750 մլն դոլարի չափով եվրապարտատոմսերի թողարկում, միջազգային վարկանիշավորող կազմակերպությունների կողմից Հայաստանին տրված դրական գնահատականներ, հարկային եկամուտների գերակատարում, կապիտալ ծախսերի բարձր կատարողական: Ֆինանսների նախարար Տիգրան Խաչատրյանը Ազգային ժողովի ֆինանսավարկային և բյուջետային հարցերի մշտական հանձնաժողովի նիստում ներկայացրեց Կառավարության 2021 թվականի ծրագրի կատարման ընթացքն ու արդյունքները:
Տիգրան Խաչատրյան (ՀՀ ֆինանսների նախարար) - Ունեցել ենք բոլոր ուղղություններով համապատասխանություն, ընդ որում` առնվազն համապատասխանություն, որովհետև շատ դեպքերում դրանք եղել են դրական իմաստով տարբերվող մեր նախնական նպատակադրումներից:
«Հայաստան» խմբակցության պատգամավոր Արթուր Խաչատրյանը հետաքրքրվեց՝ ի՞նչն է պատճառը, որ Կառավարությունը փոխել է արտաքին պարտքի կառավարման 2021 թվականի ռազմավարությունը և ազգային արժույթով պարտք ներգրավվելու փոխարեն նախատեսվածից մեծ արտարժույթով պարտք է ներգրավել: Ի պատասխան` ֆինանսների նախարարը հակադարձեց՝ ներքին պարտքի կշիռն ավելի է մեծացել:
Տիգրան Խաչատրյան - 2021 թվականի ընթացքում մենք հասել ենք մոտավորապես 29 տոկոս ներքին պարտքի կառուցվածքի` կառավարության ընդհանուր պարտքի նկատմամբ: Եվրոպարտատոմսերի թողարկմամբ ներգրավված միջոցների ավելացումը հանրագումարով պարտքի մեջ կառուցվածքային էնպիսի ազդեցություն չի ունեցել, որ արտաքին պարտքի կշիռը մեծանար և մեր քաղաքականությունը շեղվեր նախապես հայտարարված ծրագրային նպատակներից:
«Հայաստան» խմբակցությունից Արծվիկ Մինասյանն էլ նշեց՝ զեկույցում ամեն ինչ միայն դրական է ներկայացված՝ չնայած երկրում առկա տարբեր խնդիրներին:
Արծվիկ Մինասյան (ՀՀ ԱԺ «Հայաստան» խմբակցության պատգամավոր) - Հարկային քաղաքականությունը չի կարող անվտանգայինից կտրված լինել, Արցախի հարցը չի կարող հարկային քաղաքականության վրա ազդեցություն չունենալ, մենք չենք տեսնում այս փաստաթղթում այդպիսի գնահատում, պրոֆեսիոնալ գնահատում, որպեսզի կարողանանք որպես օրենսդիր մարմին, առաջնային մանդատով օժտված մարմին կարողանալ նաև առաջարկություններ ներկայացնել, դիտողություններ անել»:
Հանձաժողովի նախագահ Գևորգ Պապոյանը հայտարարեց՝ «Քաղաքացիական պայմանագիր» խմբակցությունը Կառավարության իրականացրած տնտեսական քաղաքականությունը 2021 թվականի համար դրական է գնահատում:
Գևորգ Պապոյան (ԱԺ Ֆինանսավարկային և բյուջետային հարցերի մշտական հանձնաժողովի նախագահ) - Եվ հարկաբյուջետային քաղաքականությունը, և դրամավարկային քաղաքականությունը, և ներքաղաքական մթնոլորտի առումով բոլոր գործողությունները բերել հանգեցրել են և կայունության, և որոշակի, այսպես ասած, տնտեսական զարգացման փուլի գալուն. այս առումով նույնպես դրական ենք գնահատում:
Հանձնաժողովում քննարկվեց նաև Հայաստանի ու Վերակառուցման և զարգացման եվրոպական բանկի միջև վարկային համաձայնագիրը՝ Երևանի համար ավտոբուսներ ձեռք բերելու նպատակով: Տարածքային կառավարման և ենթակառուցվածքների նախարարի տեղակալ Արմեն Սիմոնյանը նշեց՝ Երևանում նոր երթուղային ցանցի սպասարկման համար անհրաժեշտ է 845 տարբեր չափի ավտոբուս, ինչը նախնական գնահատմամբ 120-ից 150 մլն եվրո կկազմի:
Արմեն Սիմոնյան (ՀՀ տարածքային կառավարման և ենթակառուցվածքների նախարարի տեղակալ)- Երևանի քաղաքապետարանը տրանսպորտային բարեփոխումների ծրագրի առաջին փուլի շրջանակներում 2021 թվականի փետրվարի 1-ին հայտարարել է մրցույթ՝ շուրջ 100 սեղմված բնական գազով շահագործվող 12 մետրանոց ցածրահատակ ավտոբուսների ձեռքբերման նպատակով: Մրցույթային հայտերի հանձնման վերջնաժամկետը սահմանված է եղել 2021 թվականի մարտի 31-ը:
Այս վարկային համաձայնագրի շրջանակներում առաջին փուլով ֆինանսավորման չափը 25 մլն եվրո է, որից 5 մլն-ը դրամաշնորհ, իսկ 20 մլն-ը վարկ: Քննարկման արդյունքում օրենքի նախագիծը դրական եզրակացություն ստացավ և կընդգրկվի Ազգային ժողովի առաջիկա քառօրյա նիստի օրակարգում:
Հեղինակ` Նիկոլայ Ավետիսյան
