏԻՄ օրենքում լրացում կատարելու վերաբերյալ: Բայց մինչև օրակարգին անցնելը խորհրդարանը քննարկեց մեկ այլ հարց՝ նախագիծը հատուկ ընթացակարգով քննարկելու վերաբերյալ: Խորհրդարանական ընդդիմությունը հայտնեց իր դժգոհությունը՝ մեկ օր առաջ վարչապետը հայտարարել է Արցախում և հայ-ադրբեջանական սահմանին ռազմական գործողությունների վտանգի մասին, իսկ արտահերթ նիստի օրակարգում այլ հարց է հայտնվում:
Ագնեսա Խամոյան (ՀՀ ԱԺ «Հայաստան» խմբակցության պատգամավոր) - Փաստորեն, խնդրի հրատապությունը, երբ Հայաստանը գտնվում է պատերազմից 5 պակաս, ամեն դեպքում, երեկ Նիկոլ Փաշինյանի հայտարարությունը դրա մասին էր, մենք պետք է էստեղ քննարկենք մի հարց, որը բացառապես վերաբերում է այն համայնքներին կամ համայնքին, որտեղ ձեզ չի հաջողվել վերցնել իշխանությունը:
Բարձրացված հարցին ի պատասխան՝ ԱԺ փոխխոսնակ Ռուբեն Ռուբինյանը հետաքրքրվեց, ինչ-որ հարց է ներկայացրե՞լ ընդդիմադիր թևը, որը պետք է քննարվեր, բայց մերժվել է: Ռուբինյանը վստահեցրեց՝ նախաձեռնություն չի եղել: Միաժամանակ հայտարարեց, «Հայաստան» խմբակցությանն առաջարկել է կազմակերպել փակ աշխատանքային քննարկում վարչապետի և ընդդիմադիր խմբակցությունների միջև:
Ռուբեն Ռուբինյան (ՀՀ ԱԺ նախագահի տեղակալ) - Մեր ընդդիմադիր գործընկերներն ինձ ասել են, որ այդ ֆորմատն իրենց համար ընդունելի չէ, ես արել եմ՝ կրկին վարչապետի հետ քննարկելով երկրորդ առաջարկը, կազմակերպել փակ աշխատանքային քննարկում Ազգային ժողովի խորհրդի ֆորմատով, որում, բնականաբար, ընդգրկված են ընդդիմադիր գործընկերները 2 խմբակցություններից: Ո՛չ դրական, ո՛չ բացասական պատասխան այս պահի դրությամբ ես չեմ լսել: Հարգելի գործընկերներ, ճիշտ է, կան հրատապ քննարկելու հարցեր, եկեք քննարկենք այդ հրատապ հարցերը առաջարկվող ֆորմատներում, հակառակ դեպքում խնդրում եմ՝ մի եկեք և այստեղ մի ասեք, որ կան հրատապ հարցեր որ ուզում ենք քննարկել: Մենք ուզում ենք քննարկել, խնդրում եմ պատասխանեք:
«Հայաստան» խմբակցության ղեկավարը հարցրեց՝ արդյոք վարչապետը կգա՞ և բոլոր 107 պատգամավորներին կներկայացնի՞ սահմանային իրավիճակը, բանակցային փաստաթղթերը: Այդ ամենից հետո նոր իրենք կորոշեն՝ ինչ ձևաչափով քննարկումներ սկսեն գործադիրի հետ: Դրանից առաջ արահերթ ելույթով ամբիոնի մոտ էր եկել ԱԺ նախագահը, ասել՝ պատերազմի հավանականությունը միշտ էլ բարձր է եղել:
Ալեն Սիմոնյան (ՀՀ ԱԺ նախագահ) - Իսկ ի՞նչ եք արել դուք, ի՞նչ օրենսդրական նախաձեռնություններ եք ներկայացրել: Դուք ալտերնատիվ ինչ-որ օրինագի՞ծ եք բերել, որ մենք մերժել ենք ու ՏԻՄ օրենք ենք բերե՞լ: Մեկ այլ բան, այսինքն՝ Աստված մի արասցե, եթե պատերազմ է սկսվում, ապա Վանաձորում պիտի ՏԻՄ չլինի, կամ որևիցե համայնքում պիտի տեղական ինքնակառավարման մարմին չլինի: Բա պաշտպանությունը ոնց ենք կազմակերպելու՝ ենթադրյալ:
ՏԻՄ ՕՐԻՆԱԳԻԾԸ՝ ԱԺ ԱՐՏԱՀԵՐԹ ՆԻՍՏԻ ՕՐԱԿԱՐԳՈՒՄ
Խորհրդարանական մեծամասնության ներկայացուցիչ Վլադիմիր Վարդանյանը քննարկումը վերադարձրեց բուն հարցի առանցք, բացատրեց՝ ամենամեծ վտանգը, որ կարող է առաջանալ երկրի ներասում, և որը կարող է ստեղծել լրջագույն արտաքին մարտահրավերներ, իշխանության վակուումն է:
Վլադիմիր Վարդանյան (ՀՀ ԱԺ «Քաղաքացիական պայմանագիր» խմբակցության պատգամավոր) - Սա դասական այդ օրինակն է, ոչ մեկը ոչ մեկից ոչ մի իշխանություն չի զավթում, բայց արդյոք հանդուրժելի է՞ Հայաստանում իշխանական վակուումը: Չէ հանդուրժելի չէ, եթե, իհարկե, դու հանդես չես գալիս ՀՀ թշնամական դիրքերից: Սա լուծում է, որն ապահովում է հստակ, սահուն անցում՝ մեծամասնականից դեպի համամասնական: Այս իրավիճակը բացարձակապես չի լինելու այն դեպքերում, երբ մենք ունենալու ենք խոշորացված համամասնական ընտրակարգով ձևավորված համայնքներ:
Ի վերջո՝ 49 կողմ ձայնով խորհրդարանը որոշեց հարցը քննարկել հատուկ ընթացակարգով: Հիմնական զեկուցող Վահագն Հովակիմյանը ներկայացրեց առաջարկվող հիմնական փոփոխությունը:
Վահագն Հովակիմյան (ՀՀ ԱԺ «Քաղաքացիական պայմանագիր» խմբակցության պատգամավոր) - Եթե օրենքով միավորված համայնքի ավագանու առաջին նիստն ավագանու լիազորությունները ստանձնելու պահից 20 օրվա ընթացքում չի գումարվում, կամ սույն օրենսգրքի 69-րդ հոդվածի 2-րդ մասի սահմանված կարգով այդ ավագանու լիազորությունները վաղաժամկետ դադարեցվում են, ապա ՀՀ վարչապետը նշանակում է համայնքի ղեկավարի ժամանակավոր պաշտոնակատար, մինչև օրենքով սահմանված կարգով նորընտիր համայնքի ղեկավարի լիազորությունների ստանձնումը:
Հարակից զեկուցող, տարածքային կառավարման և ենթակառուցվածքների փոխնարար Վաչե Տերտերյանը հստակեցրեց՝ օրենքի այս կարգավորումով ավագանու լիազորությունները չեն սահմանափակվում:
Վաչե Տերտերյան (ՀՀ տարածքային կառավարման և ենթակառուցվածքների նախարարի տեղակալ) - Կա, եթե չեմ սխալվում, հուլիսի 20 ժամկետ, գոնե էս պահին, երբ որ գործում է այդ սահմանափակումը՝ ավագանու նիստ գումարելու, սցենարներ նկարագրելը, երևի, անշնորհակալ գործ է, բայց երևի հուլիսի 20-ին, երբ արգելանքը հանվի, ենթադրվում է, որ տեղի կունենա ավագանու նիստ: Հետո ինչ կլինի՝ ցույց կտա հետագա ընթացքը: Սա է օրենքի նախագծի բովանդակությունը: Կարծում եմ, որ ընդունումով գոնե այս կարճ ժամանակում մենք հնարավորություն կունենանք Վանաձորում իրավիճակը պահել կառավարելի:
Առաջին ընթերցմամբ օրենքի նախագիծը ընդունվեց, մոտ 4 ժամ տևած ընդմիջումից հետո խորհրդարանը վերադարձավ դահլիճ՝ երկրորդ ընթերցման: Այդ ընթացքում «Հայաստան» խմբակցությունը առաջարկել էր փոփոխություն կատարել նախագծում, որով կսահմանափակվի համայնքի ղեկավարի պաշտոնակատար լինելու իրավունք ունեցողների շրջանակը: Օրենքի նախագծի համահեղինակ Վահագն Հովակիմյանի խոսքով՝ ընդդիմադիր խմբակցության առաջարկը քաղաքական բաղադրիչ ունի: Առաջարկը մերժվել է: ՏԻՄ օրենքում լրացումներ կատարելու նախագիծը 57 կողմ 3 դեմ ձայների հարաբերակցությամբ ընդունվեց երկրորդ ընթերցմամբ և ամբողջությամբ:
