ՀՀ վարչապետ Նիկոլ Փաշինյանը Չարենցավանի Արա Մանուկյանի անվան մանկապատանեկան մարզադպրոցում ներկա է եղել «ՀՀ վարչապետի գավաթ» սեղանի թենիսի սիրողական մրցաշարի եզրափակիչ փուլին:
Տարբեր տարիքային խմբերում եզրափակիչ փուլի հաղթողներին մրցանակները հանձնել են վարչապետ Նիկոլ Փաշինյանը, վարչապետի աշխատակազմի ղեկավար Արայիկ Հարությունյանը, կրթության, գիտության, մշակույթի և սպորտի նախարար Վահրամ Դումանյանը, առողջապահության նախարար Անահիտ Ավանեսյանը: Վարչապետը պարգևներ է հանձնել նաև ամենատարեց կին և տղամարդ մասնակիցներին:
Վարչապետը ողջունել է ներկաներին և շնորհավորել է մրցաշարի բոլոր մասնակիցներին՝ այն հաջողությամբ անցկացնելու կապակցությամբ: «Ցանկանում եմ շնորհավորել մրցաշարի բոլոր մասնակիցներին, հաղթողներին, մրցանակի արժանացածներին: Ուզում եմ ուրախությունս արտահայտել, որ գաղափարը, որի մասին մենք խոսում էինք ամիսներ առաջ, հիմա տեսնում ենք իրագործված:
Ուզում եմ արձանագրել, որ այս մրցաշարերը, որոնք կրում են «Վարչապետի գավաթ» անվանումը, լինելու են շարունակական: Սա ասում եմ՝ հաջորդ մրցաշարերի պոտենցիալ մասնակիցներին լուրը հասցնելու համար: Այսինքն՝ սրանք ավանդական մրցաշարեր են, մի տարի չեն տևելու, շարունակական են լինելու: Հույս ունեմ, որ ինչպես խոստանում են անմիջական կազմակերպիչները, ամեն տարի մասնակիցների թիվը կավելանա: Ուզում եմ հատկապես շնորհակալություն հայտնել տարիքով ամենաավագ մասնակիցներին, որոնք իրենց օրինակով ցույց են տալիս, քաջալերում են երիտասարդներին, որ այս մրցաշարերին պետք է մասնակցել, առողջ ապրելակերպն են քարոզում Հայաստանի Հանրապետությունում»,- ասել է Նիկոլ Փաշինյանը:
Վարչապետի խոսքով՝ այս մրցաշարերը ունեն կարևոր նպատակներ, որովհետև օգնում են կառավարության ծրագրում արձանագրված ռազմավարական խնդիրների կյանքի կոչմանը: «Մենք ջանքեր պետք է գործադրենք մեր ռազմավարական նպատակների իրագործման ուղղությամբ. այն է՝ առողջ ապրելակերպի խթանում, սպորտի զարգացում: Ճիշտ է, մեր մրցաշարերը սիրողական բնույթ ունեն, բայց սիրողական սպորտի մասսայականությունն է, որ հաջողություններ է բերում պրոֆեսիոնալ սպորտում:
Կրկին ուզում եմ շնորհակալություն հայտնել կազմակերպիչներին, ասել, որ մենք դեռևս չկազմակերպված ևս երկու մրցաշար ունենք: Մեկը՝ լողի մրցաշարն է, որ ամռանը՝ արդեն հուլիսին, տեղի կունենա Սևանա լճում, և ես պոտենցիալ մասնակիցների ուշադրությունն եմ կրկին ուզում հրավիրել: Մենք, կարծես թե, քննարկում ենք ևս մեկ մարզաձև, ևս մեկ մրցաշար ավելացնելու ուղղությամբ: Խոսքը պտտաձողի վրա ձգումներ իրականացնելու մրցաշարին է վերաբերում: Թերևս երկամարտ կլինի, կլինի պտտաձողի վրա և գետնից ձգումներ իրականացնելու մրցաշար, որը կլինի մեր այս մրցաշարերից հինգերորդը:
Եվ եթե մենք տեսնենք, որ հաջող է ընթանում, իսկ այս պահի դրությամբ տեսնում ենք, որ հաջող է ընթանում, կազմակերպվածության մակարդակն ամեն մրցաշարում ավելի հղկված է լինում, թերևս չի բացառվում, որ այլ մրցաշարեր նույնպես նախաձեռնենք, որպեսզի նաև ոչ պրոֆեսիոնալ մարզիկների համար հնարավորություն լինի իրենց դրսևորել, մրցակցության մեջ մտնել, պայքարել, հաղթել, ուրախանալ և ուրախացնել:
Ուզում եմ շնորհակալություն հայտնել մեր այսօրվա եզրափակչի մասնակիցներին, որովհետև այստեղ գտնվելու ժամանակը, իրոք, վայելեցինք, տեսանք հաղթելու շատ հետևողական ձգտում, տեսանք համառ պայքար, տեսանք արդար պայքար»,- նշել է վարչապետը:
Մրցաշարի եզրափակիչ փուլին մասնակցել են Հայաստանի Հանրապետության մարզերում, Երևան քաղաքում և Արցախի Հանրապետությունում երկու տարիքային խմբերում 1-3-րդ տեղեր զբաղեցրած տղամարդիկ և կանայք: Յուրաքանչյուր մարզ ներկայացված է եղել 12 մասնակցով: Եզրափակիչ մրցաշարին մասնակցել են նաև ՀՀ-ում գործող 14 դեսպանատների ներկայացուցիչներ, այդ թվում՝ դեսպաններ:
Մրցաշարին երկու տարիքային խմբերում 1-20-րդ տեղեր զբաղեցրած մասնակիցներն ստացել են դրամական պարգևներ և ՀՀ ԿԳՄՍՆ համապատասխան կարգի հավաստագրեր, իսկ 1-ին, 2-րդ և 3-րդ տեղեր զբաղեցրած մասնակիցները պարգևատրվել են նաև գավաթներով և մեդալներով:
Ընդհանուր առմամբ՝ դրամական պարգևներ ստացել են 80 մասնակից: 1-ին տեղի համար սահմանված է եղել 1.000.000 դրամ մրցանակ, 2-րդ տեղի համար՝ 600.000 դրամ, 3-րդ տեղի համար՝ 400.000 դրամ, 4-րդ տեղի համար՝ 150.000 դրամ, 5-րդ տեղի համար՝ 100.000 դրամ, 6-10-րդ տեղերի համար՝ 75.000-ական դրամ, 11-20-րդ տեղերի համար՝ 50.000-ական դրամ:
